प्रदेश १ मा मुख्यमन्त्रीले विश्वासको मत लिने प्रस्ताव टेबुल हुँदै, कस्ताे छ गणित ?

प्रदेश १ मा मुख्यमन्त्रीले विश्वासको मत लिने प्रस्ताव टेबुल हुँदै, कस्ताे छ गणित ?

A+ A A-

प्रदेश १ को प्रदेशसभा बैठक शुक्रबार बस्दैछ । शुक्रबारको बैठकमा मुख्यमन्त्री भीमप्रसाद आचार्यले विश्वासको मत लिने प्रस्ताव टेबुल गर्नेछन् ।

२५ असोजमा प्रदेशसभा सचिवालयमा दर्ता भएको प्रस्ताव शुक्रबार बस्ने कार्यव्यवस्था परामर्श समितिको बैठकपछि प्रदेशसभामा टेबुल हुने प्रदेशसभा सचिव गोपाल पराजुलीले जानकारी दिए ।

प्रदेश १ मा सत्तारुढ नेकपा (एमाले) का ४१ जना सांसद रहेको र अन्य दलहरू गठबन्धनमा आबद्ध भएकाले मुख्यमन्त्री आचार्यले विश्वासको मत पाउने सम्भावना छैन ।

प्रदेशसभामा विपक्षी गठबन्धनको पक्षमा ५० जना सांसद देखिएका छन् । मुख्यमन्त्री आचार्यले विश्वासको मत पाउने अवस्था नभएका कारण विपक्षी गठबन्धनमा आबद्ध दलहरूले गठबन्धनको सरकार गठनका लागि छलफल समेत सुरू गरिसकेका छन् ।

गठबन्धनका तर्फबाट नेकपा (एकीकृत समाजवादी)का संसदीय दलका नेता राजेन्द्र राईलाई मुख्यमन्त्री बनाउने सहमति भइसकेको छ । तर, प्रमुख प्रतिपक्षी दल नेपाली कांग्रेसले पनि मुख्यमन्त्रीमा दाबी गरिरहेको छ ।

सोही कारण कांग्रेस र एकीकृत समाजवादीले आधा–आधा कार्यकाल सरकारको नेतृत्व गर्न सक्ने सम्भावना रहेको कांग्रेस निकट स्रोतले जनाएको छ ।

कुनै राजनीतिक चमत्कार नभए मुख्यमन्त्री आचार्यले विश्वासको मत प्राप्त गर्ने सम्भावना छैन । सरकारविरुद्ध विपक्षी गठबन्धनमा आबद्ध कांग्रेस, माओवादी केन्द्र, नेकपा एस, जसपा एक ढिक्का छन् । ९३ सदस्यीय प्रदेशसभामा हाल एमालेको सभामुखसहित ४१ सिट मात्र छ ।

बहुमत सिद्ध गर्न ४७ मत आवश्यक पर्छ । त्यसैले मुख्यमन्त्री आचार्यले विश्वासको मत प्राप्त गर्ने सम्भावना तत्काल देखिँदैन । प्रदेशसभामा कांग्रेसको २१, उपसभामुखसहित माआवादी केन्द्रको १५, नेकपा एसको १०, जसपाको तीन, संयुक्त लोकतान्त्रिक राष्ट्रिय मञ्च र राप्रपाको एक/एक सिट छ । माओवादी केन्द्रका सांसद एमाले प्रवेश गरेर मन्त्री बनेपछि प्रदेशसभामा एक सिट रिक्त छ ।

यसरी हेर्दा विपक्षी गठबन्धनसँग ५० सांसद देखिन्छन् । सत्ता पक्षले राप्रपाको १ मत प्राप्त गर्ने अपेक्षा गरेका छ । त्यसो हुँदा पनि सरकार जोगिने स्थिति छैन ।

प्रकाशित मिति: शुक्रबार, कात्तिक ५, २०७८ ०७:०३