आलोपालो संयोजक हुने गरी सत्तारुढ गठबन्धनले बनायो समन्वय समिति, मिलेर चुनाव लड्ने सहमति

आलोपालो संयोजक हुने गरी सत्तारुढ गठबन्धनले बनायो समन्वय समिति, मिलेर चुनाव लड्ने सहमति

A+ A A-

सत्तारुढ गठबन्धनले सरकार सञ्चालन र आगामी निर्वाचनसम्म सरकारलाई सहयोग गर्नका लागि समन्वय समिति गठन गरेको छ । सोमबार बालुवाटारमा बसेको कांग्रेस, माओवादी केन्द्र, एकीकृत समाजवादी, जनता समाजवादी र राष्ट्रिय जनमोर्चाको बैठकले ११ सदस्यीय समिति गठन गरेको माओवादी केन्द्रका नेता नारायणकाजी श्रेष्ठले बताए ।

'संविधान बमोजिम आवाधिक निर्वाचन सम्पन्न गर्न र सरकारलाई लोकतन्त्रको सुदृढीकरणको लागि सहयोग गर्न समन्वय समिति गठन गरिएको छ । दुई दुई महिनामा संयोजक फेर्ने सहमति भएको छ', श्रेष्ठले भने ।

समन्वय समितिमा कांग्रेसबाट रामचन्द्र पौडेल र कृष्णप्रसाद सिटौला छन् । यता माओवादी केन्द्रबाट पुष्पकमल दाहाल प्रचण्ड, एकीकृत समाजवादीबाट माधवकुमार नेपाल, जनता समाजवादी पार्टीबाट उपेन्द्र यादवको नाम दिइएको छ । राष्ट्रिय जनमोर्चाबाट चित्रबहादुर केसी र दुर्गा पौडेल रहेका छन् । माओवादी केन्द्र, एकीकृत समाजवादी र जसपाबाट थप एकएक जनाको नाम सिफारिस गर्न बाँकी छ ।

अबको दुई महिना समन्वय समितिको नेतृत्व कांग्रेसका वरिष्ठ नेता रामचन्द्र पौडेलले गर्नेछन् । त्यसपछि क्रमशः माओवादी केन्द्र, एकीकृत समाजवादी, जसपा र राष्ट्रिय जनमोर्चाले गर्नेछ ।

दलहरुबीच राष्ट्रिय सभाको निर्वाचन र अन्य निर्वाचनमा मिलेर लड्ने सहमतिसमेत भएको नेता श्रेष्ठले बताए । 'पाँच दलीय गठबन्धनको साझा उद्देश्य र एजेण्डा रहेकाले निर्वाचन पनि मिलेर लड्ने सहमति भएको छ', उनले भने ।

गठबन्धनले यसअघि सरकार सञ्चालनमा सहयोगका लागि संयन्त्र पनि गठन गरेको थियो । सरकारका निर्णय र नियुक्ति विवादरहित बनाउन तथा मन्त्रीहरुका लागि आचारसंहिता बनाउन संयन्त्र गठन भएको थियो । सो संयन्त्रमा दोस्रो तहका नेताहरुको सहभागिता थियो । हालको समन्वय समिति भने शीर्ष नेता सम्मिलित बनाइएको हो । सरकारको काम कारबाहीलाई नियन्त्रण गर्न नभएर साझा उद्देश्य प्राप्तिमा संयोजनका लागि समिति गठन गरिएको नेता श्रेष्ठले बताए । पाँच दलीय गठबन्धन शीर्ष नेताहरुको गठबन्धन जस्तो भएकोभन्दै नेता श्रेष्ठले बारम्बार आवाज उठाउँदै आएका थिए ।

प्रधानन्यायाधीशबारे भएन छलफल

प्रधान न्यायाधीश चोलेन्द्रशमशेर राणाको राजीनामाको माग गर्दै कात्तिक पहिलो सातादेखि न्यायालयमा हड्ताल छ । प्रधानन्यायाधीश प्रकरणमा राजनीतिक दलहरूलाई निर्णय लिन दबाब बढिरहेका बेला सत्तारुढ गठबन्धनको बैठक भने यो विषयमा प्रवेश नै नगरी सकिएको छ ।

बालुवाटार बैठकमा कांग्रेस, माओवादी केन्द्र, एकीकृत समाजवादी, जनता समाजवादी पार्टी र राष्ट्रिय जनमोर्चाका शीर्ष नेताहरूले बैठकमा प्रधानन्यायाधीशका विषयमा कुनै छलफल नै नभएको बैठकमा सहभागी एक नेताले बताए ।

प्रधानन्यायाधीश जबराले चौतर्फी दबाब आउँदा पनि राजीनामा नदिएपछि संवैधानिक प्रक्रिया अनुसार दलहरूले महाअभियोग लगाउनु पर्ने आवाज उठिरहेको छ । तर, सत्तारुढ दलको बैठकमा भने यो विषयमा कुनै छलफल नै भएन । यसअघि प्रधानमन्त्री शेरबहादुर देउवाको बेलायत भ्रमणलाई कारण देखाउँदै गठबन्धनले यो विषयमा कुनै निर्णय लिएको थिएन ।

प्रधानमन्त्री देउवा नेपाल फर्केसँगै साझा धारणा बनाउने गठबन्धनका नेताहरूले बताएका थिए । तर, प्रधानमन्त्री देउवा स्वदेश फर्किएपछि बसेको शीर्ष नेताको बैठकमा यो विषयमा चर्चा भएन । राष्ट्रिय जनमोर्चाकी उपाध्यक्ष दुर्गा पौडेलले आजको बैठकमा सरकार सञ्चालनका लागि समन्वय समिति बनाउने विषयमा मात्रै छलफल भएको र अन्य विषयमा प्रवेश नै नगरिएको बताइन् ।

प्रकाशित मिति: सोमबार, कात्तिक २२, २०७८ २१:४९