वरिष्ठ अधिवक्ता कार्की भन्छन्- प्रधानन्यायाधीशलाई तानाशाह जसरी नै हटाउन लाग्नु परेको छ

वरिष्ठ अधिवक्ता कार्की भन्छन्- प्रधानन्यायाधीशलाई तानाशाह जसरी नै हटाउन लाग्नु परेको छ

A+ A A-

वरिष्ठ अधिवक्ता बद्रीबहादुर कार्कीले प्रधानन्यायाधीश चोलेन्द्र शमशेर जबरालाई अब एक मिनेट पनि कुर्सीमा बस्ने अधिकार नभएको बताएका छन्

आइतबार सर्वोच्च अदालत परिसरमा आयोजित विरोध कार्यक्रमलाई सम्बोधन गर्दै वरिष्ठ अधिवक्ता कार्कीले प्रधानन्यायाधीश जबराले पेसी तोक्दैमा मुद्दाको सुनुवाइ नहुने बताए ।

'प्रधानन्यायाधीशले पेसी तोक्दैमा कसरी सुनुवाइ हुन्छ ? कि उहाँ आफैँले सुनुवाइ गर्ने हो र ?,' उनले भने, ' सुनुवाइ गर्न दुई पक्षका वकिल चाहिन्छ भन्ने सामान्य ज्ञान पनि नभएका व्यक्तिलाई प्रधानन्यायाधीशको कुर्सीमा एक मिनेट पनि बस्ने अधिकार छैन, उनी योग्य छैनन् ।'

उनले सर्वोच्च अदालत तानाशाहलाई पनि आदेश दिन सक्ने संस्था भए पनि अहिले प्रधानन्यायाधीशलाई नै तानाशाह जसरी हटाउन लाग्नु परेको बताए । 'सर्वोच्च यस्तो संस्था हो जसले तानाशाहलाई पनि आदेश दिनसक्छ । तर, यहाँ त प्रधानन्यायाधीशलाई नै तानाशाह जसरी हटाउन लाग्नु परेको छ,' उनले भने ।

उनले प्रधानन्यायाधीश जबराले आफ्नो पदको अपमान आफैँले गरेको बताए । वरिष्ठ अधिवक्ता कार्कीले एउटा प्रधानन्यायाधीशविरुद्ध सबै कानुन व्यवसायीहरू सडकमा निस्किन किन बाध्य भए भनेर बुझ्नुपर्ने बताए ।

'एउटा प्रधानन्यायाधीशविरूद्ध यसरी आवाज निकाल्न किन बाध्य भए ? उहाँसँग व्यक्तिको रूपमा हाम्रो कुनै समस्या होइन तर, उहाँले जुन पद धारण गर्नु भएको छ त्यो तीन करोड नेपालीको आस्थाको पद हो,' उनले भने ।

प्रकाशित मिति: आइतबार, कात्तिक २८, २०७८ १२:२३