कोरोनाविरुद्धको ६ करोड खोप ल्याउँदैछौँ, अब खोपको अभाव हुँदैन : स्वास्थ्यमन्त्री

कोरोनाविरुद्धको ६ करोड खोप ल्याउँदैछौँ, अब खोपको अभाव हुँदैन : स्वास्थ्यमन्त्री

A+ A A-

स्वास्थ्य तथा जनसङ्ख्यामन्त्री विरोध खतिवडाले देशका कुने पनि नागरिक कोरोनाविरुद्धको खोपबाट वञ्चित हुनु नपर्ने गरी सरकारले खोपको व्यवस्था गर्न लागेको बताएका छन् ।

मध्यपुर थिमिको बोडेमा शुक्रबार सुरु भएको राष्ट्रिय स्वास्थ्यकर्मी संघ नेपालको दुई दिने राष्ट्रिय भेलामा मन्त्री खतिवडाले सरकारले ६ करोड खोपको सुनिश्चितता गरेको जनकारी दिए ।

'करिब एक करोड डोज खोप जनतालाई लगाइसकेका छौँ । विश्व स्वास्थ्य सङ्गठनबाट सहयोगमा आउने २० प्रतिशत खोपबाहेक अरु खोप ल्याउन सरकारले केही सम्झौता गरिसकेको छ, केही सम्झौताको चरणमा छ,' खतिवडाले भने, 'जनताका लागि ६ करोड खोप सुनिश्चित गरिसकेका छौँ । अब खोपको अभाव हुँदैन ।'

१२ वर्षदेखि १८ वर्ष उमेर समूहका लागि एक करोड खोप सम्झौता भइसकेको उनको भनाइ थियो । अमेरिकामा पाँच वर्षसम्मका बालबालिकालाई खोप लगाएको र भारत तथा चीनमा पनि त्यस्ता खोपको परीक्षण भइरहेकाले त्यो सफल हुनेबित्तिकै १२ वर्षभन्दा तल पाँच वर्षसम्मका बालबालिकाका लागि पनि खोप ल्याउने उनको भनाइ छ ।

दुई डोज खोप दिएर नपुग्ने भन्दै तेस्रो डोज बुस्टर लगाउनुपर्ने चर्चा चलिरहेकाले त्यसबारेमा पनि सरकारले छलफल चलाएको र आवश्यकता परे तेस्रो डोज दिनका लागि बुस्टर खोप पनि ल्याइने उनको भनाइ छ ।

अहिले केन्द्र र स्थानीय सरकार भए पुग्छ, प्रदेश सरकार चाहिँदैन भनेर बहस चलेको बताउँदै मन्त्री खतिवडाले भने, 'प्रदेश चाहिँदैन भनेर निर्णयमा पुग्ने बेला आइसकेको छैन । अहिले यो प्रयोगात्मक परीक्षणमै छ, अझै कार्यकाल प्रयोगात्मक अवस्थामा प्रदेश सञ्चालन भएपछि मात्रै त्यस बहसका बारेमा छलफल गर्ने बेला आउँछ ।'

स्वास्थ्य बीमा भुक्तानीको व्यवस्थापनमा आएको चुनौती पन्छाउँदै सरकारले बीमाको बाँकी भुक्तानी छिटै गर्ने बताउँदै उनले प्रत्येक नागरिकलाई अहिले तिरेको तीन हजार ५०० पनि नतिर्ने गरी निःशुल्क स्वास्थ्य बीमा गराउन कति बजेट लाग्छ भनेर अध्ययन भइरहेको जानकारी दिए ।

एमालेका अध्यक्ष केपी ओलीको गुटका रूपमा पार्टी चलेपछि विद्रोह गरेको भन्दै मन्त्री खतिवडाले भने, 'नीति नभई नेता प्रधान भएको र ओलीको टाङमुनि बस्नुपर्ने भएपछि पार्टीबाट विद्रोह गरेका हौँ, ७० करोड, ओम्नी र मनोहरा कटाउँछौँ भन्ने गुण्डालाई लिएर पार्टी फुटाउने योजनामा रहेको थाहा पायौँ, त्यसैले विद्रोह गर्‍यौँ ।'

ओलीलाई केन्द्रदेखि सातवटै प्रदेशबाट सत्ताच्यूत गरेर देखाइदिएको बताउँदै उनले भने, 'बालुवाटारबाट बालकोट पुर्‍यायौँ, बालकोटको पनि बार्दलीमा छन्, अबको चुनावबाट ओलीलाई बार्दलीबाट बगरमा पुर्‍याइदिन्छौँ ।'

अबको तीन तहकै चुनावमा नेकपा (एकीकृत समाजवादी) एमालेभन्दा ठूलो पार्टी बन्ने खतिवडाको दाबी छ । 'अब एमाले राप्रपाको वैशाखी टेकेर चुनावमा जाँदैछ, हामी प्रजातान्त्रिक बाम गठबन्धन बनाएर चुनावमा जाँदैछौँ,' उनले भने, 'ओली अबको चुनावमा एउटा काँधमा हलो, अर्को काँधमा सूर्य र अगाडि गाई लगाएर हिँड्नेछन् । त्यसपछि देखिने छ, पार्टीको हैसियत ।'

कार्यक्रममा स्वास्थ्य तथा जनसङ्ख्या राज्यमन्त्री भवानी खापुङले यो सरकारमा जति बसिन्छ, त्यतिञ्जेल नराम्रो काम नगर्ने प्रतिबद्धताका साथ अगाडि बढेको बताए । उनले संविधानमाथि आक्रमण गरेपछि आफ्नै पार्टीको अध्यक्ष र प्रधानमन्त्रीलाई सत्ताबाट हटाएर प्रतिद्वन्द्वीलाई सरकारमा लगेको बताउँदै नेकपा समाजवादीको सफलता यो पनि रहेको चर्चा गरे ।

प्रकाशित मिति: शुक्रबार, मंसिर ३, २०७८ १९:५९