धमाधम पार्टी छाड्दै विप्लव नेकपाका नेता कार्यकर्ता

A+ A A-

नेत्रविक्रम चन्द विप्लव नेतृत्वको नेपाल कम्युनिस्ट पार्टी (नेकपा) छाड्ने क्रम बढेको छ । पार्टी छाड्नेमा सामान्य कार्यकर्तादेखि पोलिटब्युराे सदस्यसम्म छन् ।

बुधबार पार्टीका इलाम जिल्ला इन्चार्ज विजय दर्नाल र एरिया सदस्य गणेशकुमार विक, फुर्वा शेर्पा र विदु शेर्पाले पार्टी छाडे । जेठ पहिलो साता दर्नाल झापाबाट पक्राउ परेका थिए ।

उनी पार्टी प्रवक्ता खड्गबहादुर विक(प्रकाण्ड)का निकट थिए । विकले दर्नाललाई मजदुर संगठनको उपाध्यक्षसँगै इलामको इन्चार्ज बनाएका हुन् ।

केही दिनअघि पाेलिटब्युराे सदस्य पदम राई सत्तारुढ नेकपामा प्रवेश गरेका थिए । ‘वार्ताबाट समस्याको समाधान गर्नुपर्ने’ लाइनका राईलाई पार्टीले निलम्बन गरेको थियो ।

एक महिनाअघि जेलबाट छुट्न रौतहटका जिल्ला इन्चार्ज शंकर अधिकारी र अन्य दुई जनाले पार्टी छाड्ने सम्झौता गरेका थिए । उनीहरुले जेलबाट छुट्नेबित्तिकै पार्टी छाडेका थिए । अधिकारी सत्तारुढ नेकपा प्रवेश गर्ने तयारीमा छन् ।

त्यस्तै, विप्लव नेकपानिकट स्वास्थ्यकर्मीको संगठनका पूर्वअध्यक्ष डम्बर रावललगायतले पनि पार्टी छोडे । उनीहरु सत्तारुढ नेकपामा प्रवेश गरिसकेका छन् ।

२७ जेठमा रसुवाका चार जिल्ला नेताले प्रशासन कार्यालयमा गएर पार्टी छाडेको सम्झौतामा हस्ताक्षर गरे । नेताहरु झक्कबहादुर भुसाल, इन्द्र पौडेल, नवीन घिमिरे र रामशरण पौडेलले पार्टी छाड्ने सम्झौतामा हस्ताक्षर गरेका हुन् । उनीहरु पनि सत्तारुढ नेकपा प्रवेश गर्ने तयारीमा छन् ।

तीन महिनाअघि मजदुरलगायत काठमाडौंलाई कार्यक्षेत्र बनाएर काम गरिरहेका १८ जना नेता कार्यकर्ता सत्तारुढ नेकपा प्रवेश गरेका थिए । उनीहरु पुष्पकमल दाहाल (प्रचण्ड) निवास खुमलटार गएर नेकपामा प्रवेश गरेका थिए ।

यससँगै कार्यकर्ताले विप्लव नेतृत्वको नेकपा छाड्ने क्रम बढिरहेको छ । ‘सरकारी दमन बढ्ने खतरा’ देखेपछि पार्टी छाड्ने क्रम बढेको नेकपाका एक नेताले बताए । ‘पार्टी छाड्नेलाई रोक्न सकिँदैन,’ ती नेताले भने, ‘पार्टी पुनर्गठन हुन्छ ।’

अर्का एक नेताले भने कार्यकर्ताले पार्टी छाडेको आरोप लगाए । ‘सहज स्थितिमा त जो पनि पार्टीमा हुन्छ । अप्ठ्याराेकाे सामना गर्न नसक्नेहरु किनारा लाग्छन्,’ उनले भने ।

प्रकाशित मिति: शुक्रबार, जेठ ३१, २०७६ ००:२६