एक हप्ताभित्र बीपी स्वास्थ्य प्रतिष्ठानको समस्या समाधान हुन्छ: स्वास्थ्यमन्त्री खतिवडा

एक हप्ताभित्र बीपी स्वास्थ्य प्रतिष्ठानको समस्या समाधान हुन्छ: स्वास्थ्यमन्त्री खतिवडा

A+ A A-

स्वास्थ्य तथा जनसंख्यामन्त्री विरोध खतिवडाले अबको एक हप्ताभित्र बीपी कोइराला स्वास्थ्य विज्ञान प्रतिष्ठान धरानको समस्या समाधान हुने बताएका छन् ।

शुक्रबार प्रतिष्ठानको अनियमितताबारे छानविन गर्न गठित तीन सदस्यीय छानविन आयोगको प्रतिवेदन प्रधानमन्त्री शेरबहादुर देउवालाई बुझाएपछि पत्रकारहरूसँग कुराकानी गर्दै स्वास्थ्यमन्त्री खतिवडाले एक हप्ताभित्र प्रतिष्ठानको समस्या समाधान हुने बताएका हुन् ।

उनले यो प्रतिवेदन यसअघिका प्रतिवेदन र आन्दोलनरत पक्षका कुराहरूलाई छलफल गरेर बनाइएको बताए । स्वास्थ्यमन्त्री खतिवडाले हप्ता दिनमा प्रधानमन्त्रीले सिनेटको बैठक बोलाउने र बैठकबाटै निर्णय गरिने बताए ।

स्वास्थ्यमन्त्री खतिवडाले सिनेटले प्रतिवेदनमा पेश भएको कुरालाई आधार मानेर नै निर्णय लिने पनि बताए । स्वास्थ्यमन्त्री खतिवडाको अध्यक्षतामा गठित छानविन आयोगमा स्वास्थ्य मन्त्रालयका सचिव डा. रोशन पोखरेल र धरान उपमहानगरपालिकाका प्रमुख तिलक राई सदस्य थिए ।

प्रतिष्ठानका चिकित्सक, विद्यार्थी र कर्मचारीहरूले शैक्षिक, आर्थिक प्रशासनिक र स्वास्थ्य सेवा सुधार हुनुपर्ने, अनियमितताको छानविन र दोषीमाथि कारबाहीको माग गर्दै चार महिनायता निरन्तर आन्दोलन गरिरहेका छन् । आन्दोलन थप चर्किंदै गएपछि सरकारले वार्ता टोली गठन गरेर आन्दोलनकारीको माग सम्बोधन गर्ने सहमति गरेको थियो ।