एमाले महाधिवेशन सुरु हुन पाँच दिन बाँकी, अध्यक्षको संकेत कुर्दै पदाधिकारीका आकांक्षी

एमाले महाधिवेशन सुरु हुन पाँच दिन बाँकी, अध्यक्षको संकेत कुर्दै पदाधिकारीका आकांक्षी

A+ A A-

एमालेको महाधिवेशन सुरु हुन पाँच दिन बाँकी रहँदा पनि पदाधिकारीका आकांक्षीहरूले आफ्नो औपचारिक दाबेदारी प्रस्तुत गर्न सकिरहेका छैनन् ।

पार्टीले निर्वाचन आयोगलाई ५६ लाख रुपैयाँ खर्चेर विद्युतीय मतदानको साधन उपलब्ध गराइसक्यो तर त्यहाँ क-कसलाई मतदान गर्ने भन्नेबारे महाधिवेशनको पाँच दिनसम्म पनि टुंगो लाग्न सकेको छैन ।

सर्वसम्मत नेतृत्व चयनतर्फ महाधिवेशन केन्द्रित हुने देखिएकाले पदाधिकारीका आकांक्षीहरूले अध्यक्ष केपी ओलीकै संकेत कुरिरहेका छन् ।

एमाले नेता विष्णु रिजाल पार्टीमा सर्वसम्मत नेतृत्व चयन प्राथामिकता भए पनि निर्वाचन निषेध नभएकाले उम्मेदवारका आकांक्षीहरूले सहज रूपमा उम्मेदवारीमा निर्वाचन आयोगसमक्ष दाबी दिन सक्ने बताउँछन् । 'हामीले सर्वसम्मत भए सर्वमसम्मत अन्यथा निर्वाचनलाई सहजै स्वीकार गरेका छौँ । निर्वाचन आयोगलाई ५६ लाख रुपैयाँ खर्च गरेर मतदान मेसिन उपलब्ध गराएका छौँ । अब दाबेदारहरू खुलेर आउनुपर्‍यो,' रिजालले भने ।

नेताहरूले आन्तरिक छलफल जारी राखे पनि सार्वजनिक रूपमा प्रकट नभएको रिजालको भनाइ छ । विगतको झैँ प्यानल बनाएर निर्वाचन लड्ने अभ्यास अब नहुने भएकाले पनि धेरै आकांक्षीहरूबारे धेरै चर्चा नभएको उनको बुझाइ छ । 'नेताहरूले एकआपसमा र कार्यकर्ताहरूमाझ संवाद गरिरहनुभएको छ । प्यानल बनाएर लड्दाजस्तो दौडधुप नभएकाले अहिले सार्वजनिक रूपमा पदाधिकारीबारे त्यति धेरै चर्चा छैन । निर्वाचनको प्रचार शैली पनि फेरिएको छ,' उनले भने ।

एमाले महासचिवमा दाबेदारी गरिरहेका तर औपचारिक रूपमा त्यसको घोषणा नगरेका नेता सुरेन्द्र पाण्डे अझै पनि को कुन पदमा बस्ने भन्ने बेला नआएको बताउँछन् ।

अध्यक्ष ओलीले पार्टीको सर्वोपरि हितलाई ध्यानमा राखेर उपयुक्त निर्णय लिने उनको विश्वास छ । 'अध्यक्ष सर्वसम्मत रूपमा चयन हुने भएपछि पार्टीलाई एकताबद्ध बनाउने हिसाबले उहाँले निर्णय लिनुहुनेछ । अहिले नै कुन पदमा को भन्ने बेला भइसकेको छैन ।'

महासचिवकै अर्का दाबेदार विष्णु पौडेल पनि अहिले नै हो-हल्ला गर्न बेला नभएको तर्क गर्छन् । नेताहरूलाई आ-आफ्नो मूल्यांकन र क्षमताअनुसार प्रतिस्पर्धाका लागि पार्टीमा निषेध नरहेकाले उपयुक्त पदमा प्रतिस्पर्धामा उत्रिने उनको भनाइ छ ।

'नेकपा एमालेभित्र आफ्नो क्षमताअनुसार काम गर्नका निम्ति कसैलाई पनि निषेध छैन । हामीले सर्वसम्मति र निर्वाचन दुवैलाई खुला राखेका छौँ । अहिले नै आफ्नो उम्मदेवारीबारे हल्ला गरेर हिँड्नुपर्ने कुनै कारण छैन । ११ गतेसम्म समय छ, नेताहरूले उपयुक्त समयमा उपयुक्त पदमा दाबेदारी दिनुहुनेछ ।'

