‘बम्बो’मा भुलेका रोबिन

रोबिन थापा ।

A+ A A-

पहाडको बीचमा आधा दर्जन जति होटल छन् । निलो रंगका छानो छाएका ती होटलमा तिहार सकिएसँगै पर्यटकको चहलपहल निकै कम छ ।

नजिकैबाट अन्नपूर्ण, माछापुच्छ्रे, हिउँचुलीलगायत हिमाल हेर्न कास्कीको अन्नपूर्ण आधार शिविर पदमार्ग उक्लने पर्यटकलाई सेवा दिन पदमार्गको स्पोट ‘बम्बो’मा ६ होटल छन् । तीमध्ये पछिल्लोपटक खुलेको होटल हो, ‘इको फ्रेन्ड्ली लज’ ।

घुमन्ते विदेशीले ‘बम्बो’ नाम राख्देको ठाउँमा विदेश जान अथक प्रयाक गरेका रोबिन थापा व्यस्त भेटिन्छन् । बेलायत, अमेरिका जान प्रयास गरेका ३२ वर्षीय उनी जंगल माझको ‘इको फ्रेन्ड्ली लज’ मा पाहुनाको सेवामा भुलेका छन् । अन्नपूर्ण गाउँपालिका- ११, छोम्रोङका सबैजसो स्थानीय पदमार्गमा व्यवसायरत छन् । तीन वर्षअघि रोबिन पनि अरू गाउँलेजस्तै व्यवसायी बन्न बम्बो (२५०० मिटर) उक्लिएका हुन् ।

विदेश जाने प्रयास गर्दागर्दै उनले १० वर्ष नेपालमै बिताए । उनले एकपछि अर्को गर्दै आधा दर्जन देशमा प्रयास गरिरहे । तर, भाग्यले साथ दिएन । ‘बेलायत र कोरियामा भएन । यहाँ काम नभएपछि दुबई जान प्रयास गरेँ,’ हण्डर खाएपछि नेपालमै भुलेका रोबिन थप्छन्, ‘अमेरिका पनि भएन । गाउँपालिकाले पदमार्गको सबै स्पटमा एउटा-एउटा होटल खोल्न अनुमति दिने भएपछि यही व्यवसाय थालेँ ।’

पोखराको पश्चिमाञ्चल माविबाट प्रमाणपत्र तह (प्लस टु) सकेपछि उनी विदेश जाने तयारीमा जुटेका थिए । यो २०६३ सालतिरको कुरा हो । सुरुमा बेलायतमा विद्यार्थी भिसामा जाने प्रक्रिया सुरू गरे । बेलायतमा काम नपाउने समस्या बढी हुने देखेपछि उनका पाइला रोकिए । कोरिया जाने प्रयास गरे । त्यहाँ पनि सफल भएनन् । त्यसपछि उनी खाडी मुलुक जाने योजनामा रूम्मलिए ।

तर, १० वर्षसम्म केही सिप लागेन । पछि अन्नपूर्ण गाउँपालिकाले स्थानीयलाई पदमार्गका हरेक स्पोटमा होटल खोल्न अनुमति दियो । २०७६ साल साउनतिर रोबिनले होटल निर्माण सुरु गरे । सात महिनामा निर्माण सकियो । तर, कोरोना भाइरसले उनको व्यवसायलाई नराम्रोसँग सतायो । ‘फागुनमा सुरू गरेको थिएँ । १५-२० दिनपछि लकडाउन भयो । त्यसपछि अहिले बल्ल खुलेर मान्छेको चहलपहल भयो,’ रोबिनले सुनाए ।

रोबिनले बम्बोमा खोलेको ‘इको फ्रेन्ड्ली लज’ ।

पोखरा कलेज अफ म्यानेजमेन्टमा ब्याचलर पढ्दापढ्दै छोडेका रोबिन जंगलको बीचमा होटलको व्यवस्थापनमा सक्रिय छन् । बेलायतमा विद्यार्थी भिसामा जान प्रयास गरेका रोबिन अमेरिका, कोरिया, जापान कामकै लागि जान प्रयासरत थिए । चीनको विशेष प्रशासनिक क्षेत्र मकाउ जाने सपना पनि थियो । दलालीको फन्दामा परेपछि भने त्यहाँ जाने ढोका पनि बन्द भयो । यो ६ वर्षअघिको घटना हो ।

