काेइराला परिवारकाे वर्चस्वका बीच माेरङका दुई क्षेत्रमा देउवा समूहकाे कब्जा

काेइराला परिवारकाे वर्चस्वका बीच माेरङका दुई क्षेत्रमा देउवा समूहकाे कब्जा

A+ A A-

नेपाली कांग्रेसको १४औँ महाधिवेशनअन्तर्गत मोरङमा प्रदेश निर्वाचन क्षेत्रका सभापति, पदाधिकारी र क्षेत्रीय प्रतिनिधिहरू छनोट भएका छन् ।

निर्वाचन परिणामअनुसार कांग्रेस संस्थापनभन्दा कोइराला–पौडेल समूह बलियो देखिएको छ । जिल्लाभर जम्मा १२ प्रदेश निर्वाचन क्षेत्रमा देउवापक्षीय दुई जना सभापति विजयी भएका छन् ।

मोरङका १२ वटा प्रदेश निर्वाचन क्षेत्रमध्ये चारवटामा सर्वसम्मत भएपछि थप आठवटामा सभापति चयन गर्न शनिबार निर्वाचन सम्पन्न भएको हो । साँझदेखि नै मतगणना आरम्भ भएको थियो । आइतबार बिहान प्राप्त परिणामअनुसार मोरङ निर्वाचन क्षेत्र नम्बर १ ‘क’ मा नरबहादुर तामाङ र ‘ख’ मा राजकुमार लामा निर्वाचित भएका छन् । लामा सर्वसम्मत भएका हुन् । यसैगरी, निर्वाचन क्षेत्र नम्बर २ ‘क’ मा कन्हैयालाल राजवंशी र ‘ख’ देवेन्द्र बस्नेत विजयी भएका छन् । कन्हैयालाल सर्वसम्मत भएका हुन् ।

निर्वाचन क्षेत्र नम्बर ३ ‘क’ गंगा याक्खा र ‘ख’ जगतलाल चौधरी, क्षेत्र नम्बर ४ ‘क’ मा एकाराम माझी र ‘ख’ मा सुवोध निरौला निर्वाचित भएका छन् । निर्वाचन क्षेत्र नम्बर ५ ‘क’ अचानु खाँ गन्गाई र ‘ख’ जितु साह विजयी भएका छन् । उनीहरू सर्वसम्मत भएका हुन् । कांग्रेस नेता अमृत अर्यालको समर्थन र सहयोगमा निर्वाचित उनीहरू देउवा पक्षका उमेदवार हुन् ।

मोरङको निर्वाचन क्षेत्र नम्बर ६ ‘क’ दीपक भगत र ‘ख’ मधुबाबु तिवारी विजयी भएका छन् । निर्वाचनबाट प्रदेश निर्वाचन क्षेत्रको सभापतिसहित पदाधिकारी निर्वाचित भएको मोरङ कांग्रेसका सचिव मोदराज घिमिरेले जानकारी दिए । घिमिरेका अनुसार मोरङको मत परिणामअनुसार जिल्लामा पौडेल–कोइराला समूहले आफ्नो वर्चस्व कायम राखेको छ ।

निर्वाचनबाट हरेक निर्वाचन क्षेत्रबाट १६ जना प्रदेश अधिवेशन प्रतिनिधि चयन भएका छन् । जिल्लाबाट जम्मा १९२ जना अधिवेशन प्रतिनिधिले प्रदेश पदाधिकारी चयन गर्न मत खसाल्नेछन् । मोरङ कांग्रेसका अनुसार जिल्लामा जम्मा ३५५१ क्षेत्रीय प्रतिनिधि विजयी भएका थिए ।

प्रदेश प्रतिनिधि र पदाधिकारी चयन गर्न तीमध्ये करिब ९९ प्रतिशतले मत खसालेको पार्टीसचिव घिमिरेले जानकारी दिए । मोरङको क्षेत्र नं १ ‘क’ २८३ र ‘ख’ मा ३७६, २ ‘क’ २९८ र ‘ख’ मा ३८४, ३ ‘क’ २५९ र ‘ख’ २६०, ४ ‘क’ ३५२ र ‘ख’ मा ३३८, ५ ‘क’ २४६ र ‘ख’ १९७, निर्वाचन क्षेत्र नम्बर ६ ‘क’ ३०४ र ‘ख’ मा २५४ मतदाता थिए ।

मोरङको निर्वाचनमा केन्द्रीय नेताहरू महेश आचार्य, डा. शेखर कोइराला, मीनेन्द्र रिजाल र अमृत अर्याल खटिएका थिए ।

केन्द्रीय नेताहरूले आफू पक्षधर सभापति तथा प्रतिनिधि चयन गराउन पहल गरेका हुन् । कतिपय क्षेत्रमा मोरङ कांग्रेस सचिव नागेश कोइराला र कांग्रेस संसदीय दल १ नम्बर प्रदेशका प्रमुख सचेतक तथा आन्तरिक मामिला तथा कानुनमन्त्री केदार कार्की पक्षधर उमेदवारबीच पनि प्रतिस्पर्धा देखिएको छ ।

दुवै नेता एउटै खेमाका भए पनि पालिका तथा प्रदेश निर्वाचन क्षेत्रको चुनावमा आन्तरिक प्रतिस्पर्धा गरेका छन् ।

प्रकाशित मिति: आइतबार, मंसिर ५, २०७८ १३:३१