सेतीदेवी शारदा माविलाई राष्ट्रपति रनिङ सिल्डको उपाधि

A+ A A-

सुनकाेसी गाउँपालिका खेलुकद विकास समितिको आयोजनामा सुरु भएको गाउँपालिका स्तरीय राष्ट्रपति रनिङ सिल्डको उपाधि सेतीदेवी शारदा मावि लामोसाँघुले जितेको छ ।

सुनकोसी गाउँपालिकाभरका माध्यमिक विद्यालयहरुको सहभागिता रहेको प्रतियोगितामा विभिन्न विधामा भएको प्रतिस्पर्धामा शारदाले बढी अंक ल्याउँदै जितेको हो ।

दुई दिनसम्म सञ्चालन भएको प्रतियोगितामा नौ सामुदायिक विद्यालयको सहभागिता थियो । उत्कृष्ट विद्यालय तथा खेलाडीलाई गाउँपालिका अध्यक्ष श्रवणकुमार जीसीले पुरस्कार वितरण गरेका थिए ।

प्रतियोगितामा २० स्वर्णसहित सेतीदेवी शारदा प्रथम भएको थियो । त्यस्तै, ५ स्वर्णसहित महेन्द्रदोय मावि द्वितीय र चार स्वर्णसहित कोल्दोङ मावि तृत्तीय भएको सुनकोसी गाउँपालिका खेलकुद विकास समितिका अध्यक्ष रोहिन्द्रविक्रम खड्काले जानकारी दिए ।

पुरुष भलिबलमा कोल्दोङ मावि प्रथम र जाल्पा मावि कोठे द्वितीय भएको थियो । महिला भलिबलमा पनि कोल्दोङ माविले उपाधि जितेको हो । दौड, हाइजम्प, लङजम्प, तेक्वान्दोलगायतका खेल प्रतियोगितामा समावेश गरिएको थियो ।

जिल्लामा उत्कृष्ट हुनेलाई नगद पुरस्कारको घोषणा
जिल्ला स्तरीय प्रतियोगितामा उत्कृष्ट हुने गाउँपालिकाका खेलाडीलाई नगद पुरस्कार दिने सुनकोसी गाउँपालिका अध्यक्ष श्रवणकुमार जीसीले घोषणा गरेका छन् । जिल्ला स्तरीय प्रतियोगितामा स्वर्ण पदक ल्याउनेलाई ५ हजार, रजतलाई ३ हजार र कांस्य पदक विजेतालाई २ हजार प्रदान गर्ने अध्यक्ष जीसीले बताए ।

प्रतियोगिताको उद्घाटन सुनकोसी गाउँपालिका–७ का अध्यक्ष ईश्वर तिमिल्सिनाले गरेका थिए । पुरस्कार वितरण समारोहमा सुनकोसी गाउँपालिका–३ का अध्यक्ष रामहरि खड्का, ४ का देवेन्द्र खड्का, ७ का ईश्वर तिमिल्सिना, महेन्द्रदोय माविका प्रधानाध्यापक नीलप्रसाद सुवेदी, सेतीदेवी शारदा माविका प्रअ बासुदेव जीसीलगायतको सहभागिता थियो । कार्यक्रममा खेलकुद विकास समितिले भुटानको थिम्पुमा भएको तेक्वान्दो प्रतियोगितामा उत्कृष्ट हुने खेलाडीहरुलाई सम्मान गरेको थियो ।

प्रकाशित मिति: आइतबार, असार १, २०७६ २०:०६