अन्नपूर्ण पदमार्गका व्यवसायी आन्दोलित, हेलिप्याडमा गाडियो झण्डा

A+ A A-

व्यावसायिक उडान बन्द गरिए पनि हेलिकोप्टर कम्पनीले अवज्ञा गरेपछि कास्कीस्थित अन्नपूर्ण आधार शिविरका स्थानीय बासिन्दा र व्यवसाी आन्दोलित बनेका छन् । अन्नपूर्ण गाउँपालिका-११ मा पर्ने पदमार्गको छोम्रोङ, दोभान, हिमालयलगायत क्षेत्रका युवाको समूहले बुधबार अन्नपूर्ण आधार शिविरस्थित हेलिप्याडमा झण्डा गाडेको छ ।

`हामीले हेलिप्याडमा नेपालको झण्डा गाडेर आन्दोलन थालेका छौँ । यो सांकेतिक हो । यसलाई पनि नटेरी मनोमानी गरेमा थप कार्यक्रम घोषणा गर्छौं,´ सेन्चुरी युवा क्लब छोम्रोङका अध्यक्ष मिकास गुरुङले भने ।

पदमार्गअन्तर्गतका २५ जना युवाको टोली मंगलबार अन्नपूर्ण आधार शिविर पुगेको थियो । अध्यक्ष गुरुङका अनुसार बुधबार हेलिकोप्टर उडान भएन । `हामी आज (बिहीबार) फर्कन्छौँ। हेलिकोप्टर आयो भने त्यसलाई हेलिप्याडमा अवतरण गर्न नदिन एक जनालाई जिम्मा दिएर छोड्छौँ,´ उनले भने । भीआइपी र अपाङ्गता भएका व्यक्ति आएमा र रेस्क्यु गर्ने हेलिकोप्टरलाई भने अवरोध नगरिने अध्यक्ष गुरुङले बताए ।

हेलिकोप्टर उडानले संरक्षित क्षेत्रका वन्यजन्तु र चराचुरुङ्गीमा असर परेको भन्दै साउन २०७५ मा अन्नपूर्ण गाउँपालिकाको गाउँसभाले व्यवसायिक उडान रोक्ने निर्णय गरेको थियो । यो जानकारी जिल्ला प्रशासन कार्यालय कास्की र नागरिक उड्डयन प्राधिकरण पोखरालाई उतिबेलै गराइएको थियो ।

कोरोना संक्रमण सुरु हुनुभन्दा अघि प्रभु, सिम्रिक, एअर डाइनेष्टी, एल्टिच्युड हेलिकप्टरले उडान भर्थे । स्थानीयसँग सहमति गरेर उडान भर्ने पक्षमा रहेका प्रभुबाहेकका हेलिकोप्टरले कोरोनापछि रेस्क्युबाहेक उडान गरेका छैनन् । प्रभु हेलिकोप्टरलाई संरक्षित क्षेत्रमा अत्यावश्यकबाहेक उडान नगर्न पदमार्गका व्यवसायीले पटक/पटक आग्रह गरे पनि अटेरी गर्दै आएको छ।

प्रभु हेलिकोप्टर भने आफूहरूलाई उडान बन्द भएकोबारे जानकारी नरहेको दाबी गरेकाे छ । प्रभु हेलिकोप्टरका गण्डकी प्रदेश क्षेत्र हेरिरहेका सुजन जोशी सबै प्रक्रिया पुर्‍याएरै अन्नपूर्ण क्षेत्रमा उडान गरिरहेको बताउँछन् । ‘उडान बन्द भएको लेटर आउनुपर्‍यो । नेपाल सरकारकै नियम पालना गरेका छौँ । गैरकानुनी काम गरेका छैनौँ,’ हेलिकोप्टर लगानीकर्तासमेत रहेका जोशीले शिलापत्रसँग भनेका थिए, ‘उड्छु भनेर उड्न पाउने पनि होइन । उडान गर्नुभन्दा अगाडिका प्रक्रिया पुर्‍याउनुपर्‍यो, पुर्‍याएका छौँ । आफ्नो मन लागेर उडाउन कहाँ पाउँछ ? आफ्नो मनले उडाउन चङ्गा हो र ?’