‘सिधै नेपालबाट जान नपाउने रहेछ । भारतबाट जानुपर्ने रहेछ । भारतीय दलालीको फन्दामा परेँ,’ रोबिनले थपे, ‘तीन लाख रुपैयाँ बुझाएको थिएँ । रिटर्न गर्‍यो ।’ विदेश जान आफूले २० लाख रुपैयाँभन्दा बढी खर्च गरेको रोबिन सुनाउँछन् ।

रोबिनले एक करोड रुपैयाँ हाराहारी लगानी गरेर बम्बोमा आठ कोठाको होटल बनाएका हुन् । त्यहाँ ४० जनासम्म पाहुना राख्न सकिने उनले सुनाए । अन्नपूर्ण आधार शिविर पदमार्ग खोलाको खोँचमा छ । पदमार्गका रुटमध्ये बम्बो पहाडको बीचमा गहिरो ठाउँमा छ । त्यसैले इन्टरनेट र फोन टावर राम्रोसँग चल्दैन ।

पदमार्गका होटल व्यवसायीका पनि आफ्नै दुःख छन् । निर्माण सामग्रीको मूल्य पोखरामा भन्दा तेब्बरसम्म पर्छ । तीन वर्षअघि खच्चडमा हालेर, मान्छेले बोकेर रोबिनले बम्बोमा निर्माण सामग्री पुर्‍याएका थिए । मत्क्युबाट बोकेर सामान बम्बो पुर्‍याउन एकदिन लाग्छ । ‘पोखरामा सात-आठ सय रुपैयाँमा पाइने सिमेन्ट यहाँ आउँदा तीन हजार रुपैयाँ हुन्छ । यहाँसम्म ठीकै हो । जति माथि लगिन्छ उति नै महँगो पर्छ,’ रोबिनले ढुवानीको बाध्यता सुनाए ।

दुई वर्ष उनीसहितका व्यवसायी पर्यटकको बाटो हेर्दै बसिरहे । पदमार्गमा आन्तरिक पर्यटकको चहलपहलले रोबिन भान्छामा व्यस्त भेटिन्छन् । ‘अहिले दसैंतिहारका बेला आन्तरिक पर्यटकको राम्रै चहलपहल भयो । विदेशी एकदम थोरै हुनुहुन्छ,’ रोबिन थप्छन्, ‘यो व्यवसाय पुस्तासम्म जाने कुरा हो । म अहिले सन्तुष्ट छु । विदेश जान पाइनँ भनेर पछुतो छैन ।’

अहिले पदमार्गमा पर्यटकको चहलपहलल व्यापक हुने सिजन भए पनि कोरोना महामारीले पर्यटक कम छन् । नभए त्यहाँ होटलमा अग्रिम बुकिङ नगरी बस्ने ठाउँ पाइँदैन । रोबिनसहित पदमार्गका व्यवसायीले डाइनिङको भुइँमा पर्यटकलाई सुत्ने व्यवस्था गर्नुपर्थ्यो । अफसिजन भएकाले अबको चार महिना अन्नपूर्ण आधार शिविरमा एकाधबाहेक खासै पर्यटक हुँदैनन् ।

अफसिजनमा बम्बो, दोभान, हिमालय, देउरालीसहित माछापुच्छ्रे र अन्नपूर्ण आधार शिविरका प्राय व्यवसायी घर फर्किन्छन् । रोबिन बाँसको निगालोले ढाकिएको कर्मथलोमै बस्ने छन् । ‘अहिले सुनसानजस्तै छ । विस्तारै अफसिजन सुरु हुँदैछ,’ अफसिजनमा पनि बम्बोमै बस्ने योजनामा रहेका रोबिनले थपे, ‘कोही आउँछ भनेर कुरेर बस्ने हो । कहिले मान्छे हुन्छ भन्ने नै थाहा हुँदैन ।’

प्रकाशित मिति: मंगलबार, कात्तिक ३०, २०७८ ११:३५