प्रधानन्यायाधीश विवादबारे निर्णय लिन देउवालाई दबाब, एजेण्डा बनाउन गरे अस्वीकार

प्रधानन्यायाधीश विवादबारे निर्णय लिन देउवालाई दबाब, एजेण्डा बनाउन गरे अस्वीकार

फाइल तस्वीर ।

A+ A A-

प्रधानमन्त्री समेत रहेका कांग्रेस सभापति शेरबहादुर देउवालाई प्रधानन्यायाधीश चोलेन्द्र शमशेर जबराको विवादपछि उत्पन्न परिस्थिति साम्य पार्न सरकार सक्रिय हुने बेला आएको भन्दै कानुनमन्त्री दिलेन्द्र प्रसाद बडूले जानकारी गराइसकेका छन् । यो विषयमा केन्द्रीय समिति बैठकको एजेण्डा बनाउने निर्णय वरिष्ठ नेता रामचन्द्र पौडेल समूहले शुक्रबार नै गरिसकेको थियो ।

यो विवाद उत्पन्न हुनुमा देउवासमेत दोषी छन् । उनले प्रधानन्यायाधीशका जेठान गजेन्द्र हमाललाई मन्त्री बनाएपछि शक्तिपृथकीकरणको सिद्धान्तविपरीत कार्यपालिकामा न्यायपालिकाले भाग खोजेको भन्दै जबराले राजीनामा दिनुपर्ने माग चर्किएको हो ।

आइतबारको केन्द्रीय समितिको बैठकमा देउवाले प्रधानन्यायाधीश जबराको विवादको विषयलाई एजेण्डा बनाउन अस्वीकार गरे । शुक्रबारको निर्णयअनुसार यस विषयमा केन्द्रीय सदस्य गगन थापाले कुरा उप्काए । 'म समसामयिक विषयमा बोल्न चाहन्छु, अदालतमा समस्या छ ।' थापाले यति मात्रै के उच्चारण गरेका थिए देउवाले उनलाई रोक्ने प्रयास गर्दै भने, 'अहिले समयसामयिक विषयमा बोल्ने होइन ।'

सभापतिको संकेतका बाबजुद थापा भने रोकिएनन् । उनले प्रधानन्यायाधीश प्रकरणका कारण अदालतमा न्याय प्रभावित हुँदा जनतालाई मर्का परेकाले कांग्रेस मूकदर्शक बन्न नमिल्ने बताए । अदालतको विवाद निरुपणका लागि पार्टीले निर्णय लिनुपर्ने र सरकार प्रमुखको हैसियतमा उचित निकासका लागि सभापति देउवाले प्रतिपक्षी दलसहित गठबन्धनभित्र परमार्श गर्नुपर्ने माग थापाले उठाए ।

प्रधानन्यायाधीश जबराको विवादलाई कांग्रेस केन्द्रीय समिति बैठकको एजेण्डा बनाउन नमानेका देउवालाई यो विवाद निरुपणमा भूमिका निर्वाहका लागि नेताहरूले बैठकमा दबाब दिएका छन् । नेताहरूले क्रियाशील सदस्य विवाद समाधान र महाधिवेशनका विषयमा पनि गम्भीर बन्न देउवाको ध्यानाकर्षण गराए ।

वरिष्ठ नेता रामचन्द्र पौडेल, नेता गगन थापालगायतले देउवालाई यो विषयसहित पार्टीका आन्तरिक समस्या समाधानमा गम्भीर हुन ध्यानाकर्षण गराएका हुन् । 'सर्वोच्च अदालत गत ८ गतेदेखि नै विवादमा फस्दा जनताको न्याय पाउने अधिकार बन्धक भएको छ, जनअधिकारका लागि बनेको पार्टीले यसबाट भागेर हुँदैन,' थापाले भने, 'सर्वोच्चको विवादका विषयमा पार्टीले निर्णय लिनुपर्छ । सत्तारुढ र प्रतिपक्षी दलसँग पनि छलफल थाल्नुपर्छ ।'

कांग्रेसले निर्णय नलिए जनताप्रति पार्टीको छवी धुमिल हुने थापाको भनाइ थियो । 'सम्मानित अदालतमा भइरहेको समस्या चर्कियो भने व्यवस्थाले मूल्य चुकाउनु पर्छ । तत्काल सामाधान नगर्ने हो भने महाधिवेशनसम्म अवस्था विथोलिन्छ । हामी चुप लाग्न मिल्दैन,' थापाले भने ।

बैठकमा कांग्रेस नेता प्रकाशमान सिंहले पनि न्यायालय विवादमा कांग्रेस धेरै मौन बस्न नहुने धारणा राखे । 'यो विवादमा अब हामी धेरै मौन बस्नु हुँदैन । हाम्रो धारणा के हो ? स्पष्ट आउनुपर्छ,' सिंहले बैठकमा भनेका थिए ।

