उच्च शिक्षाका लागि भारत जान चाहने नेपाली विद्यार्थीलाई अवसर

काठमाडौंमा ‘बृहत् भारतीय शैक्षिक मेला’ हुने भएको छ । उच्च शिक्षाका लागि भारत जान चाहने नेपाली विद्यार्थीलाई लक्षित गरी ३२ जेठ र १ असारमा शैक्षिक मेला गर्न लागिएको आयोजक द नलेज नेटवर्कका फाडन्टर सीईओ राम मेरानीले जानकारी दिए ।

उनका अनुुसार मेलामा भारतका विभिन्न कलेज र युनिभर्सिटीको सहभागिता रहनेछ । मेलामा सबै कलेज र युनिभर्सिटी न्याक र निर्फ (एनआईआरएफ) बाट मान्यताप्राप्त शिक्षण संस्था हुने उनले बताए । न्याक र निर्फ शैक्षिक संस्थाको गुणस्तर अनुगमन गर्ने निकाय हुन् ।

काठमाडौंमा बिहीबार आयोजित पत्रकार सम्मेलनमा सीईओ मेरानीले भने, ‘नेपाली विद्यार्थी र अभिभावकलाई भारतीय शिक्षाबारे विस्तृत जानकारी दिने उद्देश्यले मेलाको आयोजना गरिएको हो । त्यसकारण, मेलामा सहभागी हुने विद्यार्थी र अभिभावकले उच्च शिक्षाका लागि भारत किन योग्य छ भन्ने विषयमा पर्याप्त जानकारी पाउनेछन् ।’

भारतमा पढ्न जान चाहने नेपाली विद्यार्थीलाई सही विषय छनोट गर्न पनि मेला सहयोगी हुने उनको विश्वास छ ।

मेलामा इन्जिनियरिङ, म्यानेजमेन्ट, मेडिसिन, फार्मेसी, होटल म्यानेजमेन्ट, डिजाइन, फेसन टेक्नोलोजी, बायो टेक्नोलोजी, मेरिनलगायतका विषयअन्तर्गत एक सयभन्दा बढी कोर्सबारे जानकारी गराइनेछ ।

यस्तै, मेलामा विद्यार्थीको एकेडेमिक एक्सिलेन्सका आधारमा शैक्षिक संस्थाहरुले दर्जनौं विषयमा छानवृत्ति प्रदान गर्ने मेरानीले जानकारी दिए । निःशुल्क प्रवेशको व्यवस्था गरिएको मेलामा सहभागी हुने प्रत्येक विद्यार्थीका लागि उपहारको व्यवस्था गरिएको छ ।

मेला दरबारमार्गस्थित होटल याक एन्ड यतिमा हुनेछ ।