एमाले महाधिवेशन प्रतिनिधि छान्न सुदूरपश्चिममा कहाँ के हुँदैछ ?

A+ A A-

नेकपा एमालेको चितवनमा हुने १०औं राष्ट्रिय महाधिवेशनका लागि प्रतिनिधि छनोटको कार्य भइरहेको छ । सुदूरपश्चिम प्रदेशका ९ वटै जिल्लामा महाधिवेशन प्रतिनिधिकालागि सांसददेखि उपमेयरसम्म दौडमा छन् ।

विभाजनको असर अझै पर्न सक्ने देखिएपछि एमालेले सबै जिल्लाहरूमा प्रतिनिधि छनाेट गर्दा सकेसम्म सर्वसम्मत ढंगले गर्न भनेको छ । तर सुदूरपश्चिमका बझाङ र बैतडीमा मात्रै सर्वसम्मत रूपमा महाधिवेशन प्रतिनिधि चयन भएका छन् ।

महाधिवेशनका लागि बझाङबाट १६ जना प्रतिनिधि छनाेट भएका छन् । संघीय सांसद आशाकुमारी बिक, जिल्ला अध्यक्ष दमन भण्डारी, अनेरास्ववियुका पूर्वअध्यक्ष ऐन महर, खडक खड्कासहित १६ जना सर्वसम्मत चयन भएका हन् । यस्तै बैतडीबाट संघीय सांसद दामोदर भण्डारी, प्रदेशसभा सदस्य लिलाधर भट्ट, जिल्ला अध्यक्ष सुरेन्द्र पालसहित १५ जना सर्वसम्मत चयन भएका छन् ।

अन्य जिल्लाहरूमा पनि सर्वसम्मत प्रतिनिधि चयनका लागि प्रयास भइरहेको नेताहरूले बताएका छन् । आकांक्षी धेरै देखिएका स्थानहरूमा भने सहमति जुट्न नसक्दा चुनावको माहोल बनिरहेकाे छ । दार्चुलामा सहमतिमै प्रतिनिधि छनाेटको प्रयास भएपनि अझै टुङ्गो लागेको छैन । त्यस्तै डोटी, डडेल्धुरा, अछाम, बाजुरा र कैलालीमा पनि सहमतिमै प्रतिनिधि चयनकाे प्रयास भइरहेको एमालेका सुदूरपश्चिम प्रदेश सचिव राजेन्द्र रावलले बताए ।

कञ्चनपुरको क्षेत्र नम्बर १ मा चुनाव भइरहेको छ । महाधिवेशन प्रतिनिधि छनोटमा सहमति जुट्न नसक्दा निर्वाचन प्रकृया थालिएको हो । पाँच जना महाधिवेशन प्रतिनिधि छनोटका लागि १० जनाका बीचमा प्रतिस्पर्धा हुँदैछ ।

खुलातर्फ चार जना प्रतिनिधिका लागि जिल्ला अध्यक्ष वीरबहादुर थापा ‘पातल’, सहसचिव पल्लवराज भट्ट, रोशन खड्का, हिरासिंह विष्ट, खेम सुवेदी, रामचन्द्र नेपाल, भक्तबहादुर अधिकारी, खेमराज ओझा तथा महिलातर्फ बेलौरी नगरपालिकाकी उपमेयर चित्रादेवी चौधरी र नेतृ कमला बोहरा चुनावी मैदानमा छन् ।

निर्वाचन क्षेत्र नम्बर २ मा सहमतिको प्रयास जारी छ । पाँच जना महाधिवेशन प्रतिनिधिका लागि १५ जनाको उम्मेद्वारी परेको छ । खुल्लातर्फ १३ महिलातर्फ दुई जनाको उम्मेद्वारी परेको छ । खुलातर्फ संघीय सांसद नरबहादुर धामी, पूर्वसांसद कृपाराम राना, बेदकोट नगरपालिकाका मेयर अशोककुमार चन्द, जिल्ला सहसचिव रणबहादुर महरा, युवा संघ नेपालका निवर्तमान अध्यक्ष बचनबहादुर सिंह र जिल्ला उपाध्यक्ष लक्ष्मी बुढालगायत १५ जना प्रतिस्पर्धामा उत्रिएका छन् ।

क्षेत्र नम्बर ३ मा भने सर्वसम्मत ढंगले महाधिवेशन प्रतिनिधिको छनोट गरिएकाे छ । त्यहाँ खुलातर्फबाट संघीय सांसद दीपकप्रकाश भट्ट, भीमदत्त नगरपालिकाका मेयर सुरेन्द्र विष्ट, सुदूरपश्चिम प्रदेश कमिटी सदस्य कृष्णदेव पन्त र जिल्ला कमिटी सल्लाहकार खिमा चन्दलाई महाधिवेशन प्रतिनिधि छनोट गरिएकाे छ ।

प्रकाशित मिति: आइतबार, कात्तिक २८, २०७८ १३:१४