झलनाथ खनाल बने एकीकृत समाजवादीको विदेश विभाग प्रमुख, अरु विभागमा को-को तोकिए

झलनाथ खनाल बने एकीकृत समाजवादीको विदेश विभाग प्रमुख, अरु विभागमा को-को तोकिए

A+ A A-

नेकपा (एकीकृत समाजवादी) को विदेश विभाग प्रमुखमा पूर्वप्रधानमन्त्री झलनाथ खनाल चयन भएका छन् । एकीकृत समाजवादीका उपमहासचिव गङ्गालाल तुलाधरका अनुसार ११ सदस्यीय विदेश विभाग गठन गरिएको छ ।

विभागको उपप्रमुखमा प्रमेश हमाल चयन भएका छन् । यस्तै सदस्यहरूमा डा. विजय पौडेल, मञ्जु यादव, मिलन तुलाधर, वाईपी सङ्ग्रौला, शङ्कर खतिवडा, मेटमणि चौधरी, लक्ष्मण पौडेल, सावित्रा भुसाल, श्रीनाथ बराल, शेरबहादुर कुँवर र हंशबहादुर शाही छन् ।

एकीकृत समाजवादीले डा. वेदुराम भुसाललाई संगठन विभाग प्रमुखको जिम्मेवारी दिएको छ । संगठन विभाग उपप्रमुखमा प्रकाश ज्वाला चयन भएका छन् । त्यस्तै अशोक कोइराला, बलदेव चौधरी सदस्य छन् ।

शिक्षा विभागको प्रमुखमा गङ्गालाल तुलाधर र उपप्रमुखकमा लक्ष्मण केसी चयन भएका छन् । शिक्षा विभागको सदस्यहरूमा कमला तुलाधर, डा. चन्द्र ढकाल, डा। उद्धव पोखरेल, गुणाखर गैर र सरोज खतिवडा सदस्य छन् ।

गङ्गालाल तुलाधार नै प्रमुख रहेको विपद् व्यवस्थापन विभाग पनि गठन भएको छ । यो विभागमा सूर्यबहादुर थापा, आयाम पाण्डे, डा. राजु थापा र विष्णु तिमिल्सिना सदस्य छन् ।

त्यस्तै सहकारी विभागको प्रमुखमा गोविन्द कोइराला चयन भएका छन् । विभागको उपप्रमुखमा टेकप्रसाद चौलागाईं र सदस्यहरूमा नवराज अर्याल, माधवप्रसाद जिसी, ओमप्रताप राणा, देवराज न्यौपाने र किरण मोक्तान चयन भएका छन् ।

बुधबार सम्पन्न केन्द्रीय सचिवालयको बैठकबारे आज जानकारी दिँदै एकीकृत समाजवादीले वर्तमान सरकारका कामलाई अझै प्रभावकारी बनाउन गठबन्धनमा छलफल गर्ने निर्णय गरेको छ ।

पार्टीबाट सरकारमा पठाइएका मन्त्री तथा मुख्यमन्त्रीले पार्टीको नीति र निर्देशनअनुसार प्रभावकारी काम गर्ने, मन्त्री तथा मुख्यमन्त्रीको सल्लाहकारको नियुक्ति गर्दा राजकीय मामिला विभागको सिफारिसका आधारमा केन्द्रीय सचिवालयले निर्णय गरेर मात्रै गर्नुपर्नेमा जोड दिइएको छ ।

पार्टीमा आउन चाहिरहेका विभिन्न राजनीतिक समूह र व्यक्तिसँग वार्ता गर्न महासचिव डा. वेदुराम भुसालको संयोजकत्वमा उपमहासचिव डा. तुलाधर र डा. विजयकुमार पौडेल सदस्य रहेको वार्ता टोली गठन गरिएको छ ।

यही कात्तिक २७ र २८ गते काठमाडौँमा केन्द्रीय कमिटीको दोस्रो बैठक बोलाइएको छ । पार्टीले आकर्षक नारा लेखिएका लाखौँ स्टिकर छापी जनतामा वितरण गरेर पार्टीको प्रचार गर्ने निर्णयसमेत बैठकले गरेको छ ।

मेलम्ची खानेपानी आयोजनाको मुहानमा बाढीले पुर्‍याएको क्षतिको मर्मत कार्य छिटोभन्दा छिटो सम्पन्न गरी काठमाडौं उपत्यकामा खानेपानीको आपूर्ति गर्न सरकारलाई बैठकले आग्रह गरेको छ ।

प्रकाशित मिति: बिहीबार, कात्तिक १८, २०७८ २१:०८