गोलाप्रथाको कार्यविधि पारित भएसँगै इजलास तोक्ने प्रधानन्यायाधीशको अधिकार कटौती हुने

गोलाप्रथाको कार्यविधि पारित भएसँगै इजलास तोक्ने प्रधानन्यायाधीशको अधिकार कटौती हुने

A+ A A-

प्रधानन्यायाधीश चोलेन्द्र शमशेर जबरा गोलाप्रथाबाट इजलास तोक्न सहमत भएका छन् । बिहीबार बसेको सर्वोच्च अदालतको फूलकोर्टको बैठकमा उनले प्रधानन्यायाधीशलाई इजलास तोक्ने अधिकार कटौती गर्दै गोलाप्रथामा जान सहमति दिएसँगै त्यससम्बन्धी कार्यविधि पारित भएको छ ।

न्यायालय सुधारका लागि न्यायाधीश हरिकृष्ण कार्कीको संयोजकत्वमा गठित कार्यदलले अदालतमा बेन्च सपिङ हुने भन्दै गोलाप्रथाबाट इजलास तोक्ने व्यवस्था हुनुपर्ने सुझाव दिएको थियो । नेपाल बार एसोसिएसनले पनि प्रधानन्यायाधीश राणाको राजीनामा माग गर्दै जारी राखेको आन्दोलनमा पनि गोलाप्रथाबाट इजलास तोकिनुपर्ने एजेण्डा समावेश छ ।

गोलाप्रथाबाट इजलास तोक्न प्रधानन्यायाधीश जबराले आनाकानी गरेपछि उनी न्यायालयको विकृति हटाउन तयार नभएको आरोप लाग्दै आएको थियो । गोलाप्रथाको कार्यविधि पारित भए पनि राजपत्रमा प्रकाशित भएपछि मात्रै कार्यान्वयनमा आउनेछ । राजपत्रमा प्रकाशित भएपछि फूलकोर्ट बैठकले लागू हुने मिति तय गरेपछि मात्रै यो व्यवस्था कार्यान्वयन हुने एक न्यायाधीशले बताए ।

'गोलाप्रथाको कार्यविधि पारित भयो । राजपत्रमा प्रकाशित भएपछि यो व्यवस्था कार्यान्वयन हुने मिति फूलकोर्ट बैठकले तय गर्ने कार्यविधिमा उल्लेख छ । अर्को बैठकबाट मिति तोकिनेछ,' ती न्यायाधीशले भने ।

यता नेपाल बार एसोसिएसनले भने प्रधानन्यायाधीश जबराले आफूहरूको माग बमोजिम गोलाप्रथा लागू गरे पनि उनको राजीनामा नआएसम्म आन्दोलन नरोकिने बताएको छ । बारका अध्यक्ष चण्डेश्वर श्रेष्ठले भने, 'गोलाप्रथा लागू भए पनि हाम्रो आन्दोलको बटमलाइन प्रधानन्यायाधीश जबराको राजीनामा हो । हामीलाई स्वतन्त्र र सक्षम न्यायपालिका चाहिएको हो । गोलाप्रथा कार्यान्वयनमा आए पनि हाम्रो माग पूरा नभएसम्म र सर्वोच्चमा सुधार नभएसम्म आन्दोलन जारी रहनेछ ।'

आफ्नो आन्दोलनलाई शिथिल बनाएर बहसमा नजाने बारले जनाएको छ । 'गोलाप्रथा त हामीले मागेको कुरा हो । तत्काल आन्दोलनलाई शिथिल बनाएर हामी बहसमा जाँदैनौं,' उनले भने ।

प्रकाशित मिति: बिहीबार, मंसिर २, २०७८ १६:५६