एमाले महाधिवेशनः सहमति नभएपछि ताप्लेजुङमा प्रतिनिधि छान्न प्यानलै बनाएर प्रतिस्पर्धा

एमाले महाधिवेशनः सहमति नभएपछि ताप्लेजुङमा प्रतिनिधि छान्न प्यानलै बनाएर प्रतिस्पर्धा

A+ A A-

नेकपा (एमाले) को १०औँ राष्ट्रिय महाधिवेशन अन्तर्गत ताप्लेजुङबाट चुनावमार्फत प्रतिनिधि चयन हुने भएका छन् । सहमतिमा प्रतिनिधि छनोट गर्न गरिएका प्रयास असफल भएपछि प्रतिनिधि चयनका लागि निर्वाचन हुने भएको हो ।

यससँगै अब मंगलबार मात्र ताप्लेजुङका प्रतिनिधिको टुंगो लाग्नेछ । एमाले सचिव तथा प्रचार विभाग प्रमुख योगेश भट्टराईको गृहजिल्ला ताप्लेजुङबाट संगठित सदस्यका आधारमा १३ जना प्रतिनिधि छानिने छन् ।

केन्द्रीय नेताहरूले सर्वसम्मत रूपमा प्रतिनिधि चयनको प्रयास गरेका थिए । तर, प्यानलै बनाएर एमाले संस्थापन र १० बुँदे सहमतिका पक्षधरहरू चुनावी मैदानमा होमिएका छन् ।

पार्टी विभाजन अघिसम्म तत्कालीन वरिष्ठ नेता माधव नेपाल समूहमा रहेर १० बुँदे सहमतिपश्चात एमालेमै बसेका जिल्ला संयोजक बलबहादुर साम्सोहाङ र सह–संयोजक भूपेन्द्र थेवे प्यानलै बनाएर मैदानमा होमिएका हुन् ।

स्रोतका अनुसार प्रदेशसभा सदस्य तथा प्रदेश १ का पूर्वसामाजिक विकासमन्त्री साम्सोहाङको प्यानलनलाई एमाले सचिव योगेश भट्टराईले साथ दिएका छन् ।

८ खुला, चार महिला र एक दलित गरी १३ जना महाधिवेशन प्रतिनिधिका लागि दुवै प्यानलबाट २३ जनाको उम्मेदवारी परेको निर्वाचन समितिले जनाएको छ ।

साम्सोहाङको प्यानलबाट खुला तर्फ उनीसहित डम्मरध्वज तुम्बाहाम्फे, धनेन्द्र मादेन, सन्तोष खतिवडा, मणिशंकर पोमु, राजेश प्याकुरेल, दिवस चोङ्वाङ्ग र मंगलसिंह केदेम, दलित निर्वाचन क्षेत्रतर्फ छत्र विकको उम्मेदवारी परेको छ । महिलातर्फ चार जना भए पनि साम्सोहाङ प्यानलबाट एक जना निर्मला इजमको मात्र उम्मेदवारी परेको जनाइएको छ ।

त्यस्तै जिल्ला सह–संयोजक भूपेन्द्र थेवेको प्यानलबाट खुला तर्फ थेवेसहित छत्रपति प्याकुरेल, गोपाल थोप्रा, सिंहबहादुर ईवंरम, ओङ्दी शेर्पा, दिपेन्द्र पोमु, चन्द्रबहादुर मेन्याङ्बो, आशलाल लिम्बु, दलित निर्वाचन क्षेत्रतर्फ मनकुमार नेपाली, महिला तर्फ उर्मिला थेवे, भीमादेवी ओझा, मिनाकुमारी केदेम र टिकादेवी दाहालको उम्मेदवारी परेको छ ।

२७ कात्तिक (शनिबार) सम्म सर्वसम्मतिको प्रयास गरिए पनि सहमति नजुटेपछि दुवै पक्ष प्यानलै बनाएर मैदानमा होमिएका हुन् । थेवेको प्यानलबाट दलित निर्वाचन क्षेत्रतर्फ उम्मेदवारी दिएका मनकुमार नेपालीले सहमतिको प्रयास विफल भएकाले चुनावमा जानुपरेको बताए ।

प्रकाशित मिति: आइतबार, कात्तिक २८, २०७८ १७:३४