हुवासिन सिमेन्टलाई २० मेगावाट विद्युत, माग कम हुँदा स्वीचिङ स्टेसन चार्जको अनुमति

हुवासिन सिमेन्टलाई २० मेगावाट विद्युत, माग कम हुँदा स्वीचिङ स्टेसन चार्जको अनुमति

A+ A A-

धादिङमा निर्माणाधीन हुवासिन सिमेन्ट उद्योगले पर्याप्त विद्युत पाउने भएको छ । धादिङको सिद्धलेक गाउँपालिका–६ मा रहेको स्वीचिङ स्टेसन मार्फत हुवासिनले आवश्यक बिजुली पाउने भएको हो ।

मर्स्याङदी–स्यूचाटार १३२ केभी प्रसारण लाइन अन्तर्गत धादिङको सिद्धलेकमा निर्माण गरिएको स्वीचिङ स्टेसनलाई चार्ज गरी हुवासिनलाई बिजुली दिइएको प्राधिकरणले जानकारी दिएको छ ।

तनहुँस्थिति तल्लो मर्स्याङ्दी विद्युतगृहबाट आएको प्रसारण लाइन स्वीचिङ स्टेसनमा भित्रने (लुप इन) र बाहिरिने (लुप आउट) रहेको छ । प्रसारण लाइनलाई स्वीचिङ स्टेसनमा लुप इन गराएर हुवासिन सिमेन्टलाई विद्युत आपूर्ति दिइने प्राधिकरणले जनाएको छ । सिमेन्ट उद्योगले २० मेगावाट विद्युत उपयोग गर्ने उल्लेख गरिएको छ ।

नेपाल विद्युत प्राधिकरणका कार्यकारी निर्देशक कुलमान घिसिङले दसैँको समयमा विद्युतको माग कम हुने भएकाले सोही मौकामा स्वीचिङ स्टेसनलाई चार्ज गर्न अनुमति दिइएको बताए । ‘अन्य समयमा मर्स्याङ्दी–स्यूचाटार १३२ केभी ट्रंक लाइन बन्द गर्ने सक्ने अवस्था नै थिएन । त्यसैले दसैँको बेला चार्ज गर्न दियौं र टीकाको दिन स्वीचिङ स्टेसन चार्ज भयो,’ कार्यकारी निर्देशक घिसिङले भने। ‘अब हुवासिन सिमेन्टले चाहेको दिन १३२ केभी लाइनबाट विद्युत जडान गर्न सक्ने छ ।’

धादिङको बेनिघाट रोराङ गाउँपालिकामा निर्माणाधीन हुवासिन सिमेन्टले आफ्नै खर्चमा स्वीचिङ स्टेसन निर्माण गर्न गत वर्ष सुरु गरेको थियो । कम्पनीले स्वीचिङ स्टेसनबाट कारखानासम्म करिब १४ किलोमिटर प्रसारण लाइन र कारखाना परिसरभित्र १३२/१० केभीको सबस्टेसन निर्माण गरेको छ । प्राधिकरणले स्वीचिङ स्टेसन निर्माणको सुपरीवेक्षण गरेको थियो ।