प्रदेश अधिवेशनअघि उम्मेदवार टुंगो लगाउन पौडेललाई दबाब, रुष्ट सिंहलाई फकाउने प्रयास

प्रदेश अधिवेशनअघि उम्मेदवार टुंगो लगाउन पौडेललाई दबाब, रुष्ट सिंहलाई फकाउने प्रयास

A+ A A-

कार्यकर्ताहरूले प्रदेश अधिवेशनअगावै साझा उम्मेदवार टुंगो लगाउन दबाब दिएपछि वरिष्ठ नेता रामचन्द्र पौडेलले नेताहरू मनाउनका लागि संवादको सुरुआत गरेका छन् । मन्त्रिपरिषद् विस्तारपछि आफूसँग चिढिएका प्रकाशमान सिंहसँग उनले बिहीबार संवाद गरे ।

चाक्सीबारीस्थित सिंहकै निवास पुगेर पौडेलले साझा उम्मेदवार बनाउन सहयोग गर्न आग्रह गरेका हुन् । नेता सिंहले पौडेल पहिले नै उम्मेदवार भएको र उनले पार्टी चलाउन नसक्ने भन्दै सार्वजनिक रूपमा भन्दै आएका छन् । सिंह पौडेलले बोलाएको आफू पक्षका नेताको भेलामा पनि जानकारी गराएरै अनुपस्थित भएका थिए ।

सिंहसँगको भेटमा पौडेलले आफ्नो समूहबाट साझा उम्मेदवार बनाउन कार्यकर्ताबाट दबाब बढ्दै गएकाले त्यसमा सहयोग गर्न आफूले आग्रह गरेको बताएका छन् । 'कार्यकर्ताहरूबाट साझा उम्मेदवार बनाउनका निम्ति निकै दबाब छ । त्यसकै लागि सिंहजीलाई आग्रह गरेको हुँ,' उनले शिलापत्रसँग भने ।

महाधिवेशनमा साझा उम्मेदवार बनाउन चुनौती थपिँदै गएकाले आफूले संवादको थालनी गरेको उनले बताए । कोइराला परिवारसँग पनि संवाद थाल्ने उनको भनाइ छ । 'सिंहजीसँग पनि छलफल गरेँ । सबैसँग सहकार्य र समझदारी बनाएर साझा उम्मेदवार बनाउनुपर्ने चुनौती पनि छ । तलबाट कार्यकर्ताहरूले दबाब पनि दिइरहेका छन्,' पौडेलले भने ।

महाधिवेशन नजिकिँदै जाँदा पौडेल समूहका नेताहरूबीच संवादहीनताको अवस्था उत्पन्न भएको थियो । देउवा समूहको तुलनामा आन्तरिक व्यवस्थापन र कार्यकर्ता परिचालन कमजोर रहेको भन्दै कार्यकर्ताहरूले आलोचना गर्न थालेका छन् । ६ गतेभित्र उम्मेदवारको टुंगो लगाउन शीर्ष नेताहरूलाई आफूहरूले समय दिएको नेता गुरुराज घिमिरे बताउँछन् ।

'हाम्रो समूहमा आफूलाई आन्तरिक रूपमा व्यवस्थित गर्नका निम्ति ढिलाइ भइसक्यो । नेताहरू एकताबद्ध हुनैपर्छ । कार्यकर्ताहरूको मनोभावनाविपरीत चल्न मिल्दैन,' घिमिरेले भने, 'प्रदेश अधिवेशनको मितिसम्म उम्मेदवारको टुंगो गर्न हामीले समय दिएका छौँ । त्यसपछि हामी चुप बस्ने छैनौँ ।'

आफ्नो निवासमा फकाउन पुगेका वरिष्ठ नेता पौडेललाई सिंहले अभिभावक बनेर बस्न सुझाव दिएका छन् । 'महाधिवेशनमा सभापतिमा उठ्ने मैले जानकारी गराएको छु । उहाँलाई अभिभावक बनेर बस्न आग्रह गरेँ । उहाँले आफूलाई सहयोग गर्न भन्नुभयो,' सिंहले भने ।

