'सत्यम'बाट बाहिरिइन् मलिका, पलसँग जोडी बाँध्दै उपासना

A+ A A-

फिल्म 'सत्यम'बाट अभिनेत्री मलिका महत बाहिरिएकी छिन् । वर्कसपमा समेत सहभागी भएकी मलिकाले पढाइका कारण फिल्‍म छोडेको बताएकी छन् ।

निर्माता रेशम सापकोटाले पनि पढाइकै कारण मलिका बाहिरिएको प्रस्ट्याए । उनले भने, 'उहाँ बीबीए अध्ययन गर्दै हुनुहुन्छ । फिल्मको वर्कसपको बेला पढाइ अनलाइनमा हुने भन्ने थियो तर सोचेभन्दा अगाडि नै कलेज सुरु भएपछि उहाँले समय दिन सक्नुभएन । अन्य कारण केही छैन ।’

मलिकाले फिल्म छोडेलगत्तै निर्माणपक्षले अर्की अभिनेत्री उपासना सिंह ठकुरीलाई अनुबन्धित गरेको छ । अब फिल्ममा अभिनेता पल शाहको जोडीका रूपमा उपासना देखिनेछिन् ।

निर्देशक शंकर कार्कीका अनुसार ‘सत्यम’का लागि पहिले उपासनालाई नै अफर गरिएको थियो । छायांकन मिति नमिलेका कारण उपासनाले फिल्ममा काम गर्न सकेकी थिइनन् । उपासनालाई फिल्ममा अनुबन्धित गर्न पाउँदा खुसी लागेको निर्देशक कार्कीले बताए ।

फिल्ममा राजेश हमालको मुख्य भूमिका रहनेछ । त्यससँगै अनुपविक्रम शाही र अभय बरालले पनि महत्त्वपूर्ण भूमिका निर्वाह गर्नेछन् ।

कृष्ण जोशी, मिलन सिँजापति, मोक्तर खान, कैलाश रावल, नेरिस्का स्थापित, प्रिन्स प्रसिद्ध सिंह, प्रविन चापागाईं, अन्विशा खड्कीलगायतलाई पनि फिल्ममा देख्न पाइनेछ ।

'नवयुग सिनेमा'को प्रस्तुतिमा बन्ने ‘सत्यम’ लाई रेशम सापकोटाले लेखेका हुन् । गणेश पौडेल एसोसिएट निर्माता रहेको चलचित्रका सह-निर्माताहरूमा श्याम मल्ल र कृष्ण जोशी छन् । त्यस्तै, लाइन प्रोड्युसरमा रेशम गौतम, सुवास भुर्तेल र कृष्ण अधिकारी छन् ।

शंकर धिताल र रामशरण कोइराला मुख्य सहायक निर्देशक रहने फिल्ममा एसोसिएट निर्देशक सुवास सुवेदी, सह-निर्देशक रामकुमार श्रेष्ठ रहनेछन् भने रामजी लामिछानेले कोरियोग्राफी गर्नेछन् । द्वन्द्व निर्देशनको काम अष्टमान महर्जनले गर्नेछन् । फिल्मको एक्सन सिन खिच्न निर्माण टिमले पोखरामा भव्य सेट निर्माण गरेको छ । राजेश श्रेष्ठ फिल्मका डीओपी हुन् ।

प्रकाशित मिति: आइतबार, कात्तिक २८, २०७८ १९:०६