ओलीको गृहजिल्लामा महाधिवेशन प्रतिनिधि छान्न सकस, निर्वाचनमा कडा प्रतिस्पर्धा

ओलीको गृहजिल्लामा महाधिवेशन प्रतिनिधि छान्न सकस, निर्वाचनमा कडा प्रतिस्पर्धा

A+ A A-

नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीको गृहजिल्लामा महाधिवेशन प्रतिनिधि छान्न सकस परेकाे छ । आगामी १०–१२ मंसिरमा चितवनमा हुने पार्टीकाे १० औँ राष्ट्रिय महाधिवेशनका लागि शनिबार देशभर एकैसाथ प्रतिनिधि छनाेट हुने बताइए पनि अध्यक्ष ओलीकै गृहजिल्ला झापामा सकस परेकाे हाे ।

आकांक्षी धेरै भएपछि शनिबार झापाका पाँचवटा निर्वाचन क्षेत्र मध्ये दुईवटामा मात्रै सर्वसम्मत रूपमा महाधिवेशन प्रतिनिधि चयन भएका छन् । अन्य दुई क्षेत्रका लागि निर्वाचन भएकाे छ भने एक क्षेत्रमा सहमतिकाे प्रयास अहिले पनि जारी छ ।

झापाको क्षेत्र नम्बर २, ५ र दलितबाट मात्रै सर्वसम्मत महाधिवेशन प्रतिनिधि चयन भएका छन् । क्षेत्र नम्बर ३ र ४ मा निर्वाचनबाट प्रतिनिधि छनाेट गरिएको छ । क्षेत्र नम्बर १ मा सर्वसम्मतको प्रयास भइरहेको नेताहरूले बताएका छन् ।

क्षेत्र नम्बर २ बाट खुलातर्फ आठ र महिलातर्फ तीन जना सर्वसम्मत महाधिवेशन प्रतिनिधि चुनिएका छन् । सो निर्वाचन क्षेत्रबाट खुलातर्फ जिल्ला अध्यक्षसमेत रहेका चिन्तन पाठक, प्रेम गिरी, रोमनी भट्टराई, बद्रीप्रसाद भट्टराई, उमानाथ ओली, एकराज कार्की, सन्तकुमार राई, बृहस्पती उप्रेती र महिलातर्फ पवित्रादेवी महतरा, विष्णुमाया भट्टराई र अनिता कन्दङ्वा सर्वसम्मत निर्वाचित भएका निर्वाचन परिचालन तथा सहजिकरण समितिकी संयोजक पवित्रा निरौला खरेलले जानकारी दिइन् ।

ओलीको गृहनगर समेत रहेको झापा क्षेत्र नम्बर ५ मा पनि सर्वसम्मत प्रतिनिधि छनाेट भएका छन् । सो निर्वाचन क्षेत्रबाट सात जना खुला र महिलातर्फ चार जना महाधिवेशन प्रतिनिधि सर्वसम्मत चयन भएका हुन् । खुलातर्फ दमक–५ बाट रोमनाथ ओली, दमक–६ बाट होमबहादुर थापा, दमक–१० बाट अम्बिकाप्रसाद खनाल, कमल गाउँपालिका–५ बाट नारायणप्रसाद गौतम, गौरादह–३ बाट दीपक कार्की, गौरादह–५ बाट मदप्रसाद अधिकारी, गौरीगञ्ज गाउँपालिका–३ बाट सरवतलाल राजवंशी चयन भएका छन् । महिलातर्फ दमक–३ बाट विष्णु खड्का, कमल गाउँपालिका–३ बाट मेनुका काफ्ले, गौरादह–३ बाट लिला कट्टेल कार्की सर्वसम्मत महाधिवेशन प्रतिनिधि चुनिएको एमाले झापाका नेता सोमनाथ पोर्तेलले जानकारी दिए ।

क्षेत्र नम्बर ३ मा महाधिवेशन प्रतिनिधिका आकांक्षी धेरै भएपछि निर्वाचनबाट प्रतिनिधि चयन गरिएको छ । निर्वाचनमा कडा प्रतिस्पर्धा भएको छ । खुलातर्फ छ जना महाधिवेशन प्रतिनिधिका लागि १५ जना र महिलातर्फ दुई जनाका लागि पाँच जनाको उम्मेद्वारी परेकाे थियाे । जसमा बसन्त बानियाँ सबैभन्दा बढी १ हजार ९ सय ९ मत प्राप्त गर्दै निर्वाचित भएका छन् । त्यस्तै लक्ष्मण पाठक १६१७, जीवनकुमार श्रेष्ठ १४६४, डम्मरबहादुर गिरी १४५१ र तीलबहादु राई ११५४ मत प्राप्त गर्दै निर्वाचित भएको निर्वाचन समितिले जनाएको छ ।

मोहन रेग्मी र हरि तिमिल्सना दुवैले समान १०५५ मत प्राप्त गरेपछि दुवै जनालाई सिफारिस गरिएको निर्वाचन समितिले जनाएको छ । सोही निर्वाचन क्षेत्रमा महिलातर्फ दुई जनाका लागि पाँच जनाबीच प्रतिस्पर्धा हुँदा सबैभन्दा बढी शुभलक्ष्मी राईले १७११ र चन्द्रा श्रेष्ठले १०१९ मत प्राप्त गर्दै निर्वाचित भइन् ।

क्षेत्र नम्बर ४ मा पनि सर्वसम्मत हुन नसकेपछि निर्वाचनबाट प्रतिनिधि छनाेट भएका छन् । त्यहाँ खुलाबाट राजेन्द्रप्रसाद पोख्रेल, धनबहादुर थेबे, चन्द्रकुमार शेर्मा, राधाकृष्ण खनाल, ख्याम मिश्र र भैरवकुमार श्रेष्ठ निर्वाचित भएका छन् । महिलातर्फ अमृता राई, चम्पा कुमारी खनाल र इन्दिरा बस्नेत (भरत) निर्वाचित भएको क्षेत्रीय निर्वाचन समितिले जनाएको छ ।

दलित अन्तर्गतका सबै प्रतिनिधि भने सर्वसम्मत चयन भएका छन् । दलितमा तोकिएको संख्याबाहेक अन्यको उम्मेद्वारी कायम नरहेपछि तीनै जना प्रतिनिधि सर्वसम्मत भएका हुन् ।

दलितबाट महाधिवेशन प्रतिनिधिमा नेकपा एमाले प्रदेश कमिटी सदस्य तथा नेपाल उत्पीडित जातीय मुक्ति समाजका प्रदेश कमिटी अध्यक्ष सोमनाथ पोर्तेल, प्रदेशसभा सदस्य जसमाया गजमेर र छविलाल विश्वकर्मा सर्वसम्मत चयन भएका निर्वाचन समितिले घोषणा गरेको छ ।

प्रकाशित मिति: आइतबार, कात्तिक २८, २०७८ १२:४०