आन्दाेलनमा उत्रेकाे बारलाई संवादमा आउन प्रधानन्यायाधीशकाे आह्वान (विज्ञप्तिसहित)

आन्दाेलनमा उत्रेकाे बारलाई संवादमा आउन प्रधानन्यायाधीशकाे आह्वान (विज्ञप्तिसहित)

A+ A A-

प्रधानन्यायाधीश चोलेन्द्रशमशेर राणाले आन्दाेलनमा उत्रेकाे नेपाल बार एसाेसिएसनसहित सराेकारवालालाई संवादमा आउन आह्वान गरेका छन् । उनले विग्रहको बाटो छोडेर संवादको मार्ग रोज्न आह्वान गरेका हुन् ।

आज एक विज्ञप्ति जारी गर्दै उनले पारस्परिकता र हार्दिकताको क्रम जहाँबाट टुटेको छ, त्यहीँबाट समाधानको सम्भावना खोज्न सकिने बताए । विधिको पक्षमा कर्तव्य निर्वाह गर्ने सिलसिलामा यदाकदा प्रश्नहरू उठ्दा त्यसलाई तत्काल सम्बोधन गर्दै बार एसोसिएसन र न्यायपालिकाबीच हातेमालो हुने गरेको पनि राणाले स्मरण गरे ।

‘पारस्परिकता र हार्दिकताको त्याे क्रम जहाँबाट टुटेको छ, त्यहिँबाट समाधानको सम्भावना खोज्न सकिन्छ । विधिको पक्षमा दृढतापूर्वक उभिँदै न्यायपालिकाको एकै परिवारभित्र देखिएका समस्याको हल गर्न विग्रहको बाटो छोडी संवादको मार्ग रोजौँ भनी पुनः सबैमा हार्दिक आह्वान गर्दछु’, राणाले भने ।

उनले विगतमा विधिभन्दा बाहिरबाट न्यायपालिकालाई हिँडाउने प्रयासहरू कतैबाट हुँदा सम्पूर्ण न्यापालिका एकताबद्ध भएर सामना गर्दै आएको स्मरण गराए ।

‘न्यायपालिकाले सधैँभरि विधिको बाटो मात्र हिँड्नुपर्छ भन्ने मान्यतालाई आत्मसात् गरेको हुन्छ । विधिभन्दा बाहिरबाट न्यायपालिकालाई हिँडाउने प्रयासहरू कहीँ कतैबाट हुँदा सम्पूर्ण न्यायपालिका एकताबद्ध भई आवश्यक आत्मावलोकनसहित सामना गर्दै आएको छ’, उनले भनेका छन् ।

उनले नेपाल बार एसोसिएसनको तर्फबाट सर्वोच्च अदालत परिसरमा आयोजित धर्ना कार्यक्रममा भएको प्रहरी हस्तक्षेपको घटनाप्रति पनि दुःख व्यक्त गरे । न्यायपालिका प्रमुखका हैसियतबाट यस्ता प्रकारका गतिविधिहरू आगामी दिनमा दोहोरिन नदिने प्रतिबद्धता पनि उनले व्यक्त गरे ।