विद्युत् नहुँदा बझाङ अस्पतालको सेवा प्रभावित, अस्पताल प्रमुखको गुनासो- जेनेरेटर चलाउने डिजेल पनि सकियो

विद्युत् नहुँदा बझाङ अस्पतालको सेवा प्रभावित, अस्पताल प्रमुखको गुनासो- जेनेरेटर चलाउने डिजेल पनि सकियो

A+ A A-

विद्युत् आपूर्ति नभएपछि जिल्ला अस्पताल बझाङको सेवा प्रभावित भएको छ ।

बेमौसमी वर्षाका कारण गएको बाढीपहिरोले बझाङ जोड्ने राष्ट्रिय प्रसारण लाइन अवरुद्ध छ । जसका कारण अस्पतालमा विद्युत् आपूर्ति नभएको हो ।

विद्युत् अवरुद्ध भएपछि अक्सिजन, नेबुलाइजर, शल्यक्रिया, एक्सरे, भिडियो एक्सरे जस्ता उपकरण सञ्चालन हुन सकेका छैनन् । आकस्मिक सेवा पनि प्रभावित बनेको छ ।

दैनिक सयौँको संख्यामा विरामीहरू अस्पताल आउने गरे पनि विद्युत् नहुँदा दिनभर कुराउनुपर्ने अवस्था आएको जिल्ला अस्पताल बझाङका प्रमुख डा. योगेन्द्र खातीले बताए ।

‘विद्युत् अवरुद्ध भएको एक हप्ताभन्दा बढी भयो । एक हप्तादेखि अस्पतालमा भएको जेनेरेटर चलाएर सेवा दिइरहेका छौँ । जेनेरेटर चलाउन पनि डिजेल सकियो,' खातीले भने, 'बाढीपहिरोले सडक अवरुद्ध हुँदा बजारमा डिजेल पाउने अवस्था छैन । शुक्रबारदेखि सबै सेवा ठप्प भएको छ । अहिले त आकस्मिक सेवा पनि दिन सकिएको छैन ।'

सुत्केरी हुन नसकेर आएका र पहिरोमा परेकाहरूको उपचारमा पनि समस्या भइरहेको खातीले बताए । चैनपुर बजारमा बिजुली बलिरहेको रहेको भए पनि अस्पतालमा बिजुली नभएको उनले बताए ।

नेपाल विद्युत् प्राधिकरणले २ सय किलोवाटको जेउलीगाड जलविद्युत् आयोजनाबाट जिल्ला सदरमुकाम चैनपुरमा बिहीबार साँझदेखि विद्युत् आपूर्ति गरेको छ । प्राधिकरण वितरण शाखा चैनपुरले बजारमा पनि आलोपालो विद्युत् आपुर्ति गरिरहेको छ ।

अस्पताल लाइनमा विद्युत्‌को पोल ढलेको र केही स्थानमा मर्मत गर्नुपर्ने भएकाले आपुर्ति गर्न नसकिएको प्राधिकरण वितरण शाखा चैनपुरका प्रमुख हरेन्द्र राय यादवले बताए । ‘जिल्ला अस्पतालले विद्युत् आपूर्तिका लागि कार्यालयमा जानकारी गराएको छ । मर्मतका लागि प्रयास गरिरहेका छौँ,' यादवले भने, ' अस्पताल लाइनमा पहिराले पोल ढालेको र ट्रान्सफर्मरमा समस्या देखिएको छ । राष्ट्रिय प्रसारण लाइन मर्मतमा अझै समय लाग्ने देखिन्छ । अस्पतालमा सके जति चाँडै यसै लाइनबाट विद्युत् आपुर्ति गर्नेछौँ ।’

बैतडीको खोडपेदेखि चैनपुर सम्म ६० भन्दा बढी पोल ढलेका कारण राष्ट्रिय प्रसारण लाइनको मर्मत गर्न समय लाग्ने देखिन्छ । डडेल्धुरासम्म सडक खुलिसकेकाले यो हप्ताभित्रै जिल्लाको अवरुद्ध विद्युत् सेवा सुचारु हुने यादवले बताए ।

प्रकाशित मिति: शनिबार, कात्तिक ६, २०७८ १९:०८