अर्कै गेटबाट सर्वाेच्च छिरे प्रधानन्यायाधीश राणा

A+ A A-

नेपाल बार एसोसिएसनकाे अगुवाइमा आन्दाेलित कानुन व्यवसायीहरूको अवरोधका माझ प्रधानन्यायाधीश चोलेन्द्रशमशेर राणा सर्वोच्च अदालतभित्र छिरेका छन् ।

प्रधानन्यायाधीशलाई सर्वोच्च प्रवेशमा रोक्ने गरी कानुन व्यवसायीहरूले मूल गेटमा धर्ना दिइरहेका थिए । तर, राणा सुरक्षा घेराबीच महान्यायाधिवक्ता कार्यालय छेउको गेटबाट सर्वोच्च छिरेका हुन् ।

सुरक्षा व्यवस्था कडा

सर्वाेच्च अदालत आसपासकाे सुरक्षा व्यवस्था कडा पारिएकाे छ । एसपी रमेश बस्नेतका अनुसार अवराेध र झडप राेक्न रामशाह पथ क्षेत्रमा बाक्लाे संख्यामा सुरक्षाकर्मी परिचालन गरिएकाे छ ।

सर्वोच्च अदालतका सबै इजलास बहिष्कार गरी आन्दाेलित बारका वकिलहरू बिहान १० बजेदेखि सर्वोच्चको मुख्य गेटबाट धर्ना बसेका छन् । उनीहरूले मध्यान्ह १२ बजेसम्म धर्ना दिने बारले जनाएकाे छ । यसअघि हिजाे सर्वोच्च अदालत परिसरमा विरोध प्रदर्शन गर्न पुगेका वकिलहरूमाथि प्रहरीले लाठीचार्ज गरेको थियो ।

धर्नाअघि जे देखियाे

सर्वोच्च अदालतको गेटमा नेपाल बार एसोसिएसनमा आबद्ध कानुन व्यवसायीहरू धर्नाको तयारीमा थिए । उनीहरू भेला हुने क्रम जारी थियो । आन्दोलित कानुन व्यवसायीहरूले धर्नाको तयारी गरिरहँदा प्रधानन्यायाधीश राणाको समर्थन गर्दै आएकी तारा बरालसहित केही महिला सर्वोच्चको गेटमा आए । उनीहरू केही बोल्न खोज्दै थिए । तर, बारका कानुन व्यवसायीहरू ‘विचौलिया छिरेको’ भन्दै आक्रोशित भए । उनीहरूमाथि हातपात हुने सम्भावना देखेर प्रहरीले लगत्तै बरालसहितका ती महिलालाई भेनमा हालेर त्यो क्षेत्रबाट बाहिर लग्यो ।

यूएनसम्म जान्छाैँ

यसैबीच, नेपाल बारका महासचिव लिलामणि पौडेलले प्रधानन्यायाधीश राणालाई इमान भए राजीनामा दिन आग्रह गरेका छन् । धर्नाअघि पत्रकारहरूमाझ उनले भने, ‘इमान भए उहाँले राजीनामा दिनुहुन्छ । नभए हामी संयुक्त राष्ट्र संघसम्म पुग्न बाध्य हुने छौँ ।’

प्रधानन्यायाधीशको पक्षमा पनि एक समूह भएकाले झडप रोक्न भन्दै सर्वोच्च परिसरमा बाक्लो संख्यामा सुरक्षाकर्मी परिचालन गरिएको छ ।

प्रकाशित मिति: शुक्रबार, कात्तिक २६, २०७८ ११:०६