सरकार आलोपालो चलाउनेबारे अर्को सहमति हुन्छः प्रचण्ड

A+ A A-

प्रतिनिधि सभामा पेस गरिएका विभिन्न विधेयकमा विवाद देखिएको र सडकमा समेत विरोध सुरु भएपछि त्यसलाई पार्टी र संसदमा छलफल गरेर मात्रै ससंदमा पेस गरिने पूर्वप्रधानमन्त्री तथा नेकपाका अध्यक्ष पुष्पकमल दाहालले बताएका छन् ।

नेकपाका अर्का अध्यक्ष एवं प्रधानमन्त्री केपी शर्मा ओली विदेशबाट फर्कनेबित्तिकै पार्टीभित्र छलफल गरेर सबैलाई मान्य हुने गरी विधेयक संसदमा पेस गरिने अध्यक्ष दाहालले जानकारी दिए ।

सिन्धुपाल्चोकको बलेफी गाउँपालिका–६ मा रहेको कुपकन्या माविको नवनिर्मित भवन उद्घाटन गर्न आएका अध्यक्ष दाहालले सञ्चारकर्मीसँग कुरा गर्दै अब छलफलपछि आएको निचोडलाई समेत समावेश गरेर विधेयक ससंदमा लगिने बताए । ‘केही विधेयकहरु संसदमा पेस नगर्दै विवादमा आएको छ, प्रधानमन्त्री फर्कनासाथ पार्टीभित्र छलफल गरेर अघि बढाउँछौं,’ अध्यक्ष दाहालले भने ।

आलोपालो सरकार चलाउने विषयमा दाहालले सुरुमा त्यही सहमति भए पनि अहिले परिस्थिति बदलिएकोले नयाँ परिस्थितिअनुसार अघि बढ्ने बताए । ‘दुई पार्टीबीच एकता हुँदा आलोपालोको सहमति भएकै हो,‘ दाहालले भने, ‘तर अहिले अवस्था फरक भएको छ, त्यहीअनुसार फेरि नयाँ सहमति खोज्छौं ।‘

दुई अध्यक्षबीच विवाद र अन्तरविरोध छ जस्तो गरेर केही भ्रमपुर्ण प्रचार भए पनि आफूहरूबीच कुनै अन्तरविरोध नभएको अध्यक्ष दाहलले प्रस्ट पारे । ‘हामीबीच सरकार र पार्टी चलाउने विषयमा र अन्य विषयमा समेत कुनै मतभेद छैन । तपाईं सञ्चारकर्मीहरुले पनि जनतालाई यही भनिदिनुहोस्,’ अध्यक्ष दाहालले भने ।

पार्टी एकीकरणको विषयमा सञ्चारकर्मीहरुले राखेको जिज्ञासामा जिल्ला र जनसंगठनको एकता प्रक्रिया केही जटिल भए पनि त्यो टुंगिएकाले अब बाँकी काम केही दिनभित्रै पूरा हुने अध्यक्ष दाहालले जानकारी दिए ।

१५ कोठे भवन उद्घाटन

भूकम्पपछि क्षतिग्रस्त कुपकन्या माध्यमिक विद्यालयको नयाँ १५ कोठे विद्यालय भवनको अध्यक्ष दाहालले उद्घाटन गरेका छन् । सिप्रदीयन सहायता संस्थाको सहयोगमा ३ करोड ९७ लाख ४ हजार १५० रुपैयाँको लागतमा निर्माण भएको विद्यालय भवनमा सबै सुविधा छ ।

शौचालय, खानेपानी, घेराबार, फर्निचर, कार्पेटलगायतका सुविधा भवननिर्माण गर्नै संस्थाले विद्यालयलाई उपलब्ध गराएको विद्यालय व्यवस्थापन समितिका अध्यक्ष एवं वडा अध्यक्ष चित्रबहादुर तामाङले जानकारी दिए ।

प्रकाशित मिति: शुक्रबार, जेठ ३१, २०७६ ०६:१६