साताका कवि मुनाराज शेर्मा, र उनकाे कविता 'सर्पकाे टापू'

A+ A A-

बस !
तिमी फुलिरहनू जङ्गली फूल भएर
बेइमानहरूले नै हो खोट देख्ने तिम्रो इमानमा

गुलाफको कोमल अनुहारको आवरणभित्र काँडाझैँ बाँचिरहेको हुन सक्छ
तिम्रो उज्यालो आभाको चमकमा डाहाले मर्नेहरू
कमलको फेदमा सडेर कुहिरहेको हिलोझैँ
भुलुक भुलुक उम्लिरहेको हुनसक्छ उनीहरूको जलन
तिम्रो मेहनतको उन्नतिमा मुर्मुरिनेहरू

तिमीलाई
भन्दै आइएको साम्राज्यवादीहरू
रटान गराइँदै आइएको सामन्तवादीहरू जस्ता पनि छैनन् तिनीहरू
जोसँग लड्न तिमीसँग ठूलो समूह हुनेछ
उनीहरू त तिमीसँग खुरापातको फूलले भरिएको गाडामा मुलायम जिब्रो लिएर आउँनेछन्
संस्कारी मुस्कानको छाता ओडाएर प्रसंशाको पूल तार्नेछन्
तिमी सत्य छोड्दै जानेछौँ
त्यै सत्यको मोती टिपेर चिप्लेकिराको विषालु र्‍यालले लेप्दै तिम्रो बदनाम गर्न सक्नेछन्
हुनसक्छ समयको शान्त तलाउमा लिएर जानेछन् प्रेमको डुङ्गामा
र छोड्न सक्नेछन् सयरकै बखत हरियो एनाकोण्डाको बस्तीमा

बस् ! मात्र उभिरहनू सत्तिसालझैँ
वर्षौंपछि जब तिमी ज्ञानले भरिनेछौ
तिम्रो निजी मित्रहरूले समेत भन्न सक्नेछन्
तिमी जातिवादी हौ

जतिखेर तिमी उनिहरूको पुरानो फोहोरको पाप्रा
नवीन विचारको खन्तिले उक्काइरहेको हुनेछौ
तिमीलाई अति कडा र रिसाहा भन्नेछन्
जतिबेला तिमी उनीहरू भन्दा फरक लयमा
मानवताको बहस छेड्नेछौ र दब्नेछैनौँ कसैको सामु
तिम्रो तर्क र ज्ञानको खुला आकाशले निसासिनेछन् उनीहरू
र बुन्नेछन् कच्चा षड्यन्त्रको महाजाल

यतिसम्म कि भर्खरै तिम्रै कविताको राष्ट्रगान गाइसकेर
तिम्रै कविताको पनि उखुम विरोध गर्नेछन्
जब तिम्रो शब्दहरू शास्त्रीय पर्खाल तोडेर
दौडनेछन्
निरपेक्ष सास भरेर स्वतन्त्रताको गीत गाउँदै

इभ र आदमलाई सोध
बाबुकै शुक्रकिटमा पनि शत्रुताको बिज चुहाइएको हुन सक्छ
तब तिम्रै वंशसँग पनि म्याच फिक्सिङकाे खेल सुरु गर्छन् उनीहरू

जब तिमीसँग भन्नुपर्ने बहुत हुन सक्छ
नसिद्धी बयान रोक्छ्न् र मोड्छन् फैसला
नाअत्तिनू कदापी यो संसार यसरी नै चलिआएको हो
सुकरात देखि बुद्धसम्म
मण्डेलादेखि गान्धीसम्म
मार्टिन लुथकरदेखि अम्बेडकरसम्म
सकुनीदेखि र सिआइएसम्म

उन्मुक्त सर्वाङ्ग फुलिरहेको डाँडाको गुराँसलाई खासै बाल छैन
फेदमा कैयौं मुसाहरू खनिरहेका छन् ज्यानमारा सुरुङ्ग
थाहा छ गुराँसलाई
हजार सुरुङ्ले पनि गल्दैन यो मेहेनतको पहाड
तिमी सेतो खुनको बलमा हरियो लोकतन्त्र उमारेर
बस !
उभिरहनू पहाड भएर
बगिरहनू गति भएर
उभिनेहरूको लागि यो संसार स्नेक आइलण्ड जस्तै हो
नआत्तिनू पिटिक्कै, बुद्ध एक्लै थियो
तर पच्छ्याइरहेको छ संसार उसलाई

प्रकाशित मिति: मंगलबार, कात्तिक २३, २०७८ ०७:३४