१२औँ महाधिवेशनमा महामन्त्रीमा निर्वाचित भएका सिंहले १३ औँ महाधिवेशनमा वरिष्ठ नेता पौडेललाई सभापतिमा सहयोग गरेका थिए । यस्तै महामन्त्री शशांक कोइरालाको प्रस्तावक समेत उनी थिए । तर पौडेलल र कोइरालालाई सहयोग गर्दा पनि उनीहरूबाट आफू अपमानित भएको सिंहको गुनासो छ ।

बुधबार विराटनगर पुगेर प्रकाशमानलाई काठमाडौंबाहिर नचिन्ने महामन्त्री कोइरालाको अभिव्यक्तिप्रति आक्रोश व्यक्त गर्दै सिंहले आफूलाई अपमानित नगर्न चुनौती दिए । 'म सभापतिभन्दा बढी भोट ल्याएर जितेको मान्छे हुँ । मेरो रेकर्ड हेर्नुस् अपमानित नगर्नुस् । तपाईंले पदमा बसेर के गर्नुभयो त्यसको समीक्षा गर्नुस्,' सिंहले भने ।

देउवाविरुद्ध संसदीय दलमा लड्दा कोइरालाले आफूलाई सहयोग नगरेको भन्दै उनले गुनासो गर्दै आएका छन् । सिंहले आफूलाई उम्मेदवार मानेर पावर सेयर गर्न तयार रहेको तर दाबीबाट पछि नहट्ने जवाफ पौडेललाई दिएका छन् । 'म अब ब्याक हुदिनँ । मलाई उम्मेदवारमा तपाईंले सहयोग गरे पनि नगरे पनि मेरो बलबुतामा उम्मेदवारी दिन्छु । दाबी दिनबाट पछि हट्दिँन,' उनले भनेका छन् ।

यता कोइराला परिवारबाट पनि शेखर कोइरालालाई साझा उम्मेदवार बनाउने तयारी छ । गत मंगलबार शेखर, शशांक र सुजाता कोइरालाबीचको संवादबाट शेखरलाई उम्मेदवार बनाउने सहमति भएको थियो । सो सहमति घोषणा गर्ने तयारी बुधबार स्थगित भएको थियो । यद्यपी यो समझदारीलाई मूर्तरुप दिने उनीहरूको तयारी छ । कोइराला परिवारले पनि साझा उम्मेदवार टुंगो लगाएपछि पौडेल दबाब छन् । 'सबैलाई समझदारीमा लिएर अघि बढ्नुपर्ने परिस्थिति छ । कोइराला परिवारसँग पनि संवाद गर्नुपर्नेछ,' पौडेलले भने ।

महाधिवेशनको मुखमा आन्तरिक एकता बलियो हुनुपर्नेमा पौडेल पक्षका नेताहरू तीतरवितरको अवस्थामा छन् । एकले अर्ककाको अस्तित्वलाई स्वीकार नगर्ने परिस्थिति देखा परेपछि कार्यकर्ताहरूले आन्तरिक एकतामा असर पर्ने गतिविधि बन्द गर्न नेतृत्वको ध्यानाकर्षण गराएका छन् ।

'हाम्रो समूहमा प्रजातान्त्रिक आचरणविपरीत एकले अर्काको सह-अस्तित्व स्वीकार नगर्ने परिस्थितिले कार्यकर्तामा नकरात्मक असर देखा परेपछि नेताहरूलाई कसैको अवमूल्यन नगर्न हामीले ध्यानाकर्षण गराएका छौँ । नेताहरू सच्चिनुपर्छ,' केन्द्रीय सदस्य घिमिरेले भने ।

सिंहलाई समझदारीमा आउन आग्रह गरेका पौडेलले अब कोइराला परिवारसँग पनि छलफल थाल्ने भएका छन् । आफूलाई दोस्रो तहका नेताहरूले सहयोग नगरेको परिस्थितिमा सम्मानजनक शक्ति बाँडफाँडसहित पौडेलले देउवासँग सहकार्य गर्नसक्ने चर्चा पनि कांग्रेसभित्र चलिरहेको छ ।

नेता श्याम घिमिरे भन्छन्, 'देउवा र पौडेल ५ दशकदेखिका मित्र हुनुहुन्छ । परिस्थितिले उहाँहरूलाई सहकार्यको अवस्थामा ल्यायो भने पनि अनौठो नमाने हुन्छ ।'

प्रकाशित मिति: बिहीबार, मंसिर २, २०७८ २०:२६