बैठकमा सहभागी देउवानिकट नेता एनपी साउदले न्यायालयको विवाद न्यायपालिकाभित्रैबाट समाधान हुनुपर्ने कांग्रेसको संस्थागत मान्यता रहेको बताए । 'अदालतको विषयमा आज कुनै पनि निर्णय भएन । यो विषय अदालतभित्रैबाट समाधान हुनुपर्छ भन्ने कांग्रेसको संस्थागत मान्यता हो,' साउदले भने ।

त्यसअघि बोल्दै वरिष्ठ नेता पौडेलले राष्ट्रिय समस्या तथा पार्टीका आन्तरिक समस्या समाधान गर्न देउवा गम्भीर नभएको भन्दै आक्रोश व्यक्त गरेका थिए । देउवा सबै समस्याबाट भाग्न खोजेको उनको आरोप थियो । 'सुतुरमुर्ग शैलीमा मुन्टो लुकाएर कति दिन हिँड्‍ने ?' पौडेलको प्रश्न थियो ।

उनले क्रियाशील सदस्यता विवाद समाधानमा सभापति गम्भीर हुनुपर्ने भन्दै ध्यानाकर्षण गराए । 'रौतहटका साथीहरू चिसो छिँडीमा छन् । हामी पार्टी कार्यालयमा बैठक गर्न नसकेर भागेर बूढानीलकण्ठमा बस्नुपरेको छ । तपाईंको जिल्लाका साथीहरू पनि १ गतेबाट अनसन बस्ने भनेका छन् । त्यहाँ एकथरीको नाम काटिएको छ । त्यो हामीले सम्बोधन गर्ने कि नगर्ने ? समस्या नबुझेर मुन्टो बटारेर पार्टी बलियो हुन्छ ? कहिलेसम्म भाग्ने हामी ?' पौडेलको प्रश्न थियो ।

क्रियाशील सदस्यताबारे प्राप्त उजुरीमा नेतृत्वले गम्भीरतापूर्वक छानबिन गर्नुपर्ने माग नेता रामशरण महतले पनि उठाएका छन् ।

कांग्रेसले पनि विधान महाधिवेशन गर्ने

कांग्रेसको १४औँ महाधिवेशन नेतृत्व चयनमा मात्रै केन्द्रित हुने भएको छ । यसअघिका महाधिवेशनमा विधान शंसोधन प्रस्ताव पेस हुने भए पनि यो पटक भने नेतृत्व मात्रै चयन गरिने र नीतिका लागि विधान महाधिवेशन गर्ने सहमति पदाधिकारी बैठकमा भएको हो ।

'आसन्न महाधिवेशनलाई नेतृत्व चयनमा केन्द्रित गर्दै पार्टीको नीति तयका लागि विधान महाधिवेशन गर्ने सहमति भएको छ,' प्रवक्ता विश्वप्रकाश शर्माले भने ।

कांग्रेसले १६ मंसिरदेखि १७ मंसिरसम्म तय गरिएको प्रदेश अधिवेशनका लागि स्थान पनि निर्धारण गरेको छ । केन्द्रीय समितिले लुम्बिनीबाहेक अन्य प्रदेशका अधिवेशन प्रादेशिक राजधानीमै गर्ने निर्णय गरेको छ । जसअनुसार प्रदेश–१ को विराटनगर, प्रदेश–२ को जनकपुर, बागमती प्रदेशको हेटौँडा, गण्डकीको पोखरा, कर्णालीको सुर्खेत तथा सुदूरपश्चिम प्रदेशको कैलालीमा हुनेछ ।

लुम्बिनी प्रदेशको महाधिवेशन बुटवलमा गरिने प्रवक्ता शर्माले बताए । केन्द्रीय समितिले प्रदेश महाधिवेशन आयोजक समितिको संयोजक पनि तोकेको छ । जसअनुसार प्रदेश १ मा कृष्णप्रसाद सिटौला, प्रदेश–२ मा रमेश रिजाल, बागमतीमा प्रकाशमान सिंह तोकिएका छन् । यस्तै गण्डकी प्रदेशमा गोपालमान श्रेष्ठ, लुम्बिनीमा बालकृष्ण खाँण, कर्णलीमा जीवनबहादुर शाही र सुदूरपश्चिममा दिलेन्द्रप्रसाद बडु प्रदेश महाधिवेशन आयोजक समितिको संयोजक भएका छन् । बैठकले आवास तथा भोजन व्यवस्थापन समितिको संयोजकमा नेता सुरेन्द्र पाण्डेलाई तोकेको छ ।

प्रकाशित मिति: आइतबार, कात्तिक २८, २०७८ २०:०१