अनशनरत रुबी खानको आरोप- प्रहरीले नै अभियुक्तको संरक्षण गरेको छ (भिडियो)

A+ A A-

अनशनरत रुबी खानले प्रहरीले नै अभियुक्तहरूको संरक्षण गरिरहेको आरोप लगाएकी छन् । आफूहरू सरकारसँग न्याय माग गर्दै आन्दोलन गरिरहेपनि प्रहरीकै कारण हिंसा पीडितले न्याय पाउन नसकेको उनको भनाइ छ ।

अनशनरत खानको स्वास्थ्य अवस्था बिग्रिएपछि शनिबार अस्पताल लैजानुअघि उनले सो कुरा बताएकी हुन् । चिकित्सकको सल्लाह अनुसार उनी त्रिवि शिक्षण अस्पताल गएपनि उनले अनशनलाई निरन्तरता दिएकी छन् ।

नन्कुन्नी धोबीको घटनामा दुई जना अभियुक्त मात्र पक्राउ परेको बताउँदै उनले सो घटनाको उजुरीमा पाँच जनाको नाम किटान गरिएको बताइन् । बाँकीलाई प्रहरीले अहिलेसम्म पक्राउ नगरेकाले उनीहरूलाई पनि पक्राउ गर्नुपर्ने खानको माग छ ।

त्यस्तै निर्मला कुर्मीको घटनामा हालसम्म पनि कुनै अभियुक्त पक्राउ नपरेको भन्दै रुबीले प्रहरीले छिटो अनुसन्धान अगाडि बढाउनुपर्नेमा जोड दिइन् । रुबीले बाँके जिल्लाका एसपी र डीएसपीले अभियुक्तहरूको संरक्षण गरिरहेको आरोप पनि लगाएकी छन् ।

बाँकेका एसपी र डीएसपीले अभियुक्तलाई संरक्षण दिएको र पीडित परिवार तथा अधिकारकर्मीलाई अभद्र व्यवहार गरेको उनको भनाइ छ ।

अधिकारकर्मी खानले आफूलाई पुरुष प्रहरीले पक्राउ गरेको तथा पक्राउ पुर्जी नदिइएको समेत गुनासो गरिन् । ' पुरुष प्रहरीले मलाई पक्राउ गर्नुभयो । मलाई अहिलेसम्म पक्राउ पूर्जी पनि दिइएको छैन । थुनुवा पूर्जी पनि दिइएको छैन', शनिबार अनशनस्थलबाट खानले भनिन् ।

आफूलाई त्यसरी गैरकानुनी रुपमा पक्राउ गर्दा वकिलसँग फोनमा समेत कुराकानी गर्न नदिएको उनले बताए ।

यसअघि रुबीलाई प्रहरीले माइतीघरबाट पक्राउ गरेर नेपालगञ्ज पुर्‍याएको थियो । हिंसा पीडितको लागि न्याय मागिरहेकी खानलाई प्रहरीले बहुविवाहको मुद्दामा पक्राउ गरेको हो । तर सर्वोच्च अदालतले उनलाई बदनियत राखेर पक्राउ गरेको भन्दै रिहा गर्न आदेश दिएसँगै उनी थुनामुक्त भएकी थिइन् । थुनामुक्त भएसँगै उनले अनशनलाई निरन्तरता दिएकी हुन् ।

बाँके नेवाजी गाउँकी नन्कुन्नी धोबी गत ५ साउनमा मृत भेटिएकी थिइन् । घरमै झुण्डिएको अवस्थामा उनको शव भेटिएको थियो । उनी लामो समयदेखि घरेलु हिंसाको सिकार भएको र घटनाको प्रकृति हेर्दा शंकास्पद रहेको भन्दै पीडितले प्रहरीलाई गुहारे । तर, प्रहरीले अनुसन्धान नगरी आत्महत्या करार गरिदिएको पीडितहरूको भनाइ छ ।

त्यस्तै, एकल महिला निर्मला कुर्मी गत वर्ष मंसिरमा बेपत्ता भइन् । १६ मंसिरमा स्थानीयले प्रहरीमा किटानी जाहेरी दिए । तर, प्रहरीले अनुसन्धान गरेन । अहिले उनको मृत्यु भइसकेको बताइएपछि यी दुई शंकास्पद मृत्युको गहिरो अनुसन्धानको माग गर्दै पीडित र अधिकारकर्मीले प्रदर्शन गरिरहेका छन् ।

प्रकाशित मिति: आइतबार, असोज ३१, २०७८ १२:०९