‘गुण्डा नाइके’ अभिषेक गिरीलाई फेरि मोरङ कारागार ल्याउने तयारी

A+ A A-

चर्चित ‘गुण्डा नाइके’ अभिषेक गिरीलाई फेरि विराटनगर हाटखोलास्थित मोरङ कारागार ल्याउने तयारी थालिएको छ ।

हाल सप्तरी कारागारमा रहेका गुण्डा नाइके गिरीलाई कारागार व्यवस्थापन विभागले मोरङ कारागार ल्याउन पत्राचार गरेको छ । सोही पत्र बमोजिम गिरीलाई विराटनगरस्थित मोरङ कारागार ल्याउने तयारी भइरहेको हो ।

मोरङ कारागारका निमित्त जेलर रामप्रसाद पोखरेलका अनुसार गिरीलाई सप्तरीबाट मोरङ कारागार ल्याउन विभागले शुक्रबार पत्राचार गरेको हो । ‘विभागबाट चिट्ठी आइसकेको छ,’ उनले शिलापत्रसँग भने, ‘सप्तरीबाट मोरङ कारागार ल्याउने भन्ने विभागको निर्णय छ ।’

निमित्त प्रमुख जेलर पोखरेलले गिरीलाई अहिले नै मोरङ कारागार ल्याउने ‘माहोल’ नरहेकाले तत्काल नपठाउन सप्तरी कारागारलाई आग्रह गरिएको बताए । ‘मैले सप्तरीमा फोन गरेर अहिले ल्याउन सक्ने माहोल छैन भनेको छु । अहिले नपठाइदिनु भनेर हामीले आग्रह गरेका छौँ,’ उनले भने ।

गत १६ कात्तिकमा डिल्लीबजार कारागारबाट मोरङ सरुवा गरी विराटनगर ल्याइएका गुण्डा नाइके गिरीलाई आन्दोलन गरेर अन्य कैदीबन्दीले छिर्न नदिएपछि सप्तरी कारागार लगिएको थियो । कारागारभित्र कैदीबन्दीलाई यातना र असुली धन्दा चलाउने गिरीलाई ल्याउन पाइँदैन भन्दै अन्य कैदीबन्दीले आन्दोलन गरेपछि उनलाई त्यतिबेला सप्तरी पठाइएको थियो ।

त्यसको केही दिनपछि गिरीका समर्थक र गिरीविरुद्ध आन्दोलित कैदीबन्दीबीच झडप भएको थियो । कारागारभित्र रहेका कैदीबन्दीको दुई समूहबीच भएको झडपमा आधा दर्जन कैदीबन्दी घाइते भएका थिए । कारागार व्यवस्थापन विभागले गिरीलाई डिल्लीबजार कारागारबाट गत १७ भदौमा नै सरुवा गरेको थियो । सरुवालगत्तै विरोध सुरू भएपछि विभागले उक्त निर्णय कार्यान्वयन गरेको थिएन ।

मोरङ कारागारमा रहँदा गिरीले जेलभित्रैबाट असुली र फिरौती धन्दा चलाएको आरोप लागेपछि २३ चैत २०७४ मा डिल्लीबजार कारागार सारिएको थियो । सरकारी कर्मचारीलाई बन्धक बनाएर फिरौती मागेको आरोपमा गिरीलाई प्रहरीले २०७० सालमा पक्राउ गरेको थियो ।

सोही मुद्दामा गिरी जेलमा छन् । गैरकानुनी रूपमा सम्पत्ति आर्जन गरेको अभियोगमा सम्पत्ति शुद्धीकरण अनुसन्धान विभागले समेत गिरीमाथि विशेष अदालतमा मुद्दा चलाएको छ ।

प्रकाशित मिति: शनिबार, मंसिर ४, २०७८ १६:४९