यो हप्ता शेयर बजारमा छायो हरियाली, थपियो लगानीकर्तामा उत्साह

A+ A A-

धेरै पछि शेयर बजारमा यो साता हरियाली छायो । कारोबारको पहिलो दिन आइतबार २७.५१ अंकले बढेको नेप्से त्यसयता दोहोरो अंकले बढेर कारोबारको अन्तिम दिनसम्मै बढ्यो । ३२ अंकमा पुगेर नेप्से फर्किएपछि लगानीकर्ता आत्तिएका थिए ।

झण्डै २२ प्रतिशतले नेप्से सूचक घटेपछि अधिकांशमा शेयर बढ्नेक्रम रोकिएर अब घट्छ भन्ने आशंका थियो । तर, बजार पुन: बाउन्स ब्याक हुँदै नेप्से अगाडि बढेको छ । प्राविधिक विश्लेषकहरूले २४३० को विन्दुमा बलियो सपोर्ट रहेको बताइरहँदा नेप्सेले २४७० को विन्दुलाई छोएर फर्किएको थियो । त्यसपछि भने नेप्सेको बढ्नेक्रम जारी छ ।

कुन दिन कस्तो रह्यो बजार ?

आइतबार

कारोबारको पहिलो दिन आइतबार नेप्से सूचक २७.५१ अंकले बढेर २५८४.५२ अंकमा नेप्से पुग्यो । गत हप्ता अन्तिम दिन १४ अंकले घटेर राताम्मे भएको शेयर बजारमा कारोबारको पहिलो दिनले हरियो भएर स्वागत गरेको थियो । कारोबार यो दिन २ सय २५ कम्पनीका ५८ लाख १८ हजार २५ कित्ता शेयर २ अर्ब ७७ करोड ३४ लाख २० हजार १ सय ३५ रुपैयाँमा कारोबार भएको छ ।

नेप्से सूचकमा सुधार आएसँगै कारोबारमा आएका समूह हरियो बन्न पुगे । अर्थात् व्यापार समूहबाहेकका सबै समूहको सूचक बढ्न पुग्यो । यो दिन व्यापार समूहको १.०७ प्रतिशतले सूचक घट्यो । योबाहेक आइतबार वित्त समूह ४.११, अन्य ३.२४, जलविद्युत् २.५२, विकास बैंक १.५६, उत्पादन तथा प्रशोधन १.७५ प्रतिशतले सूचक बढेको छ । कारोबारमा आइसीएफसी फाइनान्स र एनआइसी एशिया बैंक अगाडि थिए भने कमाउनेमा वेष्ट फाइनान्स र रिडी हाइड्रो अगाडि थिए।

सोमबार

आइतबारबाट नै बढ्न सुरु गरेको बजारले सोमबार पनि निरन्तरता पायो । अझ लगानीकर्ताको मनोविज्ञान आइतबारबाटै थप बलियो बन्दा नेप्से ८७.६३ अंकले बढ्न पुग्यो । २६७२.२५ अंकमा पुगेर नेप्से बन्द हुँदा २२९ वटा कम्पनीको ४ अर्ब ३० करोड ८८ लाख रुपैयाँ बराबरको ८३ लाख ९५ हजारभन्दा बढी कित्ता शेयर खरिदबिक्री भएको थियो ।

यस्तै, बजार बढेसँगै १३ वटै समूहको सूचक पनि बढ्दा हाइड्रोपावर र फाइनान्स समूहको सूचक भने ७ प्रतिशतभन्दा बढीले वृद्धि भएको छ । लामो समय घटेको बजारमा शेयर मूल्य गुमाएका कम्पनीहरूमध्ये १८ वटा कम्पनी सर्किट लेबलमा कमाउन पुगे । अर्थात् १८ कम्पनीको शेयर मूल्यमा सकारात्मक सर्किट लाग्यो भने १५ कम्पनीको ९ प्रतिशतले शेयर मूल्य बढ्न पुग्यो ।
कारोबार भने सबैभन्दा धेरै महालक्ष्मी विकास बैंकको भएको थियो । एकैदिन सो कम्पनीको १६ करोड २५ लाख रुपैयाँको शेयर कारोबार भएको थियो ।

मंगलबार

आइतबार र सोमबारजस्तै मंगलबार पनि नेप्सेले ७८.८२ अंकको वृद्धि गर्न सफल भयो । बजारमा लगानीकर्ताको मनोबल उच्च हुँदै गर्दा तथा राष्ट्र बैंकले ब्याजदरलाई सन्तुलित राख्न चालेको कदमले पनि त्यसको प्रभाव बजारमा पर्दा यो साता पूरै हरियो बन्न सफल भयो ।

