यसो गरे मलेशियाबाट सस्तोमा आउँछ पैसा

A+ A A-

तपाइ आफै मलेशियामा हुनुहुन्छ ? वा आफन्त मलेशियामा छन् ? आफै वा आफन्त मलेशियामा छन् भने कुन माध्यमबाट नेपालमा पैसा पठाउँदा सस्तो पर्छ भनेर तपाइ सोचिरहनु भएको होला ।

मलेशियाबाट नेपालमा पैसा पठाउँदा १ प्रतिशतभन्दा कम खर्चमा पनि हुन्छ । र, त्यही देशबाट नेपालमा पैसा पठाउन ४.४३ प्रतिशत पनि खर्च लाग्छ । अर्थात कुनै माध्यमबाट मलेशियादेखि नेपालमा पैसा पठाउनु भयो भने १०० रुपैयाँमा एक रुपैयाँभन्दा कम र सय रुपैयाँ नै पठाउँदा ४ रुपैयाँ ४३ पैसा पनि तिर्नुपर्छ ।

विश्व बैंकले गत पुस १५ (डिसेम्बर, २०१८) गतेसम्मको तथ्यांकको आधारमा मलेशियाबाट नेपालमा कुन माध्यमबाट पैसा पठाउँदा कति खर्च लाग्छ भन्ने अध्ययन गरेको छ । सो अध्ययन अनुसार वेस्टर्न युनियनबाट नेपालमा पैसा पठाउँदा सबैभन्दा सस्तो सय रुपैयाँमा ८९ पैसा (०.८९ प्रतिशत) र इन्सेन्टिभ रेमिटबाट नेपालमा पैसा पठाउँदा सबैभन्दा महंगो अर्थात सय रुपैयाँमा ४ रुपैयाँ ४३ पैसा (४.४३ प्रतिशत) खर्च लाग्ने गरेको उल्लेख गरेको छ ।

वेस्टर्न युनियनले इन्टरनेट माध्यम प्रयोग गरी नेपालमा पैसा पठाउँदा यति सस्तो पर्ने गरेको विश्व बैंकको भनाइ छ । वेस्टर्न युनियनका मलेशियामा पैसा संकलन गर्ने संजाल र नेपालमा पैसा दिने संजाल पनि बढी भएकोले नेपालीलाई पैसा पठाउन र प्राप्त गर्न सहज हुने अध्ययनको निष्कर्ष छ । वेस्टर्न युनियनले बैंक खातामा पैसा हालिदिन मात्रै यति कम शुल्कमा मलेशियाबाट नेपालमा पैसा पठाउने हो । नगदै दिन भने उसले सबैभन्दा बढी शुल्क लिने इन्सेन्टिभ केही कम मात्रै शुल्क लिने गर्छ ।

यस्तै सबैभन्दा महंगो पर्ने इन्सेन्टिभ रेमिटका मलेशियामा पैसा संकलन गर्ने संजाल र नेपालमा पैसा दिने केन्द्रहरु मध्यमस्तरको विश्व बैंकको भनाइ छ ।

यी ६ वटा सस्ता माध्यम
वेस्टर्न युनियनले इन्टरनेट मार्फत पैसा पठाउँदा ०.८९ प्रतिशत लागतमा नेपालमा पुर्याउने गरेको भएपनि एजेन्ट मार्फत पैसा पठाउँदा अलि बढी खर्च लिने गरेको छ । एजेन्ट मार्फत मलेशियाबाट वेस्टर्न युनियनले नेपालमा पैसा पठायो भने १.२२ प्रतिशत खर्च लाग्ने अध्ययनले देखाएको छ ।

मनिम्याच ट्रान्सफरबाट मलेशियाबाट नेपालमा पैसा पठाउँदा २.३ प्रतिशत खर्च लाग्छ । यसले पनि इन्टरनेट माध्यम प्रयोग गरेर नेपालमा पैसा पठाउने हो । यसको पैसा संकलन गर्ने केन्द्र र नेपालमा पैसा वितरण गर्ने संजाल मध्यमस्तरको भएको विश्व बैंकले भनेको छ ।

इरेमिटले मलेशियाबाट नेपालमा पैसा पठाउँदा २.४१ प्रतिशत खर्च लाग्ने गरेको छ । इरेमिटलाई पनि संजाल कम भएकोले विश्व बैंकले उसलाई मध्यमस्तरको भनेको छ ।

मर्चेन्ट्रेड मनिट्रान्सफरले पनि मलेशियाबाट नेपालमा पैसा पठाउने सेवा प्रदान गर्दै आएको छ । मलेशियामा भएको पैसा संकलन केन्द्र र नेपालमा पैसा दिने संजाल कम भएकोले विश्व बैंकले उसलाई पनि मध्यमस्तरको भनेको छ । मर्चेन्ट्रेड मनिट्रान्सफरबाट मलेशियादेखि नेपालमा पैसा पठाउदा २.४१ प्रतिशत खर्च लाग्ने गरेको छ ।