यस्तै, अध्यक्ष ओलीपछिको पद वरिष्ठ उपाध्यक्ष बन्नका निम्‍ति संसदीय दलका उपनेता सुवास नेम्वाङले ओलीसँग अन्य नेतामार्फत संवाद गरिरहेका छन् ।

उनी आफैँले ओलीसँग यो विषयमा मुख नखोले पनि वरिष्ठ उपाध्यक्षमा दाबेदारी दिने उनको संकेत छ । तर, आफ्नो उम्मेदवारीबारे नेम्वाङ भन्छन्, '११ गते दिउँसो ११ बजेभित्र मेरो उम्मेदवारीबारे सबैले जानकारी पाउनुहुनेछ ।'

महाधिवेशन प्रतिनिधि छनोटमा समेत अध्यक्ष ओली हाबी देखिएकाले उनको संकेतबिना पदबारे खुल्ने मानसिकतामा नेताहरू नपुगेको एक स्थायी कमिटी सदस्यले बताए । 'अध्यक्ष ओलीले जसलाई संकेत गर्नुहुन्छ, त्यही व्यक्ति पदाधिकारी हुने स्थिति छ । प्रतिस्पर्धामा उत्रिन पनि प्रतिनिधि छनोटमै केन्द्र हाबी रहेकाले संकेतअघि खुल्ने मनस्थितिमा नेताहरू देखिनुभएको छैन,' ती नेताले भने ।

यस्तै, आफूले महासचिव बनेर पार्टी हाँक्न सक्ने दाबी गरिरहेका नेता पृथ्बीसुब्बा गुरुङ सर्वसम्मत नेतृत्व चयनमा जोड रहेकाले आकांक्षीहरू नखुलेको बताउँछन् । 'पार्टी विभाजनपछि एकताको सन्देश दिनका निम्ति सर्वसम्मत नेतृत्व चयनमै नेताहरूको जोड छ । अध्यक्षले पार्टीलाई एकताबद्ध बनाउने हिसाबले निर्णय लिने विश्वासमा नेताहरू रहेको देखिन्छ,' गुरुङले भने ।

पदाधिकारीका आकांक्षीहरूले अध्यक्ष ओलीसँग संवाद जारी राखे पनि उनले कसैलाई पनि केही संकेत दिएका छैनन् । एमाले स्थायी समितिका सदस्य रघुजी पन्तले अध्यक्ष ओलीलाई पार्टीलाई एकताबद्ध बनाउन र विभाजनपछि गरिएका टिप्पणीलाई गलत सावित गर्नका निम्ति पदाधिकारी चयनमा ध्यान दिन ध्यानाकर्षण गराइए पनि कुनै जवाफ नआएको बताए । 'हामीले तपाईंले पार्टीमा एकताका पक्षधरलाई कसरी समेट्नुहुन्छ, त्यसको पर्खाइमा छौँ भनेर ध्यानाकर्षण गराएका छौँ । उहाँले कुनै जवाफ दिनुभएको छैन,' उनले भने ।

हालसम्म पदाधिकारीमा अध्यक्ष ओलीलाई चुनौती दिनका निम्ति नेता भीम रावलले मात्रै आफ्नो उम्मेदवारी औपचारिक रूपमा घोषणा गरेका छन् ।

आइतबार पत्रकार सम्मेलन गर्दै उनले आफ्नो उम्मेदवारी औपचारिक रूपमा घोषणा गरेका हुन् । 'महाधिवेशन आउन पाँच दिनअघिसम्म पनि उम्मेदवारी घोषणा भएन भने कार्यकर्तामाझ अन्योल हुने भएकाले मैले त्यसलाई चिर्न उम्मेदवारीको घोषणा गरेको छु ।'

रावलले ओलीको सर्वसम्मत अध्यक्ष यात्रालाई धक्का दिँदै उम्मेदवारी दिएका छन् । अन्य नेताहरूले भने आफ्नो दाबेदारीप्रति ओलीले समर्थन जनाउने संकेत कुरिरहेको देखिन्छ ।

प्रकाशित मिति: आइतबार, मंसिर ५, २०७८ १६:३३