विराटनगरका मेयरलाई पार्टीकै नेताहरूको असहयोग, जनप्रतिनिधिले नै रोके ठेक्का लागेका आकाशे पुलको काम

विराटनगरका मेयरलाई पार्टीकै नेताहरूको असहयोग, जनप्रतिनिधिले नै रोके ठेक्का लागेका आकाशे पुलको काम

A+ A A-

विराटनगरमा बनाउन लागिएका तीन वटा आकाशे पुलको निर्माण कार्य रोकिएको छ । विराटनगरको कञ्चनबारी, बरगाछी र बसपार्कनजिकै तीन स्थानमा आकाशे पुल बनाउन लागिएको हो ।

आकाशे पुलको शिलान्यास भइ गत वेशाखमा ठेक्का लागेर निर्माण पनि सुरु भइसकेको थियो । करिब २ करोड ७० लाखमा निर्माण हुने आकाशे पुलका लागि विराटनगरको कला विल्डर्सले दुई र आरके विल्डर्सले एउटा ठेक्का पाएका छन् । महानगरका इन्जिनियर अर्जुन थापाका अनुसार सम्झौता बमोजिम एक वर्षभित्र निर्माण सम्पन्न भइसक्नुपर्ने छ ।

तर, स्थानीयको अवरोधपछि निर्माण कार्य रोकिएको हो । आफ्नो घर–जग्गाअगाडि आकाशे पुल नबनाउन स्थानीयले दबाब दिएका छन् । जनप्रतिनिसमेत रहेका केही स्थानीयले आकाशे पुल नबनाउन दबाब दिएपछि निर्माण कार्य रोकिएको विराटनगर महानगरपालिकाले जनाएको छ ।

अवरोधका कारण ठेक्का सम्झौता भएको ६ महिनासम्म पनि निर्माण कार्यले गति लिएको छैन । ‘ती ठाउँहरूमा विवाद आएर काम अड्किएको हो,’ थापाले भने, ‘घर-जग्गा छेलिन्छ भनेर स्थानीयले अवरोध गरिरहनुभएको छ । महानगरबाट विवाद समाधान गरी काम अगाडि बढाउने प्रयास भइरहेको छ ।’

कञ्चनबारीमा प्रदेश सांसदसमेत रहेका नेपाली कांग्रेसका नेता चुमनारायण तबदारसहितका स्थानीयले घरअगाडि आकाशे पुल नबनाउन दबाब दिँदै आएका छन् । त्यस्तै विराटनगर बसपार्कनजिकै कांग्रेस मोरङका सचिव नागेश कोइरालाले आफ्नो जग्गाअगाडि पुल नबनाउन दबाब दिँदै काम रोक्न लगाएका छन् ।

विराटनगर महानगरपालिकाका मेयर भीम पराजुली नेपाली कांग्रेसका तर्फबाट निर्वाचित भएका हुन् । तर, उनलाई आकाशे पुल निर्माणमा भने पार्टीकै नेताहरूले असहयोग गरेका छन् । कञ्चनबारी र बसपार्क छेउमा कांग्रेस नेताहरूले अवरोध गरेपछि बरगाछीका स्थानीयले पनि घरअगाडि पुल नबनाउनु भन्दै निवेदन दिएको महानगरपालिकाले जनाएको छ ।

महानगरका मेयर पराजुलीले आकाशे पुल सबैलाई चाहिएको भए पनि स्थानीयले घरअगाडि नबनाउन दबाब दिएको बताए । ‘भोल्टेज कम भएका कारण ट्रान्सफर्मर चाहिएको छ । तर, मेरो घर होइन छिमेकीको अगाडि लगाइदिनु भन्ने खालको कुरा आयो,’ पराजुलीले भने, ‘आकाशे पुल सबैलाई चाहिएको छ । तर आफ्नो घरअगाडि होइन ।’

समस्या समाधानका लागि एक/दुई चरणमा वार्ता भइसकेको र केही दिनमा काम सुरु हुने पराजुलीको दाबी छ । जसरी भए पनि स्थानीयसँगको सहमतिमा निर्माण कार्य अघि बढाइने उनले बताए । ‘हामीले एक दुई चरण बार्ता पनि गर्‍यौँ,’ उनले भने, ‘दुई/चार दिनमा जसरी पनि सहमत गरेर बनाउँछौँ ।’

आकाशे पुल निर्माणमा आफ्नै पार्टीका नेताहरूले असहयोग गरे पनि अब उनीहरू पनि सहमतिमा आउने पराजुलीको दाबी छ । ‘कुरा भइरहेको छ, अब मिल्छ । उहाँहरूले पनि मान्नु हुन्छ,’ उनले भने ।

प्रकाशित मिति: शुक्रबार, मंसिर ३, २०७८ २०:५७