अन्नपूर्णमा प्रभुको आतंक : मनपरी उडान, स्थानीयलाई धम्की

तस्वीर : प्रेम थापा

A+ A A-

संरक्षित क्षेत्र कास्कीको अन्नपूर्ण आधार शिविरमा हेलिकप्टरलाई व्यवसायिक उडान भर्न दुई वर्षअघि रोक लगाइयो । महिना दिन उद्दारबाहेक अरू उडान बन्द पनि भयो । त्यसपछि कोरोना संक्रमणले लकडाउन भएपछि पदमार्गमा पर्यटन गतिविधि ठप्प रह्यो ।

गत असोजमा पदमार्गमा पर्यटकीय गतिविधि खुलेसँगै प्रभु हेलिकप्टरले कोरोना देखिनुअघि भएको निर्णय लत्याउँदै उडान भरिरहेको छ । अन्नपूर्ण गाउँपालिका ११, छोम्रोङका पर्यटन व्यवसायीका अनुसार प्रभुले दैनिक १० वटासम्म उडान गरिरहेको छ ।

कम्पनीलाई उडान नभर्न आग्रह गरे पनि अटेरी गरेपछि पदमार्गका व्यवसायी आउँदो हप्तादेखि आन्दोलन गर्दैछन् । सेन्चुरी युवा क्लबले १५ कात्तकदेखि माछापुच्छ्रे र अन्नपूर्ण बेसक्याम्प पुगेर हेलिप्याडमा कालो झन्डा गाडेर विरोध गर्ने भएका हुन् ।

`प्रभुले वास्ता नगरी उडान भरेको छ । तिमीहरूलाई के चासो भनेर चुनौती दिएका छन् । मुद्दा हाले हाल भनेका छन् । अब हामी गएर साइटसिनको नाममा नगर बस जस्तो गर्छ भने चुप बस्दैनौँ,´ क्लबका अध्यक्ष मिकास गुरुङले भने, `गाउँले, युवा क्लबको नेतृत्वमा त्यहाँ गएर हेलिप्याडमा कालो झन्डा गाडेर अवरोध गर्छौं ।´

हेलिकप्टर उडानले संरक्षित क्षेत्रका वन्यजन्तु र चराचुरुङ्गीमा असर परेको भन्दै २०७५ सालमा अन्नपूर्ण गाउँपालिकाको गाउँसभाले व्यवसायिक उडान रोक्ने निर्णय गरेको थियो । बिरामी भएमा उद्दार गर्न, भीआइपीको भ्रमणमा अवरोध नगर्ने अध्यक्ष गुरुङले बताए । उनका अनुसार अन्नपूर्ण बेसक्याम्पमा अहिले प्रभु हेलिकप्टरले दैनिक १० वटासम्म उडान गरिरहेको छ ।

कोरोना संक्रमण सुरु हुनुभन्दा अघि प्रभु, सिम्रिक, एअर डाइनेष्टी, एल्टिच्युट हेलिकप्टरले उडान भर्थे । कोरोनापछि प्रभुबाहेक अरुले रेस्क्युबाहेक उडान भरेका छैनन् ।

पदमार्गअन्तर्गत छोम्रोङ, दोभान, हिमालय, बम्बोका होटल व्यवसायी हेलिकप्टर कम्पनीको मनोमानीबाट रुष्ट छन् । हेलिकप्टरले उडान भर्दा पदमार्गमा देखिने जनावरमाथि असर परेको र तल्लो क्षेत्रका व्यवसायी मर्कामा परेको छोम्रोङका अग्रज पर्यटन व्यवसायी भुवनेश्वर गुरुङ बताउँछन् ।

`पहिला हामी हिँड्दा जनावर मान्छे हिँड्ने रुटमै देखिन्थे । अहिले देख्नै मुस्किल छ । हेलिकप्टरको आवाजले जनावर भाग्छन्,´ उनले भने, `उडाउनै हुँदैन भन्ने होइन । मनपरी गर्नु भएन । निश्चित उडान गर्नपर्‍यो ।´

अन्नपूर्ण संरक्षण क्षेत्र (एक्याप)को छोम्रोङ चेकपोस्टको तथ्यांक अनुसार यो सिजनमा दैनिक एक सय जना हाराहारी आधार शिविरतिर गइरहेका छन् । गत असोजदेखि हालसम्म २७ सय जना नेपाली र तीन सय विदेशी पर्यटक छोम्रोङ हुँदै आधार शिविरतर्फ गएका छन् । अन्नपूर्ण आधार शिविरमा वार्षिक ३० हजार हाराहारीमा पर्यटक पुग्ने गरेकोमा कोरोना भाइरसले त्यो संख्या ओरालो लागेको छ ।

विदेशीको रोजाइमा पर्दै आएको यो पदमार्गमा अहिले नेपालीको चहलपहल छ । असोजदेखि मंसिरसम्म पदमार्गमा पर्यटकको चाप बढी हुन्छ । हेलिकप्टरले वातावरणसँगै धेरैको जागिर पनि धरापमा पारेको पदमार्गका एक व्यवसायी सुनाउँछन् ।

`हेलिकप्टरले वातावरणमात्रै होइन, धेरैको जागिर खाइदिने भयो । ट्रेकिङ सप, ट्याक्सी, पोखराको होटल, जिप, पोर्टरलाई कति असर पर्‍यो होला ? हेलिकप्टरले पर्यटनमा पार्ने प्रभाव कति हुन्छ होला´, ती व्यवसायी आक्रोशित सुनिए ।

प्रकाशित मिति: शनिबार, कात्तिक १३, २०७८ ०८:४६