फिजिकल अडिसनको तयारीमा 'डान्स मास्टर लिल चाम्स', हेर्नुहोस् रमाइलो टिजर

A+ A A-

डान्सिङ रियालिटी शो 'डान्स मास्टर लिल चाम्स' फिजिकल अडिसनको तयारीमा लागेको छ । डिजिटल अडिसनबाट छानिएका प्रतिभालाई फिजिकल अडिसनबाट मूल्याङ्कन गर्न लागिएको हो ।

निर्माण पक्षले एक टिजर सार्वजनिक गर्दै फिजिकल अडिसन सुरु हुन लागेको जानकारी दिएको छ । टिजरमा कार्यक्रमका प्रस्तोता सुमन कोइराला र केही बालबालिकाहरू फिचर्ड भएका छन् । जुन निकै रमाइलो छ ।

निर्देशक विशाल भण्डारीका अनुसार पुसको पहिलो सातादेखि फिजिकल अडिसन सुरु हुनेछ । कोहलपुर, बुटवल, पोखरा, इटहरी, आसाम, सिक्किम र काठमाडौंमा फिजिकल अडिसन गरिने विशालले बताए ।

'डान्स मास्टर लिल चाम्स'का लागि केही समयअगाडिदेखि डिजिटल अडिसन खुल्ला गरिएको थियो । निर्देशक भण्डारीका अनुसार डिजिटल अडिसनमा प्रतियोगीहरूको उत्साहजनक उपस्थिति छ । उनले भने, 'निकै राम्रा-राम्रा प्रतियोगीहरूको सहभागिता छ । हामी शोलाई लिएर उत्साहित छौँ ।'

यस शोका लागि निजी विद्यालयहरुको छाता संगठन प्याब्सनले पनि सहकार्य गरेको छ । जसका कारण पनि उल्लेख्य मात्रामा प्रतियोगीहरू सहभागी भएको निर्देशक भण्डारीले प्रस्ट्याए ।

बालबालिकामा केन्द्रित यस शोमा ४ देखि १४ वर्ष उमेर समूहका बालबालिकाले सहभागिता जनाउन पाउनेछन् ।

शोको निर्णायकमा तेरिया फौजा मगर, रोहिया महर्जन, वाइल्ड रिपर्स छन् । सुपर जजको रूपमा अभिनेत्री सारंगा श्रेष्ठ रहनेछिन् । शोको होस्ट सुमन र रीमा विश्वकर्माले गर्नेछन् ।

डान्स मास्टरको उपाधि जित्नेले २५ लाख नगद पुरस्कार पाउनेछन् । त्यस्तै, दोस्रो र तेस्रो हुनेले क्रमश: १५ लाख र १० लाख नगद पुरस्कार हात पार्नेछन् । निर्देशक भण्डारीका अनुसार विजेताले पाउने पुरस्कार आफ्नो कोरियोग्राफरसँग ५० प्रतिशत साझेदारी गर्नुपर्नेछ ।

यस शो इमेज टीभीबाट प्रसारण हुनेछ ।

प्रकाशित मिति: बिहीबार, मंसिर २, २०७८ १५:३९