जनकपुरमा सीके राउतका कार्यकर्ता र प्रहरीबीच झडप, प्रहरीद्वारा लाठीचार्ज (भिडियो)

जनकपुरमा सीके राउतका कार्यकर्ता र प्रहरीबीच झडप, प्रहरीद्वारा लाठीचार्ज (भिडियो)

A+ A A-

जिल्ला प्रशासन कार्यालय धनुषाअगाडि सीके राउत नेतृत्वको जनमत पार्टीका कार्यकर्ता र प्रहरीबीच झडप भएको छ । ईन्जिनियर एसोसिएसनका इन्जिनियरहरूले धर्ना दिइरहेको ठाउँमा राउतका कार्यकर्ता पुगेपछि शुक्रबार दिउँसो प्रहरीसँग झडप भएको हो ।

प्रहरीले भने राउतका कार्यकर्ता र ईन्जिनियरबीच झडप हुन सक्ने भएकाले त्यसलाई रोक्न लाठीचार्ज गर्नुपरेको जनाएको छ । 'सुरक्षा कायम गर्न भीडलाई तितरवितर गर्दा सामान्य झडप भएको हो,' धनुषाका प्रहरी प्रवक्ता डीएसपी जितेन्द्र बस्नेतले भने ।

झडपको सम्भावनालाई मध्यनजर गर्दै सुरक्षा व्यवस्थामा कडाइ गरिएको छ । यता प्रहरीले जनकपुरको मुरली चोकबाट केही मोटरसाइकल नियन्त्रणमा लिएको छ ।

राउतका कार्यकर्ताले प्रहरीले आफूहरूको मोटरसाइकल जफत गरेको आरोप लगाएका छन् । प्रहरीले भने तीन वटा मोटरसाइकल ल्याइएको जनाएको छ । 'बाटो नै छेक्ने गरी राखेको हुनाले ३ थान मोटरसाइकल जिल्लामा ल्याएको हो । जसको हो उसलाई फिर्ता गर्छौं,' डीएसपी बस्नेतले भने ।

बिहीबार राउतका कार्यकर्ताले खानेपानी तथा सरसफाई व्यवस्थापन प्रमुख ई. राजेश कुशवाहालाई दुर्व्यवहार गरेको भन्दै इन्जिनियरहरूले विरोध प्रदर्शन गरेका हुन् । त्यस्तै राउतका कार्यकर्ताले भने पक्राउ परेका आफ्ना कार्यकर्ताको रिहाइको लागि आन्दोलन गरेका थिए ।

कुशवाहालाई दुर्व्यवहार गरेको आरोपमा पक्राउ परेका राउतका ६२ जना कार्यकर्तामध्ये १७ जनाविरुद्ध मुद्दा दर्ता गरिएको छ । प्रहरी प्रवक्ता जीतेन्द्र बस्नेतका अनुसार सो पार्टीका जिल्ला अध्यक्ष ओमविक्रम कुशवाहा, सर्लाही जिल्ला सदस्य दुर्योधन यादव, प्रेमकिशोर यादव, केन्द्रीय सदस्य वीरेन्द्र महतो, विद्यार्थी जनमत सङ्घका अध्यक्ष विजय यादव, नेता सञ्जय प्रधान, धनिकलाल कापर, विक्रमकुमार साह, कैलाशप्रसाद साह, दिनेश रजक साफी, रामकरण यादव, सञ्जय कुमार सिंह, सञ्जय साह, महेश कुमार यादव, अमरनाथ साह र सुन्दर मण्डलविरूद्ध मुद्दा दर्ता गरिएको छ ।

जनमत पार्टीका नेता पंकज कुमार सिंह भने पक्राउ परेकाहरूको रिहाइ नभएसम्म आन्दोलन गर्ने बताएका छन् । 'हामी हाम्रो साथीको रिहाइ नहुन्जेल आन्दोलन गर्छौं,' सिंहले भने ।

पार्टीको आन्तरिक बैठकबाट आन्दोलनको रणनीति तय गर्ने समेत सिंहले बताए ।