एमालेमा सर्वसम्मत प्रतिनिधि चयन अल्पमत पक्षका लागि बाध्यता, अधिकांश जिल्लामा टाँसिए सूची

एमालेमा सर्वसम्मत प्रतिनिधि चयन अल्पमत पक्षका लागि बाध्यता, अधिकांश जिल्लामा टाँसिए सूची

A+ A A-

प्रतिपक्षी दल एमालेको अघिल्लो महाधिवेशनमा प्रतिनिधि चयन हुँदा बिरलै स्थानमा मात्र सर्वसम्मत भए । जिल्ला तहबाटै दुई प्यानल चर्को प्रतिस्पर्धा गरेर नवौँ महाधिवेशनका लागि भृकुटीमण्डप पुगेका थिए । नेतृत्व चयनमा वडादेखि केन्द्रीय तहसम्म निर्वाचनको अभ्यास गरेको एमालेमा सात वर्षपछि भने भिन्न दृश्य देखिएको छ ।

सोमबारसम्म ६३ जिल्ला र गैरभौगोलिक क्षेत्रबाट महाधिवेशन प्रतिनिधि छानिइसक्दा अध्यक्ष केपी ओलीको गृहजिल्ला झापा-३, कञ्चनपुर-३ लगायतका केही निर्वाचन क्षेत्रबाहेक अन्यत्र सर्वसम्मत प्रतिनिधि चयन भएका छन् । धेरै जिल्लामा कार्यदल बनाएर छनोट गरिएको सूची निर्वाचन समितिले टाँसेको पाइएको छ ।

पार्टीमा कमजोर स्थितिमा रहेका पूर्वमाधव नेपाल समूहले न्यायोचित ढंगले सर्वसम्मत नभएको भन्दै केही स्थानमा असन्तुष्टि पोखेको छ । गत महाधिवेशनमा अध्यक्ष ओलीको प्रतिस्पर्धी माधव नेपाल प्यानलको ठूलो हिस्सा नेकपा एकीकृत समाजवादी गठन गरेर बाहिरिएपछि एमालेमा सो समूह कमजोर अवस्थामा छ । माओवादी केन्द्रसँगको पार्टी एकतापछि एमालेमै पूर्वमाओवादी समूहबाट पनि प्रतिस्पर्धा गरेर प्रतिनिधि आउन सक्ने स्थिति थिएन ।

पार्टीभित्रका दुई कमजोर समूहलाई समेटेर विभाजनको क्षति कम गर्ने दायित्व संस्थापन पक्षको थियो । तर, त्यसो हुन नसकेको भन्दै १०बुँदे सहमति गरेर एमालेमा रोकिएका नेताहरूको गुनासो छ । सर्वसम्मत प्रतिनिधि चयनमा पार्टी सत्ताको दुरुपयोग गरिएको केन्द्रीय सदस्य एवं सांसद झपट रावलले आरोप लगाएका छन् । कैलालीमा प्रतिनिधि छनोटबाट असन्तुष्ट रावलले सामाजिक सञ्जालमै असन्तुष्टि पोखे, ‘नेकपा एमाले कैलालीमा अधिवेशन र महाधिवेशन प्रतिनिधि छनोटमा पार्टी सत्ताको घिनलाग्दो दुरुपयोग कार्यकर्ताको चुन्ने चुनिने सार्वभौम अधिकारको चिरहरण जबजको उपहास ।’

तनहुँ क्षेत्र नम्बर १ मा प्रतिनिधि चयनमा पनि असन्तुष्टि देखिएको छ । त्यहाँ दुई महिलासहित १५ जना आकांक्षी मैदानमा थिए । उनीहरूमध्येबाट पाँच प्रतिनिधि छान्न सहमतिमै कार्यदल बनाइयो । उम्मेदवारले निर्णयको सम्पूर्ण अधिकार कार्यदललाई दिएका थिए । संयोजक बनाइए, केन्द्रीय सदस्य एकबहादुर राना ।

