एमाले महाधिवेशनः ओलीको गृहजिल्लाबाट छानिए प्रतिनिधि, कतै सहमति कतै निर्वाचन

एमाले महाधिवेशनः ओलीको गृहजिल्लाबाट छानिए प्रतिनिधि, कतै सहमति कतै निर्वाचन

A+ A A-

नेकपा (एमाले) को १०औँ महाधिवेशनका लागि झापाबाट प्रतिनिधि चयनको काम सकिएको छ । सहमतिमै प्रतिनिधि छनोट गर्न कसरत गरे पनि सबै क्षेत्रमा सहमति जुट्न सकेन । सहमति नजुटेको ठाउँमा चुनावी प्रक्रियाबाट प्रतिनिधि छानिएको एमाले झापाका सचिव मदन अधिकारीले जानकारी दिए ।

झापाका ५ निर्वाचन क्षेत्रमध्ये ३ वटा (१, २ र ५) मा सहमति जुटेको थियो भने क्षेत्र नं. ३ र ४ मा निर्वाचनबाट प्रतिनिधि छानिएका हुन् । यसबाहेक एमाले झापाले दलितलाई पनि अर्को क्षेत्र मानेको जनाएको छ । जसमा सहमतिबाट सोमनाथ पोर्तेल, जसमाया गजमेर र छविलाल विश्वकर्मा छानिएका छन् ।

झापा- १ बाट ८ जना प्रतिनिधि छानिएका छन् । खुल्लातर्फ हरिचरण बानियाँ, श्रीप्रसाद मैनाली, गोपाल बुढाथोकी, नीलकण्ठ तिवारी, असारु राजवंशी र राजु कार्की तथा महिलातर्फ मिना उप्रेती र मिरा भुर्तेल चुनिएका छन् । क्षेत्र नम्बर १ मा सहमतिको प्रयास भए पनि निर्वाचन प्रक्रियाबाट प्रतिनिधि चुनिएका हुन् ।

झापा– २ बाट सर्वसम्मत रूपमा प्रतिनिधि छनोट भए । खुला तर्फ चिन्तन पाठक, प्रेम गिरी, बद्री भट्टराई, रोमणी भट्टराई, उमानाथ ओली, एकराज कार्की, सन्तकुमार राई र वृहस्पति उप्रेती प्रतिनिधि चयन भए । त्यस्तै महिलाबाट पवित्रा देवी महतरा, विष्णुमाया भट्टराई र अनिता कन्दङ्वा प्रतिनिधि छनोट भए ।

यसअघि झापा- ५ बाट १० जना र जिल्लाबाट ३ जना दलित प्रतिनिधि सर्वसम्मत भइसकेका छन् ।

झापा- ३ मा निर्वाचन प्रक्रियाबाट प्रतिनिधिको चयन भयो । झापा– ३ मा प्रदेश सांसद समेत रहेका बसन्त बानियाँ सर्वाधिक मत ल्याएर प्रतिनिधि चुनिए । बाँनियासहित लक्ष्मण पाठक, जीवन श्रेष्ठ, डम्बरबहादुर गिरी, तिलबहादुर राई झापा- ३ बाट निर्वाचित भए । यस्तै, हरि तिम्सिना र मोहन चन्द्र रेग्मीले बराबरी मत ल्याउँदै विजयी भए । महिला तर्फ शुभलक्ष्मी राई र चन्द्रा श्रेष्ठ निर्वाचित भए ।

झापा- ४ मा पनि निर्वाचनबाट प्रतिनिधिको छनोट भयो । जसअनुसार खुलातर्फ खेमनाथ मिश्र, चन्द्रकुमार सेर्मा, धनबहादुर थेवे, भैरवकुमार श्रेष्ठ, राजेन्द्रकुमार पोखरेल, राधाकृष्ण खनाल र महिलातर्फ अमृता राई, इन्दिरा बस्नेत (भरत) र चम्पादेवी खनाल महाधिवेशन प्रतिनिधिमा निर्वाचित भए ।

दमक नगरपालिकाका प्रमुखसमेत रहेका रोमनाथ ओली, होमबहादुर थापा, अम्बिका खनाल र विष्णु खडका (बराल), गौरादहबाट दीपक कार्की, मदन अधिकारी र लिला कट्टेल प्रतिनिधि निर्वाचित भएका छन् । त्यस्तै कमलबाट गाउँपालिका अध्यक्षसमेत रहेकी मेनुका काफ्ले र नारायण गौतम प्रतिनिधिमा निर्वाचित भएका छन् भने गौरीगञ्जबाट सर्वसतलाल राजवंशी महाधिवेशन प्रतिनिधिमा निर्वाचित भएका छन् ।

प्रकाशित मिति: आइतबार, कात्तिक २८, २०७८ १५:१०