प्रदेश १ मा बाढीको प्रकोप: ५० जनाको मृत्यु, सयौँ परिवार विस्थापित

A+ A A-

अविरल वर्षासँगै आएको बाढी र पहिरोमा परेर प्रदेश १ मा बुधबार साँझसम्म ५० जनाको मृत्यु भएको छ ।

बुधबार साँझसम्म बाढीपहिरोमा परेर पाँचथर २२ जना, इलाममा १३ धनकुटा ६, सुनसरीमा ५, मोरङमा १, उदपुर दुई र भोजपुरमा १ जनाको मृत्यु भएको प्रदेश प्रहरी कार्यालय विराटनगरका प्रवक्ता प्रहरी उपरीक्षक नविनराज राईले जानकारी दिए ।

अविरल वर्षाका कारण आएको बाढी र पहिरोमा परेर उक्त संख्यमा मानिसहरूको मृत्यु भएको र सो संख्या थप बढ्न सक्ने प्रवक्ता राईले बताए । राईका अनुसार बाढीका कारण तराईको झापा, सुनसरी र मोरङ बढी प्रभावित भएका छन् । त्यस्तै पहाडी क्षेत्रका विभिन्न ठाउँमा पहिरो गएको छ ।

बाढी पहिरोका कारण सयौँ परिवार विस्थापित भएका छन् । बुधबारसम्म सुरक्षित स्थानमा सारिएका विस्थापित परिवार बाढीको पानि घट्न थालेसँगै घर फर्किन थालेको प्रदेश प्रहरी कार्यालय विराटनगरका प्रवक्ता राईले जानकारी दिए ।

उनका अनुसार सुनसरीको विभिन्न स्थानबाट १ सय ५० जनाभन्दा बढीको उद्धार गरिएको छ । मोरङमा करिब पाँच सयभन्दा बढीको उद्धार गरिएको छ । मोरङमा हजारौं घर डुबानमा परेको मोरङ प्रहरीले जनाएको छ ।

विराटनगर १, २, ७, ८, ११, १२, १५, १७, १८ का सयौं घर डुबानमा परेको छ । बुढीगंगा गाउँपालिका १ र २ का बस्ती डुबानमा परेका छन् । रतुवामाई नगरपालिका–७ मा ३० घर डुबानमा परेको प्रहरीले जनाएको छ ।

यस्तै पहिरोका कारण मेची र कोसी राजमार्गमा विभिन्न सडकखण्ड अवरुद्ध भएको थियो । अहिले अवरुद्ध सडकहरू वैकल्पिक माध्यमबाट संचालन गरिसकिएको प्रवक्ता राईले जानकारी दिए ।

पहिरोका कारण मध्यपहाडी लोकमार्ग अन्तर्गत तेह्रथुमको म्याङलुङ–वसन्तुर सडकसमेत अवरुद्ध भएको छ । उक्त अवरुद्ध सडक सुचारु गराउने प्रयास जारी रहेको जनाइएको छ ।

विराटनगर विमानस्थलमा बाढी पस्दा हवाई उडानसमेत अवरुद्ध भएको छ । अविरल वर्षाका कारण बुधबार विराटनगर विमानस्थल अवरुद्ध भएको हो । अहिले पनि विमानस्थल जलमग्न छ । विमानस्थल अवरुद्ध भएपछि काठमाडौं जाने यात्रुहरू अलपत्र परेका छन् ।