दूतावासका फरक-फरक विज्ञप्तिले मलेसियाको रोजगारीमा अन्योल, तत्काल नयाँ कामदार जान नपाउने

दूतावासका फरक-फरक विज्ञप्तिले मलेसियाको रोजगारीमा अन्योल, तत्काल नयाँ कामदार जान नपाउने

A+ A A-

मलेसियास्थित नेपाली दूतावासले नयाँ कामदार ल्याउने विषयमा औपचारिक जानकारी नभएको जनाएको छ ।

कोरोना महामारीका कारण मलेसिया सरकारले सन् २०२० को मार्च १८ देखि नै आवागमनमा नियन्त्रण गरेको छ । मलेसियाले आवागमन नियन्त्रण लागू गरेदेखि नै दूतावासले स्थगित गरेको मागपत्र प्रमाणीकरणको काम अहिलेसम्म नभएको जनाएको छ ।

मलेसियाको रोजगारी खुलेको र दूतावासबाट माग पत्र प्रमाणीकरण भइरहेको भन्ने विषयमा ध्यानाकर्षण भएको भन्दै दूतावासले भिसाको म्याद भएकाहरू मलेसिया आउन पाउने र नयाँ कामदार भित्र्याउने विषयमा कुनै जानकारी नआएको बताएको छ ।

कोरोनाका कारण मलेसियाले विदेशी कामदारको प्रवेशमा लगाएको प्रतिबन्ध हटाइएको नेपालस्थित मलेसियाली दूतावासले गत साता नै विज्ञप्तिमार्फत जानकारी गराएको थियो । मलेसियापछि तोकिएको स्वास्थ्य मापदण्ड पालना गरी क्वारेन्टाइनमा बस्नुपर्ने छ ।

दूतावासले मलेसिया जाँदा विश्व स्वास्थ्य संगठन (डब्लुएचओ) ले मान्यता दिएको खोपको पूरा मात्रा लगाएको हुनुपर्ने शर्त राखेको छ । भिसाको अवधि भएकाहरूले मलेसियाको अध्यागमन विभागबाट स्वीकृति लिएर सात दिन क्वारेन्टिन बस्ने गरी रोजगारीका लागि प्रवेश गर्न सक्ने दूतावासको विज्ञप्तिमा उल्लेख छ ।

मलेसियाले विदेशी कामदारका लागि श्रम स्वीकृति समेत खुला गरिएको समाचार आए पनि मलेसियास्थित नेपाली दूतावासले भने भिसा प्रमाणीकरणको काम सुरु भएको बताएको छ । मलेसियाको आधिकारिक निकायबाट नयाँ कामदार दिने विषयमा जानकारी नआएको र यहाँको अध्यागमन विभाग खुलेसँगै पहिला नै भिसा लागेका कामदारलाई लिँदै गर्ने बुझिएको दूतावासका लेबर कन्सुलर दिपक ढकालले जानकारी दिए ।

मलेसियाले प्रतिबन्ध फुकुवा गरे पनि नयाँ कामदारका विषयमा आधिकारिक सूचना नआएको उनले बताए । पछिल्लो तीन वर्षयता नयाँ नेपाली कामदार रोजगारीका लागि मलेसिया जान पाएका छैनन् ।

प्रकाशित मिति: मंगलबार, कात्तिक १६, २०७८ १४:५१