प्रदेशसभा स्थगित भएपछि मुख्यमन्त्री राईको आक्रोश- सभामुख एमालेको निर्देशनमा चले, यो राम्रो भएन

प्रदेशसभा स्थगित भएपछि मुख्यमन्त्री राईको आक्रोश- सभामुख एमालेको निर्देशनमा चले, यो राम्रो भएन

A+ A A-

प्रदेश १ का मुख्यमन्त्री राजेन्द्र राईले सभामुख प्रदीपकुमार भण्डारी प्रमुख प्रतिपक्षी दल नेकपा (एमाले) को सहयोगी बनेको आरोप लगाएका छन् । मंगलबार कार्यसूचीमा प्रवेश नगरी प्रदेशसभा बैठक स्थगित भएपछि राईले भण्डारी एमालेको निर्देशनमा चल्न खोजेको आरोप लगाएका हुन् ।

प्रदेशसभा भवनबाट बाहिरिँदै गर्दा राईले एमालेकै निर्देशनअनुसार सभामुखले बैठक स्थगित गरेको बताए । ‘प्रदेशसभामा एमालेले सभामुखसमेतलाई जोडेर आफ्नो ४१ सांसद भन्छ । व्यवहारमा पनि आज सभामुखको भूमिकाले ४१ रहेको देखाउनुभयो,’ राईले भने, ‘एमालेको निर्देशनअनुसार उहाँले आजको बैठक स्थगित गर्नुभयो, यो राम्रो कुरा होइन ।’

मुख्यमन्त्रीले विश्वासको मत लिन चाहेबमोजिम प्रदेशसभा बैठक सञ्चालन हुनुपर्ने भए पनि सभामुखले त्यसो नगरेको उनले बताए । ‘विश्वासको मतका लागि मुख्यमन्त्रीले चाहेअनुसार हुनुपर्ने हो । तर, कार्यसूची तयार भए पनि सभामुखले एमालेको निर्देशनमा हठात बैठक स्थगित गर्नुभयो,’ राईले भने ।

बैठक सार्न सही कारण हुनुपर्ने भए पनि एमालेले बिना कारण बैठक स्थगित गर्न माग गरेर दुःख दिएको राईले बताए । ‘बन्दको कुनै प्रभाव परेकै छैन, सबै खुला छ,’ उनले भने, ‘सत्ता पक्षलाई एमालेको दुःख दिने नियत मात्र हो ।’

बैठक स्थगित भए पनि त्यसले परिणाममा फरक नपार्ने उनको भनाइ थियो । ‘एक दिनअघि वा पछि भए पनि यसले यसले परिणाममा केही फरक पार्दैन,’ उनले भने, ‘उपस्थित अनुपस्थितसँग जोडिएको सवाल होइन । प्रमुख प्रतिपक्षी दल अनुपस्थित हुँदा बैठक सार्नुपर्ने संविधानमा प्रावधान छैन ।’

मंगलबारको बैठकमा मुख्यमन्त्री राईले विश्वासको मत लिने कार्यसूची थियो । तर, विप्लव नेतृत्वको नेकपाले गरेको बन्दका कारण आफ्नो दलका सांसद आउन नसकेको भन्दै एमालेले बैठक स्थगित गर्न माग गरेको थियो । मंगलबार साढे १२ बजेका लागि बोलाइएको बैठक साढे २ बजेपछि मात्र सुरु भएको थियो । तर, प्रदेशसभा बैठकमा राष्ट्रगान सकिएलगत्तै सभामुख भण्डारीले कार्यसूचीमा प्रवेश नै नगराई बुधबार साढे ११ बजेसम्मका लागि स्थगित भएको घोषणा गरे ।

पाँच दलीय गठबन्धनको तर्फबाट १६ कात्तिकमा राई मुख्यमन्त्री बनेका हुन् । संविधानबमोजिम मुख्यमन्त्री बनेको ३० दिनभित्र प्रदेशसभाबाट विश्वासको मत लिनुपर्छ । सोही प्रावधान बमोजिम राईले विश्वासको मत लिन लागेका हुन् ।

प्रदेशसभामा सत्ता गठबन्धनसँग स्पष्ट बहुमत छ । गठबन्धनमा आवद्ध नेपाली कांग्रेसको २१, माओवादी केन्द्रको १५, एकीकृत समाजवादीको १०, जनता समाजवादीको तीन र संयुक्त लाकतान्त्रिक राष्ट्रिय मञ्चको एक गरी कुल ५० सिट छ । बुहुमत सिद्ध गर्न ४७ मत आवश्यक पर्छ ।

प्रकाशित मिति: मंगलबार, कात्तिक ३०, २०७८ १६:१०