सर्वसम्मत गाह्रो छ, हिजोकै विधि अपनाऔँ : किरण गुरुङ [अन्तर्वार्ता]

A+ A A-

अघिल्लो महाधिवेशनमा उपाध्यक्षमा पराजित भएका एमाले नेता किरण गुरुङ १०औँ महाधिवेशनमा पनि सोही पदमा आकांक्षी छन् । नवौँ महाधिवेशनमा उनी केपी शर्मा ओलीको प्यानलबाट उपाध्यक्षमा उठेका थिए । एमाले स्थायी कमिटी सदस्य गुरुङ गण्डकीका निवर्तमान अर्थमन्त्री हुन् । गुरुङ एमालेको गण्डकी प्रदेश संयोजक पनि हुन् । दोस्रो पटक उपाध्यक्षमै उठ्न लागेका गुरुङ सर्वसम्मत गर्दा पार्टीमा असन्तुष्टि बढ्ने भएकाले चुनाव गरेर पदाधिकारी छान्नुपर्ने पक्षमा छन् । यसै पेरिफेरिमा रहेर गुरुङसँग शिलापत्रकर्मी अनुप पौडेलले गरेको कुराकानीः

महाधिवेशन आइसक्यो । उम्मेदवारीबारे के सोच्नुभएको छ ?

पहिलो कुरा महाधिवेशन सफल पार्नुपर्‍यो । अहिले उम्मेदवारी दिनेभन्दा पनि अवस्था हेर्दा अध्यक्ष निर्विकल्प हुने देखिन्छ । कसैले चुनौती दिए पनि अब पाँच वर्षलाई केपी शर्मा ओली नै अध्यक्ष बन्नुहुन्छ । त्यसबाहेक पदाधिकारी, केन्द्रीय सदस्य को–को निर्वाचित हुन्छन्, कसरी हुन्छन् भन्ने सन्दर्भ छलफलकै विषय छ ।

हिजो वडा अधिवेशन, पालिका अधिवेशन गर्‍यौँ । एकाधबाहेक सबै ठाउँ सर्वसम्म नेतृत्व चयन भएको छ । त्यसले केन्द्रीय कमिटी पनि सर्वसम्मत बनाइयोस् भन्ने दबाब दिन्छ । राम्रो के हुन्छ भने सबै नेतालाई व्यवस्थापन गर्न सके पार्टीको एकता अझ मजबुत हुन्छ ।

सम्भव भएसम्म सबैलाई समेटेर सर्वसम्मत ढंगले नेतृत्व निर्माण गर्ने काम महाधिवेशनमा हुन्छ । त्यस्तो हुँदैन भन्ने हो भने समयको चाप भएकाले हिजोदेखि हामीले अवलम्बन गर्दै आएको लोकतान्त्रिक विधि छ । हिजो पनि उपाध्यक्षमा उम्मेदवारी हुँदा सफल हुन सकिएन । अहिलेको हकमा मेरो आफ्नो कुरा गर्ने हो भने उम्मेदवारी दिनुपरेको, चुनाव हुने अवस्थामा उपाध्यक्षमा नै हुन्छ ।

यसअघिको महाधिवेशनमा पराजित भएको पदमै फेरि किन ?

जित्नेको हकमा माथिमाथि जान्छ । हार्ने मान्छे त्यसैमा बल गर्ने न हो । हिजो उपाध्यक्षमा लडेको र अहिले सफल हुन उपाध्यक्षमा उम्मेदवारी दिन लागेको हुँ । तर, पनि त्यो नेतृत्वले के गर्छ भन्ने कुरा हो । अबको अध्यक्ष केपी ओली हो । उहाँलाई बलियो बनाउने, टिममा बस्ने, सहयोग गर्ने हिसाबले नेतृत्व निर्माण गर्ने हो । सहमतिबाहेक चुनावमै जानुपरेछ भने म उपाध्यक्षमै लड्छु ।

अहिले एमाले दुई/तीन थरीका छन् । सबैलाई मिलाउँदा असन्तुष्टि बढ्ने होला । सर्वसम्मत गर्नेबारे तपाईंको धारणा के छ ?

