न्यायपालिकाको संकट विषयान्तर गर्ने एजेन्डा राखेको भन्दै सर्वोच्चका १४ न्यायाधीशले फुलकोर्ट बैठक बहिष्कार गर्ने

न्यायपालिकाको संकट विषयान्तर गर्ने एजेन्डा राखेको भन्दै सर्वोच्चका १४ न्यायाधीशले फुलकोर्ट बैठक बहिष्कार गर्ने

A+ A A-

प्रधानन्यायाधीश चोलेन्द्र शमशेर राणाले सोमबारका लागि डाकेको फुलकोर्ट बैठकमा १४ जना न्यायाधीश नजाने भएका छन् ।

न्यायालयको विश्वसनीयतामाथि गम्भीर प्रश्न उठेका बेला विषयान्तर गर्ने गरी बैठकका एजेन्डा आएको निष्कर्ष निकाल्दै उनीहरूले भोलि (सोमबार) को बैठकमा सहभागी नहुने सहमति गरेका हुन् । प्रधानन्यायाधीश राणाबाहेक आज उपस्थित सबै न्यायाधीश न्यायालयमा परेको संकटबारे छलफल गर्न दिउँसो २ बजे जुटेका थिए । छलफल भइरहेकै बेला दुईवटा एजेन्डामा छलफल गर्नुपर्ने भन्दै सोमबार फुलकोर्ट बैठक डाकिएको सूचना आयो ।

ती एजेन्डामा पहिलो, न्यायालयका विकृति हटाउन न्यायाधीश हरिकृष्ण कार्कीको संयोजकत्वमा गठित समितिले केही समयअघि बुझाएको प्रतिवेदन कार्यान्वयन र दोस्रो, वरिष्ठ अधिवक्ताको उपाधि वितरणसम्बन्धी थियो । ‘अहिले न्यायालयमा यत्रो संकट आइपरेको छ । यी दुई एजेन्डा महत्त्वपूर्ण भए पनि सिंगो न्यायालयमा आइपरेको संकटका अगाडि कम महत्त्वपूर्णको हो । र, सम्माननीय (प्रधानन्यायाधीश) ले अहिलेको संकटको विषयान्तर गर्न फूल कोर्ट डाकेको भन्ने निष्कर्षमा पुगेर हामीले नजाने निधो गरेका हौँ,’ छलफलमा सहभागी एक न्यायाधीशले शिलापत्रसँग भने ।

न्यायालयमाथि उत्पन्न संकटलाई कसरी लिने भनेर छलफल हुनुपर्नेमा अन्य एजेन्डा ल्याएकाले प्रधानन्यायाधीशले विषयान्तर गर्ने प्रयास गरेकोमा १४ न्यायाधीश एकमत बनेका छन् । ‘प्रतिवेदनमा पनि न्यायालयमाथि राजनीतिक हस्तक्षेप भएको कुरा उल्लेख छ । तर अहिले त प्रधानन्यायाधीशले नै न्यायपालिकाको स्वतन्त्रतामाथि गम्भीर हस्तक्षेप र आघात पुर्‍याउने प्रयास गरेको कुरा पेचिलो बनेर आएको छ,’ ती न्यायाधीशले भने, ‘तर वरिष्ठ अधिवक्ताको उपाधिलाई छलफलको विषय बनाउनुपर्ने अहिले आवश्यकता थिएन ।’

सर्वोच्च अदालतका वरिष्ठ न्यायाधीश दीपक कार्कीको संयोजकत्वमा सर्वोच्चमा उपस्थित सबै न्यायाधीशहरूले आज छलफल गरेका थिए । यो छलफल भोलि बिहान ११ बजेदेखि फेरि निरन्तर गर्ने समेत उनीहरूबीच सहमति बनेको छ । नेपाल बार एसोसिएसनका पदाधिकारीले न्यायपालिकामाथि देखिएको संकटबारे आज तीन घण्टा प्रधानन्यायाधीशसँग छलफल गरेका थिए ।

बारका पदाधिकारीसँगको छलफलमा प्रधानन्यायाधीश राणाले न्यायालयका विकृति विसंगति हटाउने प्रतिबद्धता जनाएका थिए । स्वचालित प्रणालीद्वारा पेसी तोक्ने, संवैधानिक निकायमा भएका पदाधिकारी नियुक्तिको मुद्दाको सुनुवाइ थाल्नेबारे प्रधानन्यायाधीश राणाले आफूहरूसँग प्रतिबद्धता व्यक्त गरेको बारका महासचिव लीलामणि पौडेलले बताए ।

‘यसअघि पनि उहाँले यस्ता प्रतिबद्धता जनाएर कार्यान्वयन नभएकाले हामीले फुलकोर्टमा छलफल गर्ने भन्यौं,’ पौडेल भन्छन् ।बारको चाहनामै छलफलपछि प्रधानन्यायाधीशले फुलकोर्टको बैठक भोलि साढे १ बजेका लागि तोकेका थिए । तर, एजेन्डामा भने वरिष्ठ अधिवक्ताको उपाधिको विषयसमेत राखेपछि सर्वोच्चका अन्य न्यायाधीशहरू बैठक बहिष्कारको निर्णयमा पुगेका हुन् ।

प्रकाशित मिति: आइतबार, कात्तिक ७, २०७८ १८:०३