‘धन्यवाद भगवान्, मलाई नेपालमा जन्माइदिनुभयो’

आधार शिविरबाट देखिएको अन्नपूर्ण साउथ । तस्वीरः अनुप पौडेल/शिलापत्र

A+ A A-

दसैँ-तिहारको बीचमा तिलिचो ताल पुग्ने योजना थियो । बाटो बिग्रिएको खबर पाएपछि तिलिचो जाने काठमाडौंकी क्रिस्टिना खत्रीको योजना तत्काललाई थाँती रह्यो । पछि साथीहरूबीच दुई गन्तव्यबारे छलफल भयो- एउटा अन्नपूर्ण बेसक्याम्प, अर्को शे-फोकसुण्डो । उनीसहित साथीहरूको रोजाइमा कास्कीस्थित अन्नपूर्ण बेसक्याम्प पदमार्ग पर्‍यो । योजनाअनुसार खत्री साथीहरूसँगै गत ८ कात्तिकमा पदमार्ग हुँदै अन्नपूर्ण हिमालको फेदमा पुगिन् ।

कास्कीको अन्नपूर्ण गाउँपालिका-११ स्थित शिविर पुग्न उनलाई काठमाडौंबाट चार दिन लाग्यो । तीन दिन हिँडेपछि अन्नपूर्ण हिमालको फेदमा पुगेकी उनको मन फर्किँदा फुरुङ्ग थियो । ९ कात्तिकमा अन्नपूर्ण बेसक्याम्पबाट फर्किनेबेला क्रिस्टिनाले आफ्नो यात्रा अनुभव शिलापत्रलाई सुनाइन् ।

७ कात्तिकको बिहान छोमरोङबाट सिनुवाको उकालो चढ्दा उनको खुट्टा गलिसकेका थिए । उनीलाई त्यतिबेला बेसक्याम्प पुग्न सकिँदैन भन्ने लागेको रहेछ । ‘कुनै ठाउँ साह्रै गाह्रो थियो । अब सकिँदैन भनेर हार नै खाइयोजस्तो भयो । आफ्नो वरपरको वातावरण देखेपछि आँट आयो,’ क्रिस्टिनाले भनिन् ।

क्रिस्टिना खत्री ।

क्रिस्टिनाको यो पहिलो ट्रेकिङ भने होइन । उनी दुई वर्षअघि नेपालकै गहिरो ताल शे-फोकसुन्डो पुगेकी थिइन् । त्यसैले ट्रेकिङमा के-के सामान चाहिन्छ भन्ने जानकारी थियो । उचाइमा लसुन, टिमुर खाँदा राम्रो हुन्छ भनेर उनले त्यो पनि लगेकी थिइन् । १४ सय मिटर उचाइको काठमाडौं उपत्यकामा बस्ने क्रिस्टिना सजिलै ४१ सय ३० मिटर उचाइको अन्नपूर्ण आधार शिविर पुगिन् ।

छोमरोङ, सिनुवा, बम्बो, दोभान, हिमालय, देउराली, माछापुच्छ्रे बेसक्याम्प (एमबीसी) हुँदै क्रिस्टिना बाँकी तीन साथीसँगै अन्नपूर्ण बेसक्याम्प पुगेकी हुन् । माछापुच्छ्रे बेसक्याम्प नपुग्दासम्म हिमाल राम्रोसँग देखिँदैन । एमबीसीबाट एक घण्टा उक्लिएपछि बल्ल हिमाल आँखै अगाडि देखिन्छ । घाम डुब्दै गर्दा उनले आफ्नो अगाडि अन्नपूर्ण र पछाडि माछापुच्छ्रे सर्लक्क देखिन् । त्यो देखेपछि क्रिस्टिना सुस्ताएर हिमाल हेरिरहिन् । ‘माछापुच्छ्रे बेसक्याम्पबाट माथि आएर हिमाल देखेपछि खुसीले रून मन लाग्यो । म यति राम्रो देशमा जन्मिएछु, भगवानलाई धन्यवाद भन्दै हिमाल हेर्दै माथि आइपुगियो,’ क्रिस्टिना मख्ख देखिइन् ।