राना नेतृत्वको कार्यदलले पाँच जना छनोट गरी निर्वाचन समितिलाई बुझायो । निर्वाचन समितिले प्रकाशित गरेको नामावलीमा प्रबल दावेदार तनहुँ १ (क) का प्रदेश सांसद रामबहादुर गुरुङ अटाएनन् । त्यसले तनहुँ एमालेमा विवाद उत्पन्न भएको छ । गुरुङले कार्यदलले सहमतिका नाममा आफूमाथि अन्याय गरेको भन्दै असन्तुष्टि पोखे ।

‘म केन्द्रीय सदस्यको तयारीमा थिएँ । प्रतिनिधिमै आउन दिइएन,’ उनले भने, ‘केन्द्रीय सदस्य रानाले आफूलाई सजिलो होस् भनेर मलाई पन्छाए ।’ उनको असन्तुष्टि कुन तहमा छ भने पार्टीमा अन्याय भएको भन्दै आफूनिकट कार्यकर्तासहित एकीकृत समाजवादीमा जान खोजेको भन्दै नेतृत्वलाई घुर्क्याएका छन् ।

सुर्खेतमा पूर्वसांसद कमला शर्मा छनोट नभएपछि असन्तुष्टि पोखेकी छिन् । खुलातर्फ उम्मेदवारी दिएकी शर्मालाई हटाएर उनका देवर दण्डीप्रसाद शर्मालाई छानिएपछि उनले सामाजिक सञ्जालमा आक्रोश पोखेकी छिन्, ‘यतिले पनि पुगेको छैन भने कृपया भनिदिनुहोला, दिएको भनेको जिम्मेवारीबाट पनि बाहिर बसिदिन तयार छु । तपाईंले बनाएको नेता बन्नु पनि छैन ।’

एमाले सुर्खेत अध्यक्ष ध्रुबबहादुर शाही र कर्णाली प्रदेश सहइञ्चार्ज यमलाल कँडेललाई मेन्सन गर्दै उनले भनेकी छिन्, ‘हिम्मत भए कार्यकर्ताको बीचमा आउनुहोला ।’ एमाले केन्द्रीय कार्यालय सचिव शेरबहादुर तामाङ भने देशैभर सर्वसम्मत महाधिवेशन प्रतिनिधि चयन गरेर एमाले पङ्तीमा नयाँ उर्जा उत्पन्न भएको बताउँछन् ।

‘शतप्रतिशत भन्ने कहीँ हुँदैन । अहिले जे जसरी सर्वसम्मत भएको छ उन्नतस्तरमा भएको छ,’ एमाले कार्यालय सचिव शेरबहादुर तामाङ भन्छन्, ‘केही निर्वाचन क्षेत्रमा चुनाव भएको छ, त्यसलाई विवाद बुझ्न भएन । सर्वसम्मत वा निर्वाचन जे भए पनि लोकतान्त्रिक विधिबाट प्रतिनिधि आएका छन् ।’

उपाध्यक्ष अष्टलक्ष्मी शाक्य विभाजनले पार्टी संकटमा रहेकाले चुनावी प्रतिस्पर्धाबाट प्रतिनिधि छान्दा योग्य, इमान्दार र लामो योगदान भएका नेताहरू छुट्न सक्ने स्थितिमा सर्वसम्मतिको बाटो उपयुक्त भएको बताउँछिन् । तर, सबैलाई समेट्ने चुनौती नेतृत्वले ख्याल गर्नुपर्ने उनको भनाइ छ ।

‘अधिकांश ठाउँमा राम्रैसँग सर्वसम्मत भएको पाएकी छु,’ उनले भनिन्, ‘१०बुँदे सहमति गरेर एकताको पक्षमा उभिएका हामी, पूर्वमाओवादी कमरेडहरू सबैलाई समेट्नुपर्ने अवस्था छ । यति ठूलो पार्टीमा गुनासो त रहिरहन्छ ।’ अध्यक्ष ओलीले सबै पक्षलाई मिलाएर प्रतिनिधि छान्न निर्देशन दिएको उनले बताइन् । एमाले केन्द्रीय कार्यालयले मंगलबारसम्म सबै जिल्लाबाट प्रतिनिधि चयन भइसक्ने जनाएको छ ।

प्रकाशित मिति: सोमबार, कात्तिक २९, २०७८ २२:३०