यस्तै अलराझी इटावेलले बैंकका शाखा प्रयोग गर्ने गरी मलेशियाबाट नेपालमा पैसा पठाउँदै आएको छ । यसले दिने सेवाको स्तर मध्यम खालको रहेको विश्व बैंकको भनाइ छ । अलराझीले मलेशियाबाट नेपालमा पैसा पठाउँदा ३.०२ प्रतिशत खर्च लाग्ने गरेको छ ।

यी हुन बढी खर्च लाग्ने ७ मनिट्रान्सफर
भालयूले एजेन्ट प्रयोग गरी मलेशियाबाट नेपालमा पैसा पठाउने सेवा दिइरहेको छ । यसबाट नेपालमा पैसा पठाउन संजालको हिसाबले मध्यमस्तरको रहेको विश्व बैंकको भनाइ छ । भालयूले मलेशियाबाट नेपालमा पैसा पठाउँदा ३.१२ प्रतिशत खर्च लाग्ने गरेको छ ।

प्रभु मनिट्रान्सफरले एजेन्ट प्रयोग गरी मलेशियाबाट नेपालमा पैसा पठाउने गरेको छ । मलेशियामा पैसा संकलन गर्ने केन्द्र मध्यमस्तरको भएको र नेपालमा पैसा वितरण गर्ने केन्द्र धेरै भएकोले वितरणको लागि उपयुक्त माध्यमको रुपमा प्रभुलाई विश्व बैंकले लिएको छ । यो मनिट्रान्सफर मार्फत मलेशियाबाट नेपालमा पैसा पठाउँदा ३.१२ प्रतिशत नै खर्च लाग्ने विश्व बैंकको अध्ययनले देखाएको छ ।

म्याक्स मनिले इन्टरनेट माध्यमबाट मलेशियादेखि नेपालमा पैसा पठाउने गरेको छ । मलेशियामा पैसा संकलन केन्द्र र नेपालमा वितरण संजाल मध्यमस्तरको रहेको विश्व बैंकको भनाइ छ । म्याक्स मनि मार्फत मलेशियाबाट नेपालमा पैसा पठाउँदा ३.४३ प्रतिशत खर्च लाग्ने गरेको छ ।

मलेशियामा राम्रो संजाल र नेपालमा मध्यमस्तरको संजाल भएको आइएमइ मनिट्रान्सफर मार्फत नेपालमा पैसा पठाउँदा ३.७९ प्रतिशत खर्च लाग्ने विश्व बैंकको अध्ययनले देखाएको छ ।

मनिग्रामबाट पैसा पठाउन मलेशियामा पैसा बुझ्ने केन्द्र पनि धेरै भएको र नेपालमा वितरण संजाल पनि बढी भएको विश्व बैंकको भनाइ छ । मनिग्राम मार्फत मलेशियाबाट नेपालमा पैसा पठाउँदा ३.८२ प्रतिशत खर्च लाग्ने गरेको छ ।

वेस्टर्न युनियनले नगदै दिनु पर्यो भने चर्काे शुल्क लिने गरेको छ । मलेशियामा नगदै बुझेर पनि वेस्टर्न युनियनले नेपालमा नगदै दिनु पर्यो भने ४.१९ प्रतिशत शुल्क लिन्छ ।

मलेशियाबाट नेपालमा पैसा पठाउँदा सबैभन्दा महंगो इन्सेन्टिभ रेमिटको छ । यसले ४.४३ प्रतिशत शुल्क लिन्छ । उसले डेविट वा क्रेडिट कार्ड मार्फत मात्रै भुक्तानी दिने हो । मलेशियाबाट नेपालमा पैसा पठाउँदा औसतमा २.९३ प्रतिशत खर्च लाग्ने गरेको अध्ययनले देखाएको छ ।

कसले कति समयमा दिन्छन् पैसा ?
अध्ययनका अनुरा इरेमिट, अलराझी र प्रभु मनिट्रान्सफरले मलेशियामा पैसा बुझेकै दिन नेपालमा दिनु भनेका ब्यक्तिलाई पैसा दिने गरेका छन् । बाँकी मनिट्रान्सफरले भने मलेशियामा पैसा बुझेको एक घण्टाभन्दा पनि कम समयमै नेपालमा भुक्तानी दिने गरेका छन् ।

यी हुन नगदै नदिनेहरु
वेस्टर्न युनियनले बैंक खातामा पनि पैसा हालिदिन्छ भने नगदै पनि दिन्छ । तर, वेस्टर्नबाट नेपालमा नगदै लिन चर्काे शुल्क पर्छ । यस्तै मनिम्याच ट्रान्सफरले बैंक खातामा मात्रै भुक्तानी गर्छ, नगदै दिदैन ।

इरमेटिले पनि नगदै दिदैन । उसले डेविट वा क्रेडिट कार्डबाट मात्रै भुक्तानी दिने गरेको विश्व बैंकको भनाइ छ । यस्तै म्याक्स मनि र इन्सेन्टिभले पनि डेविट वा क्रेडिट कार्डबाट मात्रै भुक्तानी दिने गरेका छन् । बाँकी मनिट्रान्सफरले भने नगदै पनि दिने गरेका छन् । सबै मनिट्रान्सफरले मलेशियामा भने नगदै लिने गरेका विश्व बैंकको भनाइ छ ।

प्रकाशित मिति: मंगलबार, माघ २९, २०७५ ०४:५०