सबैको चित्त बुझाउन सकिँदैन । महाधिवेशन, सम्मेलन भनेकै नेतृत्व टुंग्याउन हो । त्यसले जे टुंग्याउँछ, त्यसलाई सबैले मानेर जाने नै हो । सर्वसम्मत भएन भने बहुमत निकालेर जाने हो । लोकतान्त्रिक प्रक्रियाअनुसार बहुमतले टुंगो लागेपछि त्यसलाई सबैले मानेर जानुपर्छ । हारेर पनि स्वीकार गर्न सकिएन भने त्यो विधि नै भएन, त्यसरी संगठन चल्नै सक्दैन । हार नमीठो हुन्छ । त्यो सबैलाई थाहा भएकै कुरा हो । हाम्रो विधि–पद्धति त्यही भएकाले अधिवेशनबाट, लोकतान्त्रिक प्रक्रियाबाट बाहिरिएको मान्छेले दुःख माने पनि अरु ढंगले विरोध गरेर जान मिल्दैन ।

सर्वसम्मत गर्दा सबै पर्दैनन् । नपर्नेको दु:खेसो हुन सक्छ । नेतृत्वको एउटा विधि सर्वसम्मत पनि हो । तर, अहिलेको अवस्थामा केन्द्रीय कमिटीमा सर्वसम्मत हुने देखिँदैन । सबै आकांक्षी छन् । अहिले प्रायः सबै केन्द्रीय कमिटीको सदस्य हुन पाइन्छ कि, अरु केही हुन पाइन्छ कि भनेर आकांक्षी बनेर हिँडिरहेको अवस्था छ । विगतको जस्तो छैन अहिले । पहिला थोरैको आकांक्षा हुन्थ्यो । म केन्द्रीय सदस्य हुन योग्य छु भन्ने कुरा महसुस गरेका मान्छे हुन्थे । अहिले जो गइदिए पनि प्रतिनिधि भएका सबैले, मसँग सम्पर्कमा आएकाहरूले 'म केन्द्रीय कमिटीमा जाने हो' भनेको सुनिराखेको छु । त्यो लोकतन्त्रको अभ्यास हो, भन्न पाउने कुरा नै हो । अरु यही १०, ११ र १२ गतेको अधिवेशनले टुंग्याउँछ ।

पार्टी २ जेठमा फर्किएपछि एमाले गण्डकी प्रदेशको संयोजकको जिम्मेवारी पाउनुभएको छ । महाधिवेशनका लागि यहाँबाट तयारी के कस्तो हुँदैछ ?

गण्डकी प्रदेश कमिटीले १ सय ६८ जना प्रतिनिधि निर्वाचित गरेर पठाएको छ । केन्द्रीय कमिटी आयोजकमा पर्छ । त्योबाहेक प्रतिनिधिको संख्या १ सय ६८ छ । विभिन्न जनसंगठन, प्रवास पनि छ । प्रवास प्रतिनिधिको जिल्लाको हिसाबले हेर्दा छुट्टै हुन्छ । विभागहरू छन् । यसले गर्दा अरु पनि थपिए होलान् । त्यसको यकिन तथ्यांक हामीसँग छैन ।

अहिले संघीयतामा गएका छौँ । सन्तुलन मिलाउनुपर्छ । हिजो एकै ठाउँका मान्छे धेरै पर्थे । अब त्यस्तो हुनु हुँदैन । सन्तुलित ढंगले लैजानुपर्छ । केन्द्रीय कमिटी २२५ सदस्यीय छ । पदाधिकारी, स्थायी कमिटी र केन्द्रीय कमिटीमा पनि सबै प्रदेशबाट समान प्रतिनिधित्व हुनुपर्छ र नेतृत्व निर्माण गर्नुपर्छ भन्ने हाम्रो आवाज रहन्छ । पदाधिकारीको हिसाबले १५ जनामध्ये कम्तीमा पनि दुई जना पदाधिकारी गण्डकी प्रदेशले पाउनुपर्छ भन्नेमा हामी छौँ ।

अन्तिममा, महाधिवेशन प्रतिनिधि र पार्टीका शुभचिन्तकलाई के सन्देश दिन चाहनुहुन्छ ?

भावी अध्यक्ष केपी ओलीको विचार, सोचसँग मिल्ने, केपी ओलीको टिमलाई बलियो बनाउने गरेर योग्य, सक्षम र सबै हिसाबले सन्तुलित नेतृत्व निर्माण गर्न सबै प्रतिनिधिलाई सहयोग गर्न आग्रह गर्छु । त्यही गर्नुहुन्छ भन्ने अपेक्षा पनि छ । हिजो काम गरेको, सक्रियतालाई हेरेर, सन्तुलित भूगोल हुने गरेर नेतृत्व छान्न सके हाम्रो पार्टीलाई बलियो बनाउन सक्छौँ ।

प्रकाशित मिति: आइतबार, मंसिर ५, २०७८ २०:१०