गुणस्तरमा लापरबाही गरेको भन्दै रामेश्वरम् स्वीट्सलाई तिराइयो जरिवाना

A+ A A-

काठमाडौं महानगरको उपभोक्ता हित संरक्षण समितिले मिठाइजन्य खाद्यवस्तुमा अनुचित व्यापार गरेका केहीलाई आर्थिक जरिवाना तिराएको छ । अनुगमनका क्रममा समितिले केहीलाई भने सुधार गर्ने समय दिएको छ ।

अनुगमनका क्रममा गुणस्तरमा लापरबाही गरेको भेटिएपछि बत्तीसपुतलीस्थित रामेश्वरम् स्वीट्सलाई १० हजार रुपैयाँ जरिवाना तिराइएको छ । त्यस्तै, महाराजगञ्जस्थित प्रिया स्वीट एण्ड चाट हाउसलाई २० हजार रुपैयाँ र ताज वेकरीलाई २० हजार रुपैयाँ जरिवाना तिराइएको महानगरले जनाएको छ ।

टीवीएम उपकरणको प्रयोग गरेर तेलको गुणस्तर जाँच गर्दा रामेश्वरम मिठाइ पसलमा मिठाइ बनाउन बसालिएका ३ वटामध्ये २ वटा कराइको तेल मिठाइ बनाउन अयोग्य थियो । पसलका सञ्चालकले तेल फाल्न राखिएको दाबी गरे पनि कराइ चुलामा तातिरहेको अवस्थामा भेटिएको समितिले जनाएको छ ।

अनुगमनका क्रममा मिठाइ बनाउन प्रयोग गरिने रङ र मसलाको म्याद गुज्रिएको तथा फ्रिजमा राखिएका करिब एक दर्जन कोल्ड ड्रिङ्सको म्याद सकिएको भेटिएको थियो । मंगलबार कारबाही गरिएका ताज बेकरीले व्यवसाय सञ्चालनका लागि लिनु पर्ने कुनै पनि दर्ता प्रमाण पत्र देखाउन नसकेको समितिले जनाएको छ । समितिका अनुसार बेकरीको डिफ्रिजमा म्याद सकिएका कुल्फी र आइसक्रिम भेटिएपछि ६९ वटा आइसक्रिम र १ प्याकेट कुल्फी जफत समेत गरिएको छ ।

अनुगमनकै क्रममा महाराजगञ्ज चोकमा रहेको प्रिया स्वीटको भान्छा अँध्यारो र फोहोर भेटिएको थियो भने त्यहाँ पनि म्याद सकिएका रङ र मसलाको प्रयोग भइरहेको अनुगमन टोलीले फेला पारेको थियो । त्यहाँबाट भुजिया, सनपाप्रीलगायत म्याद गुज्रिएका खाद्यवस्तु जफत गरिएको समितिले जनाएको छ ।

समितिका अनुसार आजै अनुगमनका क्रममा गौशाला चोकस्थित अन्नपूर्ण मिठाइ भण्डारमा प्रयोगका लागि राखिएको चामलमा उपभोग्य अवधि मेटिएको र म्याद सकिएका बेसनका बोरा भेटिएको थियो । त्यस्तै मिठाइ बनाउन प्रयोग हुने केही रङ, मसला र कोल्ड ड्रिङ्स म्याद सकिएको अवस्थामा फेला परेका थिए ।

प्रकाशित मिति: बुधबार, कात्तिक १०, २०७८ १८:३१