अन्योलमा कांग्रेस महाधिवेशन: देउवामा छैन गम्भीरता, पौडेल समूहको पनि बेवास्ता

अन्योलमा कांग्रेस महाधिवेशन: देउवामा छैन गम्भीरता, पौडेल समूहको पनि बेवास्ता

A+ A A-

'चुनाव हारेकाले जितेकालाई काम गर्न दिनुपर्छ । महाधिवेशन हुन्छ, दुई-चार दिन यता उता भएर केही पनि हुँदैन । पार्टीभित्र सकभर सहमति गरौँ नभए लोकतान्त्रिक अभ्यास गरौँ,' आइतबार फिदिममा प्रधानमन्त्री तथा कांग्रेस सभापति शेरबहादुर देउवाले भने ।

सोमबार नेपालगञ्जमा समयमा महाधिवेशन हुन नसक्ने आशंका गर्दै कांग्रेस वरिष्ठ नेता रामचन्द्र पौडेललले भनेका छन्, 'प्रक्रिया छोट्टाएरै भए पनि महाधिवेशन समयमै सम्पन्न गर्नुपर्छ ।' सत्ताको काममा व्यस्त भएपछि प्रधानमन्त्री देउवाले महाधिवेशनलाई समय दिन सकेका छैनन् । र, समयमै महाधिवेशन गर्न पौडेल समूहले पनि देउवालाई दबाब दिन सकेको अवस्था छैन ।

पूर्वबाट आएको देउवाको अभिव्यक्ति र पश्चिमबाट पौडेलले प्रकट गरेको संशयले छैटौँ पटक सरेर मंसिर ९ देखि १३ का लागि तय भएको कांग्रेसको महाधिवेशन फेरि सर्ने आशंका उब्जिएको छ । देउवानिकट कांग्रेस सह-महामन्त्री डा. प्रकाशशरण महत अन्य नेताहरूले विवाद झिकिरहँदा समयमै निर्वाचन सम्पन्न गर्ने सभापतिको आकांक्षामा अप्ठ्यारो परिस्थिति सिर्जना भइरहेको बताउँछन् ।

'पार्टीको महाधिवेशन गर्नुपर्छ भन्नेमा सभापतिज्यू प्रष्ट हुनुहुन्छ । अन्य नेताहरूले नयाँ-नयाँ विवादका विषय उठान गरिरहने भएकाले त्यसको व्यवस्थापनका लागि त समय लाग्छ,' महतले भने, 'सभापतिको आशय पार्टीभित्र सहमति कायम गरेर निर्धारित मितिमै निर्वाचन गरौँ नभए एक-दुई दिन यता उता भएरै पनि महाधिवेशन गरौँ भन्ने हो ।'

पौडेल समूहका नेता चन्द्र भण्डारी सभापति देउवा समयमै निर्वाचन गर्न तयार हुनुपर्ने बताउँछन् । कांग्रेसभित्र स्वार्थी समूहले नभएर निस्वार्थ दबाब समूह बनाएर निर्वाचन समयमै सम्पन्न गराउन दबाब दिने बेला आएको उनको भनाइ छ । 'विभिन्न बहानामा पटक-पटक महाधिवेशनको मिति सरिसकेको छ । अहिले फेरि महाधिवेशन सारेर जग हसाउने काम गर्ने छुट कसैलाई छैन । सभापति र अन्य शीर्ष नेतालाई महाधिवेशन समयमै गराउन दबाब दिने बेला भइसकेको छ,' उनले भने ।

सभापति देउवालाई पौडेल समूहले नै दबाब दिनुपर्ने भए पनि साझा उम्मेदवार टुंगो लगाउन नसक्दा प्रभावकारी दबाब सिर्जना गर्न सकेको छैन । पौडेल समूहभित्र सभापतिको साझा उम्मेदवार टुंगो लगाउन सकस परिरहेको छ । राजनीतिक विश्लेषक पुरञ्जन आचार्य पौडेल समूहभित्र सभापतिको उम्मेदवारकै किचलो रहेकाले देउवामाथि दबाब सिर्जना गर्न नसकेको बताउँछन् ।

'आफ्नै समूहको व्यवस्थापन नगरी महाधिवेशनको हतारो गर्ने पक्षमा पनि पौडेल समूह देखिँदैन,' आचार्यले भने । पौडेल समूहबाट सभापतिका लागि पौडेल, महामन्त्री डा. शशांक कोइराला, नेता शेखर कोइराला र प्रकाशमान सिंहले दाबी गरिरहेका छन् । साझा उम्मेदवार तय गर्ने बताउँदै आएको पौडेल समूहभित्र मन्त्री बन्न नपाएपछि सुजाता कोइराला रुष्ट छिन् ।

उनले भनेकी छिन्, 'रामचन्द्रजीको सानो सोच र मुटु छ । रचनात्मक काम गर्नुहुन्न, दुःख मात्र दिनुहुन्छ। रामचन्द्रजीसँग अब म छैन, नेता मानेर हिँड्न सक्दिनँ। शशांकजीको लाइफ स्टाइल सभापति बन्ने किसिमको छैन ।' सुजाताको अभिव्यक्तिपछि पौडेल समूहमा नयाँ तरंग पैदा भएको छ ।

कांग्रेस नेता शेखर कोइराला अब पनि समयमै निर्वाचन नभए कांग्रेसको आन्तरिक लोकतान्त्रिक प्रणाली झन् कमजोर हुने भएकाले समयमै महाधिवेशन गराउन दबाब दिनु पर्ने बताउँछन् । 'शीर्ष नेताहरूले समस्या समाधानका लागि अग्रसरता देखाए समयमै महाधिवेशन गर्न सकिन्छ । महाधिवेशनलाई पर धकेल्ने कुरा अब मान्य हुन सक्दैन । पार्टी र त्यसको आन्तरिक लोकतन्त्रलाई कमजोर बनाउने खेलविरुद्ध दबाब सिर्जना गर्ने बेला आइसकेको छ,' कोइरालाले भने ।

क्रियाशील सदस्यता विवाद नटुंगिएपछि १३ जिल्लामा वडा अधिवेशन हुन सकेको छैन । वडा अधिवेशन सकिएका ५१ मध्ये १२ हिमाली जिल्लामा मात्रै दसैंअघि जिल्ला अधिवेशन सम्पन्न भएको छ ।

कांग्रेसले पटक-पटक महाधिवेशन सारेपछि एमाले अध्यक्ष केपी शर्मा ओलीले लोकतान्त्रिक भन्ने कांग्रेसले समयमै निर्वाचन गर्न नसकेको भन्दै आलोचना गरेका थिए । कांग्रेसभन्दा ढिलो महाधिवेशनको प्रक्रिया सुरु गरेको एमालेले वडा अधिवेशन सकिसकेको छ । ओलीको भनाइप्रति जवाफ दिँदै कांग्रेस प्रवक्ता विश्वप्रकाश शर्माले ट्वीट गरेका छन्, 'कांग्रेसले ५ वर्षभित्र महाधिवेशन गर्न सकेन भन्ने कमरेड केपी शर्मा ओलीको आलोचना स्वीकार्य । आलोचना गर्दा तथ्यको हेक्का नराख्नु भने लज्जास्पद ।'

मंसिर ९ देखि १३ सम्म तय गरिएको कांग्रेस महाधिवेशन फेरि सरे कांग्रेस आफैँ लज्जित हुनुपर्ने परिस्थिति आउने नेता भण्डारी बताउँछन् ।

प्रकाशित मिति: सोमबार, कात्तिक ८, २०७८ १६:४३