एमालेका असन्तुष्ट नेता भन्छन्– सहमतिका नाममा जबर्जस्ती प्रतिनिधि छनोट गरियो

एमालेका असन्तुष्ट नेता भन्छन्– सहमतिका नाममा जबर्जस्ती प्रतिनिधि छनोट गरियो

एमाले केन्द्रीय सदस्य झपट रावल ।

A+ A A-

नेकपा एमालेका केन्द्रीय सदस्य झपट रावल एमालेको संस्थापनसँग तीव्र असन्तुष्टि पोखिरहेका छन् । १०बुँदे सहमति कार्यान्वयन नभएको भन्दै चर्को असन्तुष्टि पोखिरहेका उपाध्यक्ष भीम रावलकै लाइनमा देखिएका झपट रावल महाधिवेशन प्रतिनिधि छनोटप्रति असन्तुष्ट छन् ।

सर्वसम्मतिका नाममा जबर्जस्ती प्रतिनिधि छनोट गरेको उनको बुझाइ छ । त्यही कारण रावलले सामाजिक सञ्जालमा लेखेर नै भनेका छन्- पार्टी सत्ताको घिनलाग्दो अभ्यास भयो ।

अध्यक्ष केपी ओलीको निर्देशनमा सबैजसो जिल्लामा महाधिवेशन प्रतिनिधि सर्वसम्मत गरियो । त्यसले हिजोजस्तो एमालेमा चुनावी प्रणालीबाट प्रतिनिधि छनोट गर्ने अभ्यास प्रयोगमा आउन पाएन । जसले गर्दा, नेतृत्वको चाहना अनुसारका प्रतिनिधि बढ्ता छनोट भएका छन् ।

त्यसलाई नै संकेत गर्दै रावलले भनेका छन्, ‘नेकपा एमाले कैलालीमा अधिवेशन र महाधिवेशन प्रतिनिधि छनोटमा पार्टी सत्ताको घिनलाग्दो दुरुपयोग कार्यकर्ताको चुन्ने चुनिने सार्वभौम अधिकारको चिरहरण जबजको उपहास ।’

कैलालीका असन्तुष्ट पक्षका नेताको भनाइमा सर्वसम्मतिका नाममा पार्टीका नेताहरू प्रतिनिधि हुने चाहेका नेताहरूका नाम पढेर सुनाइयो । आकांक्षीहरूको सूची तयार गरेर त्यसमध्येबाट छनोट गर्ने प्रयाससमेत नभएको उनीहरूको भनाइ छ ।

कैलाली यस्तो जिल्ला जहाँ ओलीका विश्वास पात्र लेखराज भट्टको प्रभाव छ । उपाध्यक्ष भीम रावल तिनै भट्टलाई ओलीले प्रदेश इञ्चार्ज दिएको भन्दै आपत्ति जनाइरहेका छन् । अर्थात् प्रदेश इञ्चार्जकै जिल्लामा महाधिवेशन प्रतिनिधि छनोटमा विवाद देखिएको हो ।

महाधिवेशन प्रतिनिधि छनोटको विरोधमा धेरैले बोल्न सकेका छैनन् । खासगरी, १०बुँदे सहमति गरेर एमालेमा बसेका नेता र उनीहरूनिकट जिल्ला नेताहरू पनि बोल्न सकेका छैनन् । सुरेन्द्र पाण्डेको साथ लागेर एमालेमा बसेका झलनाथ खनाल फाउन्डेशनका अध्यक्ष तथा २ जेठ ०७५ अनुसारका सर्लाही जिल्ला अध्यक्ष रेवती पन्त पनि महाधिवेशन प्रतिनिधि आउ सकस परेको छ ।

२७ कात्तिकमा प्रतिनिधि छनोटमा सहमति जुट्न नसक्दा २८ कात्तिकमा प्रयास भइरहेको छ । महाधिवेशन प्रतिनिधि छनोटमा पनि १०बुँदे सहमतिका पक्ष नेताहरू नै तितरवितर देखिएका छन् । कैलालीमा रावलले असहमति प्रकट गरिरहेका बेला कञ्चनपुरका दीपकप्रकाश भट्ट चुपचाप बसेका छन् । कतिसम्म भने १०बुँदे सहमतिका नेता घनश्याम भुसालसहितका नेताहरू पनि बोलेका छैनन् ।

सुर्खेतमा महाधिवेशन प्रतिनिधि छनोटमा एकलौटी त भएको छ तर त्यसको विरोधमा बोल्न नसकेको प्रष्टै देखिन्छ । यामलाल कँडेलले मोहनमाया ढकाललाई महाधिवेशन प्रतिनिधि बनाउँदा माधव नेपाल छोडेर एमालेमा बसेकी पद्मा खड्का सूचीमै अटाइनन् । उनले पनि विरोधमा बोल्ने हिम्मत गरिनन्, बरु स्टाट्स लेखेर मन शान्त पारिरहेकी छिन् ।

प्रकाशित मिति: आइतबार, कात्तिक २८, २०७८ १३:०२