अन्नपूर्ण बेसक्याम्प पुग्दा रात परिसकेको थियो । दुई हातमा दुई लौरी टेक्दै ८ कात्तिक साँझ सात बजे उनले बेसक्याम्पमा आफ्नो पाइला राखिन् । भोलिपल्ट सवेरै उठ्दा आँखै अगाडि अन्नपूर्ण र माछापुच्छ्रे देखेपछि उनको मुहारमा हाँसो भरियो । ‘कतै ठाडो उकालो, कतै ओरालो हुँदा अलिकति गाह्रो भयो । बाटोचाहिँ माथिसम्मै राम्रो रहेछ,’ क्रिस्टिनाले बेसक्याम्पबाट फर्किनेबेला सुनाइन्, ‘बाटो राम्रो रहेछ । एकदम रमाइलो अनुभव भयो । यति उचाइमा पनि राम्रो व्यवस्थापनमा बस्न पाइयो, खान पाइयो । खुसी भएर फर्किँदै छौँ ।’

असोजदेखि मंसिरमा अन्नपूर्ण आधार शिविर पदमार्गमा पर्यटकको बाक्लो उपस्थिति रहन्छ । पदमार्गका व्यवसायीका अनुसार कोरोना संक्रमणको जोखिमले सुनसान अन्नपूर्ण आधार शिविर पदमार्गमा अहिले पर्यटकको आवागमन सन्तोषजनक छ । दुई वर्षअघिसम्म विदेशीको चाप रहँदै आएको पदमार्गमा नेपालीको राम्रो उपस्थिति छ । भारत, अमेरिका, इरानलगायत देशका पर्यटक पनि बेसक्याम्प पुगिरहेका छन् ।

कोरोनाका कारण बन्द पदमार्ग गत ५ असोजदेखि खुलेको थियो । छोमरोङ पर्यटन व्यवस्थापन समितिका सचिव दिलीप गुरुङका अनुसार अहिले पदमार्गमा ९० प्रतिशत पर्यटक नेपाली छन् । गत असोजमा पदमार्ग खुलेयता नेपाली र विदेशीसहित ३५ सय हाराहारी पर्यटक अन्नपूर्ण बेसक्याम्प पुगेका छन् ।

संस्कार लोहनी ।

काठमाडौंमा इन्जिनियरिङ पढिरहेका संस्कार लोहनी पनि गत हप्ता अन्नपूर्ण बेसक्याम्प पुगेका थिए । दसैँभन्दा अगाडि लगालग परीक्षा दिएपछि उनलाई घुम्न निस्किन मन थियो । साथीहरूले सुझाएपछि परीक्षाबाट भएको थकान मेटाउन उनी बेसक्याम्प आएका रहेछन् । ‘परीक्षाको प्रेसरबाट मुक्त हुन यहाँ आइयो । एकदमै आनन्द आयो । इन्जिनियरिङमा पढाइको प्रेसर बढी हुने भएकाले तनावमुक्त हुन यस्तो ठाउँ गइराख्नु पर्ने रहेछ,’ संस्कारले बेसक्याम्पमा शिलापत्रलाई सुनाए । उनले तिलिचो ताल र सगरमाथा बेसक्याम्पलाई घुम्ने सेड्युलमा राखेका छन् ।

काठमाडौंबाट एबीसीतिर हिँड्नुअघि संस्कारले युट्युब, गुगलमा अन्नपूर्ण बेसक्याम्पबारे सामान्य अध्ययन गरेका थिए । अध्ययन गरेको भन्दा पदमार्ग केही गाह्रो रहेको उनको निष्कर्ष छ । हिँडाइ गाह्रो भए पनि अरुलाई एकपटक अन्नपूर्ण बेसक्याम्प घुम्न उनी सुझाउँछन् । ‘यताउता हेर्दा सजिलै हुन्छ भन्ने लागेको थियो । तर, हिँड्दा अलिक गाह्रो नै रहेछ,’ संस्कारले थपे, ‘यहाँ एक न एकपटक आउनुपर्छ । हिँड्दा जति गाह्रो भए पनि माथि आएपछि दुःख सबै बिर्सिन्छ ।’

प्रकाशित मिति: शुक्रबार, कात्तिक १९, २०७८ ०८:५५