न्यायिक नेतृत्व सम्पूर्ण रूपमा असफल भएकाे सर्वोच्च बारकाे ठहर, माग्यो प्रधानन्यायाधीश राणाको राजीनामा

न्यायिक नेतृत्व सम्पूर्ण रूपमा असफल भएकाे सर्वोच्च बारकाे ठहर, माग्यो प्रधानन्यायाधीश राणाको राजीनामा

A+ A A-

सर्वोच्च अदालत बार एसोसिएसनले प्रधानन्यायाधीश चोलेन्द्र शमशेर राणाको राजीनामा मागेको छ ।

सोमबार साँझ बसेको सर्वोच्च बारको कार्यसमिति बैठकले प्रधानन्यायाधीश राणाको राजीनामा माग्ने निर्णय गरेको हाे । सर्वाेच्च बारकाे विज्ञप्तिमा भनिएकाे छ, न्यायिक नेतृत्व सम्पूर्ण रूपमा असफल भएकाे ठहर गरेकाे न्यायपालिकारलाइ थप संकटबाट जाेगाउनका समुचित निकासका लागि मार्ग प्रशस्त गर्न सम्माननीय प्रधानन्यायाधीश समक्ष सर्वाेच्च अदालत बार एसाेसियसन जाेडदार माग गर्दछ ।

नेपाल बार एसोसियसनले निकास दिन आग्रह गर्ने निर्णय गरेको केहीबेरमै सर्वोच्च बारले राणाको राजीनामा माग्ने निष्कर्ष निकालेको हो ।

बार एसोसियसनले भोलि (मंगलबार) बिहान ११ बजे सल्लाहकार समितिको वैठकपछि ठोस निर्णयमा पुग्ने बताएको छ । सर्वोच्च बारले प्रधानन्यायाधीशले मार्गप्रशस्त गर्नुपर्ने धारणा सार्वजनिक गरेपछि नेपाल बारलाई समेत उक्त निर्णयमा पुग्न दबाब पुग्ने भएको छ ।

सर्वोच्चका बहुसंख्यक न्यायाधीश पनि राणाले राजीनामा दिएर न्यायपालिकाको संकट टार्नुपर्नेमा सहमत छन् । यसका लागि उनीहरूले प्रधानन्यायाधीश राणाले बोलाएको पूर्ण बैठक (फूलकोर्ट) समेत बहिस्कार गरिसकेका छन् । प्रधानन्यायाधीशको कार्यशैलीसँग असन्तुष्ट न्यायाधीशले बेग्लै बैठक गरेकाले ७ र ८ कात्तिकको इजलास ठप्पप्राय बन्यो ।

७ कात्तिकमा दिउँसो खाजा खाने समयपछि ठप्प बनेको इजलास ८ कात्तिकमा कुनै पनि इजलासमा सुनुवाइ हुन सकेन ।

सर्वोच्च बारले राजीनामा माग्ने निचोड निकालेपछि प्रधानन्यायाधीश राणा चरम संकटमा परेका छन् । स्मरणीय छ उनले यसअघि प्रधानन्यायाधीश गोपाल पराजुलीको नैतिकता नभएको भन्दै बीचमै इजलास छोडेर हिँडेका थिए । आज सोही नैतिक संकट राणामाथि आइपरेको छ ।

प्रधानन्यायाधीश राणाले मनोमानी रूपमा पेसी तोक्ने गरेकोले सहकर्मी न्यायाधीशहरू उनीदेखि रुस्ट बनेका हुन् । राजनीतिक प्रकृतिका मुद्दा र ठूला आर्थिक लाभ मिल्ने मुद्दा राणाले आफू र आफ्नो नियन्त्रणमा रहेका न्यायाधीशको इजलासमा पार्ने गरेको आरोप छ ।