४९ सांसदको हस्ताक्षरसहित प्रदेश १ को मुख्यमन्त्रीमा राईको दाबी पेस

A+ A A-

नेकपा एकीकृत समाजवादीका संसदीय दलको नेता राजेन्द्र राईले प्रदेश १ को नयाँ मुख्यमन्त्रीका लागि दाबी पेस गरेका छन् ।

चार दलीय गठबन्धनको नेतृत्व गर्दै राई सोमबार प्रदेश प्रमुख सोमनाथ अधिकारी प्यासीसमक्ष मुख्यमन्त्रीमा दाबी पेस गरेका हुन् । प्रदेशसभा बैठकमा भीम आचार्यले मुख्यमन्त्रीबाट राजीनामा दिँदै नयाँ सरकार गठनका लागि मार्ग प्रशस्त गरेका थिए ।

आचार्यको राजीनामा पछि प्रदेश प्रमुख अधिकारीले २४ घण्टाभित्र नयाँ सरकार गठनका लागि दाबी प्रस्तुत गर्न आह्वान गरेका थिए । राईले प्रदेशसभाका ४९ सांसदको हस्ताक्षरसहित मुख्यमन्त्रीका लागि दाबी पेस गरेको जनता समाजवादी पार्टी संसदीय दलका नेता जयराम यादवले जानकारी दिए ।

‘हामी गठबन्धनमा आवद्ध दलहरूले आजै ४९ जना माननीयको हस्ताक्षरसहित दाबी पेस गरेका छौँ । मुख्यमन्त्रीमा राईलाई सर्वसम्मत प्रस्ताव गरेका छौँ,’ उनले शिलापत्रसँग भने,‘सम्भवतः भोलि मुख्यमन्त्रीको शपथग्रहण हुनेछ ।’

नेता यादवले सरकार गठनका लागि भाडबण्डा भने नभइसकेको बताए । उनले अहिले मुख्यमन्त्रीमा मात्र सहमति गरिएको र मन्त्रालयको भागबण्डको विषय भने नटुंगिएको बताए । यादवले मुख्यमन्त्री नियुक्त भएपछि मन्त्रालयको भागबण्डा मिल्ने बताए ।

गठबन्धनका पक्षमा ५० सांसद रहे पनि माओवादी केन्द्रबाट निर्वाचित उपसभामुख सरस्वती पोखरेल मातृशोकमा परेकाले उनी हस्ताक्षरका लागि उपस्थित हुन नसकेको बताइएको छ ।

९२ सदस्यीय प्रदेशसभामा सरकार गठनका लागि ४७ सांसदको समर्थन आवश्यक पर्छ । राईलाई कांग्रेसका २१, माओवादी केन्द्रका १५, एकीकृत समाजवादीका १०, जसपाका ३ र संघीय लोकतान्त्रिक राष्ट्रिय मञ्चका एक सांसद गरी ५० सांसदको समर्थन छ । प्रदेशसभामा सभामुखसहित एमालेका ४१ र राप्रपाका १ सांसद छन् ।

प्रकाशित मिति: सोमबार, कात्तिक १५, २०७८ १६:४२