शिलापत्र सर्भे : तपाईंले तिर्ने बिजुलीको मूल्य कति ?

A+ A A-

नेपाल विद्युत प्राधिकरणको तथ्यांकअनुसार अहिले नेपालमा दिनमा औसत २ सय मेगावाट र रातमा ५ सय मेगावाट विद्युत् खेर गइरहेको छ । आयात भने शून्य छ । उत्पादित बिजुली खेर गएको छ । यही समयमा ग्यासको मूल्य निरन्तर बढिरहेको छ ।

जलविद्युत् उत्पादन बढ्दै गएपछि सरकारले विद्युतीय चुल्हो प्रयोग गर्न सर्वसाधारणलाई आग्रह गरिरहेको छ । व्यापारघाटा घटाउन र विद्युत्‌को खपत बढाउन ग्यासको प्रतिस्थापन उपयुक्त विकल्प भएको सरोकारवालाहरूले बताएका छन् ।

तर, विद्युतीय चुल्होप्रति सर्वसाधारणको मोह बढेको भने देखिँदैन । कतिपय त बिजुलीभन्दा ग्यास सस्तो भएको प्रतिक्रिया दिने गर्छन् । सरकारले घरायसी प्रयोगमा औसत मूल्य १० रुपैयाँ अनुमान गरिए पनि कतिपय उपभोक्ता १६ रुपैयाँसम्म तिर्नुपरेको गुनासो गर्छन् ।

सरकारले तोकेको विद्युत्‌को मूल्यअनुसार औसत रूपमा १ युनिट बिजुलीको मूल्य काठमाडौंमा ९ रुपैयाँ ७० पैसा पर्न आउँछ । यसको अर्थ धेरै घरमा १५ एम्पियर क्षमताको बिजुली प्रयोग हुन्छ । उनीहरूले औसत १ सय १ देखि २ सय ५० युनिटसम्म बिजुली प्रयोग गर्छन् । जसका लागि मासिक १ सय २५ रुपैयाँ न्यूनतम शुल्क र ९ रुपैयाँ ७० पैसा प्रतियुनिट शुल्क लाग्‍ने गर्छ ।

कुनै घर ५ एम्पियरको ग्राहक छन् र मासिक २१ देखि ३० युनिटसम्म मात्रै खपत हुन्छ भने ६ रुपैयाँ ५० पैसा मात्रै रकम लाग्छ । कुनै घर अधिकतम ६० एम्पियरको ग्राहक छन् र अधिकतम २ सय ५० भन्दा बढी बिजुली प्रयोग गर्छ भने पनि प्रतियुनिट ११ रुपैयाँ ५ पैसा रकम लाग्छ । घरवालाले कुनै एक कोठाको मात्रै नभई घरभरिको बिजुलीको पैसा प्राधिकरणलाई बुझाउँछ । उसले ६० एम्पियरको भोल्टेज प्रयोग गर्छ भने २ सय ५० रुपैयाँ मासिक शुल्क दिनुपर्छ ।

मानौँ, त्यस घरमा ५ सय युनिट बिजुली प्रयोग भएको छ भने ५ सयलाई ११ ले गुणा गरेर आउने रकममा २५० रुपैयाँ थपेर तिर्नुपर्ने हुन्छ । जसअनुसार एक युनिट बिजुलीको मूल्य ११ रुपैयाँ ५ पैसा पर्छ । नेपाल विद्युत् प्राधिकरणका अधिकारीहरूका अनुसार यस्तो ग्राहकको संख्या न्यून छ । अझ तोकिएको समयभन्दा पहिले शुल्क तिरे प्राधिकरणले छुटको व्यवस्थासमेत गरेको छ ।

काठमाडौंमा कोठा भाडामा बस्ने अधिकांशको गुनासो र सरकारले भनेको शुल्कअनुसार धेरैको तालमेल मिल्दैन । यसै सन्दर्भमा शिलापत्रले तपाईंले तिर्ने बिजुलीको मूल्य कति हो भनेर सर्वेक्षण गरेको छ । विशेषगरी घर भाडामा बस्नेहरूका लागि उपयोगी हुने गरी हामीले प्रश्न तयार पारेका छौँ ।

तपाईंको मत गोप्‍य राखिने भएकाले ढुक्कसाथ खुलस्त विवरण राख्न अनुरोध छ । तलको फारम भरेर यो सर्वेक्षणमा सहभागिता जनाउन सक्नुहुनेछ: