गौतमबुद्ध अन्तर्राष्ट्रिय विमानस्थलमा राखिने अढाई अर्बको बुद्धमूर्तिलाई भैरहवामा भव्य स्वागत

गौतमबुद्ध अन्तर्राष्ट्रिय विमानस्थलमा राखिने अढाई अर्बको बुद्धमूर्तिलाई भैरहवामा भव्य स्वागत

A+ A A-

गौतमबुद्ध अन्तर्राष्ट्रिय विमानस्थलमा राखिने अढाई अर्ब रुपैयाभन्दा बढीको बुद्धमूर्ति भैरहवा आइपुगेको छ । लुम्बिनी गार्डेन फाउन्डेसनको सहयोगमा उक्त मूर्ति विमानस्थलमा राखिन लागिएको हो ।

भैरहवा आइपुगेको बुद्धमूर्तिको स्थानीयले भव्य स्वागत गरेका छन् । सिद्धार्थ उद्योग बाणिज्य संघ भैरहवाको अगुवाइमा विभिन्न संघ संस्थाहरूले भैरहवा भन्सार आइपुगेको उक्त मूर्तिलाई नगर परिक्रमा गराएका हुन् ।

भैरहवा भन्सार कार्यालयबाट सुरु भएको नगर शोभायात्रा आँखा अस्पताल, देवकोटा चोक, मिलन चोक, नारायण पथ हुँदै बुद्धचोकबाट लुम्बिनीतर्फ पठाइएको थियो ।

लुम्बिनीमा पनि परिक्रमा गराई उक्त मूर्ति भैरहवास्थित गौतम बुद्ध अन्तर्राष्ट्रिय विमानस्थलमा ल्याएर राखिने कार्यक्रम छ । यही कार्तिक १४ गते राष्ट्रपति विद्यादेवी भण्डारीबाट सो मूर्तिको अनावरण गरिने कार्यक्रम तय भएको फायन्डेसनले जनाएको छ ।

साढे दुई अर्ब रुपैयाँभन्दा बढी मूल्यको ‘ह्वाइट जेड’ धातुबाट उक्त मूर्ति निर्माण गरिएको हो । सो मूर्ति १ दशमलव ९ मिटर उचाइ र ६० सेन्टिमिटर चौडाइको छ । मूर्तिमा प्रयोग भएको ह्वाइट जेड धातुको हालको अन्तर्राष्ट्रिय बजार मूल्य प्रतिग्राम १२ अमेरिकी डलर रहेको छ ।

म्यान्मारस्थित खानीसम्बन्धी कम्पनी मालविन ग्रुपद्वारा निर्मित एक हजार आठ सय केजी तौल भएको सो मूर्ति लुम्बिनी सांस्कृतिक नगरपालिका र स्पेनस्थित लुम्बिनी गार्डेन फाउन्डेसनको पहल तथा नेपाल सरकारको स्वीकृतिमा राखिने भएको हो ।

मालविन ग्रुपले स्पेनस्थित लुम्बिनी गार्डेन फाउन्डेसनलाई दुई करोड १६ लाख अमेरिकी डलर (साढे दुई अर्ब नेपाली रुपैयाँ) बराबरको सो मूर्ति सहयोगस्वरूप दिएको हो ।

मूर्ति अनावरण कार्यक्रममा स्पेनको एक्स्ट्रेमादुरा प्रदेशसभाका अध्यक्ष ब्लान्सा मार्टिन, डेल्गाडो र सोही प्रदेशका दुई जना मन्त्रीसमेत आउने कार्यक्रम रहेको फाउन्डेसनले जनाएको छ ।

अन्तर्राष्ट्रिय विमानस्थलमा मूर्ति स्थापनासँगै शान्तिका प्रतीक भगवान् गौतम बुद्धका माध्यमबाट नेपाललाई विश्वभर प्रचारप्रसार गर्न थप सहयोग पुग्ने रामग्राम नगरपालिका नवलपरासीका प्रमुख नरेन्द्र कुमार गुप्ता बताउँछन् ।

राष्ट्रियसभाका अध्यक्ष गणेश तिमिल्सिनाको नेतृत्वमा लुम्बिनी सांस्कृतिक नगरपालिकाका प्रमुख मनमोहन चौधरीलगायतको टोली स्पेनको एक कार्यक्रममा भाग लिन गएका बेला मूर्ति राख्ने विषय औपचारिक रूपमा अघि बढेको थियो ।

प्रकाशित मिति: शनिबार, कात्तिक ६, २०७८ १७:०१