मंगलबार पनि बजार २७५१.०७ अंकमा पुगेर बन्द हुँदा २२७ वटा कम्पनीको ६ अर्ब ३१ करोड ८३ लाख रुपैयाँ बराबरको १ करोड १४ लाख ८६ हजारभन्दा बढी कित्ता शेयर खरिदबिक्री भएको थियो । बजार बढेसँगै १३ वटै समूहको सूचक पनि बढ्यो ।जसमध्ये होटल तथा पर्यटन समूहको सूचक ७.५१ प्रतिशतले वृद्धि हुँदा सबैभन्दा कम माइक्रोफाइनान्स समूहको सूचक पनि १.३ प्रतिशतले वृद्धि भयो ।

यसैगरी ७ वटा कम्पनीको शेयर मूल्यमा सकारात्मक सर्किट लाग्यो । सकारात्मक सर्किट लाग्ने कम्पनीहरूमा वेष्ट फाइनान्स, नाङ्दी ग्रुप पावर, खानीखोला हाइड्रो पावर, राधि विद्युत, घलेम्दी हाइड्रो, माउटेन्ड हाइड्रो नेपाल र चन्द्रागिरी हिल्स थिए ।

बुधबार

बुधबार नेप्से परिसूचक १८.०६ अंकले बढेर २७६९.१३ विन्दुमा पुग्यो । बजार निरन्तर बढ्न सुरु गरेपछि भने कारोबार रकम पनि बढ्न पुग्यो । बुधबार २२८ कम्पनीका ६ अर्ब ६१ करोड २६ लाख रुपैयाँ बराबरको १ करोड १५ लाख ९२ हजारभन्दा बढी कित्ता शेयर खरिदबिक्री भयो ।

बुधबार १३ समूहमध्ये ९ वटा समूहको सूचक बढेको छ भने ४ वटाको घट्यो । लाइफ इन्स्योरेन्स समूहको सूचक सबैभन्दा बढी २.०६ प्रतिशतले वृद्धि हुँदा हाइड्रोपावर र मेनुफ्याकचरिङ एण्ड प्रोसेस समूहको सूचक ०.६८ प्रतिशतले घट्यो ।

बिहीबार

सुरुवातबाटै बजार बाउन्स ब्याक हुँदै हरियो बन्दा त्यसको प्रभाव कारोबारको अन्तिम दिन बिहीबारसम्म देखियो । नेप्से सूचक १३.०४ अंकले बढेर २७८२.१६ अंकमा पुग्दा २ सय २२ कम्पनीको ९२ लाख ३६ हजार ६ सय १३ कित्ता शेयर ५ अर्ब ३९ करोड ५२ लाख ६८ हजार ६ सय २८ रुपैयाँको कारोबार भएको छ ।

विकास बैंक, जलविद्युत, वित्त, निर्जीवन बीमा, माइक्रोफाइनान्स र इन्भेष्टमेन्ट समूहको सूचक बढ्न पुग्यो भने बैंकिङ, व्यापार, होटल, उत्पादन तथा प्रशोधन, जीवन बीमा र म्युचुअल फण्डको सूचक घट्न पुग्यो । समूहगत सूचकका आधारमा बिहीबारको बजार केही मिश्रित देखिए पनि कम्पनीगत रूपमा शेयर मूल्य बढाउनेहरूको हालीमुहाली देखियो । कारोबारमा आएका कम्पनीमध्ये ११३ कम्पनीको शेयर मूल्य बढेको छ भने ७१ कम्पनीको शेयर मूल्य घट्यो ।

तीन कम्पनीको भने शेयर मूल्यमा कुनै उतारचढाव आएन । रिडी हाइड्रोपावरको शेयर मूल्यमा १० प्रतिशतले बढेर पोजेटिभ सर्किट लाग्दा मनकामना स्मार्ट लघुवित्त र हिमालयन पावरको ९ प्रतिशतले शेयर मूल्य बढेको छ । गुराँस लाइफ इन्स्योरेन्स, एनएमबी हाइब्रिड फण्ड, अजोड इन्स्योरेन्सलगायतको शेयर मूल्य घटेको छ ।

कारोबारका आधारमा भने नेसनल हाइड्रो,नविल बैंक, जीवन विकास लघुवित्तलगायतका कम्पनी अगाडि छन् ।

प्रकाशित मिति: बिहीबार, कात्तिक ११, २०७८ १६:१९