एमाले पदाधिकारीमा पुरानै नेताहरूको दाबी, नेतृत्व चयन होला त सर्वसम्मत ?

A+ A A-

दशौँ महाधिवेशनबाट एमालेले १५ पदाधिकारी चयन गर्दैछ । पार्टी हाँक्नका निम्ति पहिलो र दोस्रो पुस्ताका नेताहरूको रस्साकस्सी सुरु भइसकेको छ । १० मंसिरदेखि १२ सम्म चितवनमा तय भएको महाधिवेशन प्रतिस्पर्धात्मकभन्दा पनि सहमति उन्मुख देखेपछि नेताहरू पदाधिकारी सुनिश्चित गर्न अध्यक्ष ओली वरिपरि केन्द्रित हुँदैछन् ।

महाधिवेशनमा ओली निर्विकल्प देखिएपछि र पार्टी संरचनामा उनकै एकल निर्देशन कार्यान्वयन हुँदै जाँदा ओलीसँग असन्तुष्टहरूले पनि बोल्ने हिम्मत जुटाइरहेका छैनन् । त्यसैकारण एमाले सचिव पृथ्वीसुब्बा गुरुङले पदाधिकारीको दाबेदार भएको मात्रै बोलिरहेका छन् । एक अन्तर्वार्तामा गुरुङले पदाधिकारीभन्दा तल जान नसकिने तर कुन पदमा जाने विषयमा नेताहरूसँग छलफल नगरी बोल्न नसक्ने बताएका छन् ।

यही कुरा नेता छविलाल विश्वकर्माको छ । स्थायी कमिटी सदस्य विश्वकर्माले शिलापत्रसँगको कुराकानीमा पदाधिकारीमा उक्लिनेबारे नेताहरूसँग छलफल नगरी भन्न सकिने अवस्था नरहेको बताए । उनले भने, ‘जो नेता जे पदमा पुगे पनि अहिले सहमतिमा हुने भएकाले, नेताहरूबीच सहमति भएपछि कुन पदमा जाने भन्ने टुंगो लाग्छ ।’ त्यसैले विश्वकर्माले पदाधिकारीमध्ये पनि कुन पदका लागि भनेर उनले खुलाउन चाहेका छैनन् ।

यता, गुरुङको हकमा सचिवमै दोहोरिने वा उपल्लो तहमा उक्लिने विषय ओलीले बनाउने समीकरणमा निर्भर हुनेछ । जसरी गुरुङको सन्दर्भमा ओलीको चाहना प्रभावी हुन्छ त्यसरी नै प्रदीप ज्ञवालीमा पनि त्यही लागू हुन्छ । ज्ञवालीले महासचिवको चाहनासम्म राख्न त सक्लान् तर खुलेर बोल्न सक्ने अवस्थामा देखिन्नन्, ओलीले ज्ञवालीलाई उपमहासचिवमा सेट गर्न सक्ने केहीको अनुमान छ ।

पदाधिकारीका आकांक्षीहरूको लामो सूचीमा सुवास नेम्वाङ, विन्दा पाण्डे, शिवमाया तुम्बाहाम्फे, रघुवीर महासेठदेखि छविलाल विश्वकर्मासम्म देखिएका छन् । आफूनिकट मानिएका यी नेताहरूलाई पदाधिकारीभित्र समेट्नुपर्ने बाध्यता ओलीलाई छ । त्यसबाहेक अघिल्लो महाधिवेशनमा सचिवमा पराजित विष्णु रिमाल अहिले पनि सचिवका आकांक्षी हुन् । रिमालसँगै भानुभक्त ढकाल, महेश बस्नेतदेखि गोकुल बाँस्कोटासम्मले पदाधिकारीमा आश गरेका छन् । ढकाल जसरी पनि सचिव हुने दाउमा छन् । आफूसँगैको विद्यार्थी राजनीतिक गरेका योगेश भट्टराई नवौँ महाधिवेशनमै सचिव भइसकेकाले पनि अहिले ढकाल जसरी पनि सचिव हुने प्रयासमा छन् । दलित समुदायबाट एमालेको स्थायी कमिटी सदस्य रहेका विश्वकर्मा पनि सचिवका आंकाक्षी हुन् ।

राष्ट्रपति विद्यादेवी भण्डारीको समेत साथ रहेको थममाया थापा मगर पनि सचिवको दाबेदार हुन् । नवौँ महाधिवेशनमा पनि उनले पदाधिकारीमा दाबी गरेकी थिइन् । ओली समूहबाट थापाले र माधव नेपाल पक्षबाट श्रीमाया थकाली सचिवका दावेदार थिए । थकालीले माधव नेपाल समूह छोडेर एमालेमै बसेका कारण अहिले उनले पदाधिकारीमा दाबी गर्न सक्छिन् ।

यता, माधव नेपाल छोडेर बसेका १० नेतामध्ये भीम रावल, अष्टलक्ष्मी शाक्यर युवराज ज्ञवाली पदाधिकारीमै बस्न चाहन्छन् ।रावल वरिष्ठ उपाध्यक्षमा उक्लिने दाउमा छन् । एमालेमा उपाध्यक्ष नपाउने अवस्थामा रावलले अध्यक्षमा उम्मेदवारी दिन सक्ने चर्चा एमालेभित्र चलिरहेको छ । ओलीको आलोचना बन्द गरेका शाक्य र ज्ञवाली उपाध्यक्षको निरन्तरता खोजिरहेका छन् ।

त्यसबाहेकका उपमहासचिव घनश्याम भुसाल पनि पदाधिकारीमध्ये कुन पदमा जाने अन्योलमै छन् । सचिवत्रय योगेश भट्टराई, भीम आचार्य र गोर्कण विष्ट भने अहिलेकै पदको निरन्तरतामा छन् । १०बुँदे सहमति छोडेर भट्टराई र विष्ट अहिले ओलीको कित्तामा पुगिसकेका छन् । आचार्यको हकमा भने ओली त्यति सकारात्मक छैनन् । बरु राष्ट्रपति भण्डारी र अध्यक्ष ओलीको चाहना शेरधन राईलाई अगाडि बढाउने देखिन्छ । आचार्यको भन्दा राईको प्रभाव प्रदेश १ मा बलियो छ ।

नवौँ महाधिवेशनमा महासचिवमा पराजित सुरेन्द्र पाण्डे पनि पदाधिकारीका दाबेदार हुन् । उनले प्रष्टसँग पोजिसन खुलाएका छैनन् तर ओलीसँग निकट भएर महासचिव हत्याउन खोजिरहेका छन् । एमालेको महासचिवमा शंकर पोखरेल र विष्णु पौडेल पनि स्वभाविक दावेदार हुन् । यता, पदाधिकारीकै निम्ति पूर्वमाओवादी खेमाबाट रामबहादुर थापा बादल, लेखराज भट्ट र टोपबहादुर रायमाझी दावेदार छन् ।

थापा उपाध्यक्षको दाबीमा छन् भने रायमाझी सचिवको दावेदार हुन् । माओवादी केन्द्रमा हुँदा सचिव रहेका रायमाझी एमालेभित्र त्यही पद खोजिरहेका छन् । भट्ट ओलीको रोजाइका नेता भएकाले पदाधिकारीमा समेटिने सम्भावना देखिन्छ । सुदूरपश्चिममा भीम रावलको काउन्टरमा ओलीले भट्टलाई उपयोग गरिरहेका छन् ।

प्रकाशित मिति: मंगलबार, कात्तिक २३, २०७८ ०९:५३